1-2 Kutki heg hekaj pi am hu ha apꞌet g Jiosh waida. Kutt ahchim wo s‑t‑gihugad matt pi hab wo masmak mash wa hegam. Jiosh ash am t‑wehhejed apꞌechudch e‑kihdag ed hab sha masma mash wa am ha wehhejed chum apꞌechudch hegai jewed. 3 Id ash am apꞌechudas ged hu i amjed matsh am e nahto g jewed. Sh wabshaba hab masma hab chuꞌig am t‑wehhejed mash wa hab chuꞌig am ha wehhejed. Jiosh ash hab kaij matsh pi hedai am hu wo i wah pi ab hu wohochudch k wabshaba ab wo bei g s‑koꞌok e‑namkidadag. Kutt heg hekaj ab wo s‑wohochudad ch hab s‑ap am wo i wahp kihdaj ed am i t‑pihhunk ia jewed dahm.
4 An o hab chuꞌig Jiosh heki hu oꞌohana ed matsh nahto g jewed ch dahm kahchim chuhdp tashkaj k am hahawa i e pihhu heg eda wewaꞌak tash. 5 Pegih, sh am t‑wehhejed an hab chuꞌig g s‑ap heubagida wehmaj g Jiosh. Sh wabshaba muꞌijj pi ab hu wohochud g Jiosh. Kush hab kaij matsh pi hekid am hu wo i wahp. 6 Hegam mat ab wo s‑wohoch g s‑kehg haꞌichu ahgaj g Jiosh atsh am wo i wahp Jiosh kihdag ed.
Neh, pi atsh am hu i wahp heg eda jewed mash g Jiosh am wui ha waid hegam matsh wehpeg kah g waidaj natsh pi pi ab hu wohoch. 7-8 Tsh wabshaba g ha‑aꞌaliga am i wahp. Tsh g Joshuabad am i ha wanim. Kush ab ha wui hab hahawa kaij g Hekia S‑apꞌekam Gewkdag ihda mani wa am em‑ahgid:
Ab o em‑waid g Jiosh hab masma mo wa ab ha waid g em‑geꞌegedga.
Kumt pi wo pi chechkaidagk hab masma mo wa hegam. Psalm 95:7-8
Heki atsh hu am i wahp heg eda jewed. K heg hekaj tasho mo pi ab hu heg wui ha waid g Jiosh 9-10 ch wabshaba ha waid matsh d wo hemajkamgajk. Kut hab wo e nahtokch mat am wo i wahp heg eda si s‑kehg s‑hehgig mash ha wehhejed apꞌechudch. Jiosh atsh am i nahto g e‑chikpan k hahawa si s‑hehgig. Kutt ahchim hab waꞌap wo nahto g t‑chikpan k wo si s‑hehgigk mattp wo t‑nahtokch. 11 Pegih, oi g am wo e nakog mamt am wo i wahp k wo si s‑hehgigk am wehmaj g Jiosh. Pi atsh am hu i wahp hegam matsh pi ab hu wohog el g Jiosh. Kutt wo s‑t‑nenꞌoid k pi hab wo masmak.
12 Shoꞌo waꞌi si s‑gewkdag g Jiosh neꞌoki. K g Jiosh heg hekaj am chehgidch mo has chuꞌig g t‑doakag ch t‑chegitoidag. Bo masma g neꞌokij mo g s‑muꞌuk wainomi mamtp hems heg hekaj ged hu wo si hikuch g chuhkug ch ohꞌo k wo cheh mo haschu ged hu si eda. 13 Pi att wo shaꞌi t‑nako machs haschu gam hu wo ehsto ab amjed g Jiosh. Wehs o haꞌichu s‑mahch. Kutt hemho wa hema tash am wo gegokiwua baꞌich k wehs wo ah g t‑chuꞌijig.
Mash d si uhgchu t‑pahlig g Jesus
14 Do si uhgchu t‑pahlig ch d Jiosh alidag g Jesus ch an i wah Jiosh kihdag ed am t‑wehhejed. Kutt heg hekaj ab wo s‑wohochudad chum hekid. 15 Ihda uhgchu t‑pahlig o si pihk e elid t‑hekaj natsh pi ab nakog k s‑mahch hegai mach ahchim ab nakog. Jiawul ash hab waꞌap chum chehani mat hab wo juh hegai mo haschu pi d Jiosh tatchui hab masma mo hemu ab t‑chehani. Kush wabshaba s‑ap ab wui kehk ch pi hekid hab juh g pi apꞌekam. 16 Pegih, ab o t‑kaiham g Jiosh no pi g alidaj d uhgchu t‑pahlig ch si pihk e elid t‑hekaj. Kutt heg hekaj s‑ap wo t‑nako matt ab wo tahnid g i wehmtadag ch pi wo ehbidad. T heg ab wo i s‑t‑hoꞌigeꞌid k ab wo i t‑wehmt.
<- HEBREWS 3HEBREWS 5 ->
