Matsh im hu hab i chum e juh g Tuhligo himdag chehanig
1 Neh, bo wa masma d uhgchu pahl g Jesus mant am i em‑tashogi. Kush g Jiosh ab si has elid ch am e wehm dahshch e‑kownal daikud ed. 2 Jiosh kihdag o si s‑wohom d geꞌe cheopi ch pi d wabsh hemajkam ha‑nahtoi. K heg eda am chikpan ihda si s‑wohom uhgchu t‑pahlig.
3 Uꞌugchu papal at ab haꞌichu wo chum iagchul Jiosh wui am wehhejed g pi ap ha‑chuꞌijig g hemajkam. T id hab waꞌap wo wa juh g Jesus. 4 K eda pi hiwgidas mas hab wo juh ia jewed dahm no ge d Levibad amjedkam. Do waꞌi idam mo am t‑himdag chehanig ed hab wua g chuꞌijig iagchulida. 5 K eda g ha‑chikpan wabsh t‑chehgidch g Jiosh kihdag ch hegai si s‑wohom chuꞌijig iagchulida.
Jiosh atsh wa am chehgi g Mosesbad mo has masma g kihdaj an dahm kahchim ch ed. Kush wa neid g Mosesbad an kehkch doꞌag dahm. Kush wa hab kaij g Jiosh ab wui:
Am ani m‑chehgid mo has masma g ni‑kihdag.
Kupt am wo ha ahgi g hemajkam mat hab masma am hema hab wo juh g ikus kih mat d wo ni‑cheopigak. Exodus 25:40
6 Neh, hegam uꞌugchu papal o am i chum ha wehmt g hemajkam heg hekaj heki hu hab elidaj g Jiosh. K wabshaba ihda wechij haꞌichu hab elidaj baꞌich i s‑kehgaj no pi g Jiosh baꞌich i s‑kehg haꞌichu ab t‑makiog. K g Jesus baꞌich i s‑ap i t‑wehmt heg hekaj. 7 Pi at am hu hab wo juh g wechij apchuda g Jiosh matp g hekiukam s‑ap am wo i t‑apꞌech wehhejed. 8 Neh, bash kaij g Jiosh:
Ab o him g tash mant am wo nahto g wechij hab ni‑elida am ha wehhejed g ni‑hemajkamga.
9 Kut pi hab wo masmak mo hegai mant am chum nahto am ha wehhejed g ha‑geꞌegedga mant eda ab i ha wuwhas Egypt jewed t amjed.
Hegam o pi ap am hu hab junihim g haꞌichu ni‑apchuda.
Kuni heg hekaj pi ha chegima.
10 Nt wabshaba am hab wo juh g wechij haꞌichu hab ni‑elida am ha wehhejed.
K d ihda mant am wo oꞌoha g ni‑chehanig ha‑chegitoi ed ch am ha‑iꞌibdag ed.
Kut woho d wo ni‑hemajkamgak.
Nt ahni d wo ha‑Jioshgak.
11 Kut pi hedai wo shaꞌi ha mashcha g e‑wehm oꞌodham mat wo s‑ni‑mahchk.
Wehs at wo s‑ni‑mahchk, chum as hedai wud wo k.
12 Gm ant hu hab wo i juh g pi ap ha‑chuꞌijig k pi hekid ep wo chegitok. Jeremiah 31:31-34
13 Neh, bash kaij g Jiosh. K heg hekaj tasho mat hekit hegai heki hu t‑himdag chehanig k oi gam hu hab wo i e juh.
<- HEBREWS 7HEBREWS 9 ->
