Id ash d Hema Ep Peter Oꞌohana

Ia ant ep wo i em-oꞌohani g Jiosh haꞌichu ahga ahni Simon Peter. S-mahch am mani d hema piongaj ch kehshaj g Jesus Christ. Heg o d t-doꞌibiakam Jiosh ch gam hu hab i juh g pi ap t-chuꞌijig. Mt ab i s-wohoch. K g em-wohochudadag wepo masma mo g t-wohochudadag ahchim Tutuligo matt wa ab i s-wohoch.

2 S-mahch am g Jiosh ch ep s-mahch g t-kownalig Jesus. K heg hekaj ab si s-em-hoꞌigeꞌid ch ab baꞌich wo i em-mahkad g s-ap tahhadkam.

3 Pegih, s-mahch ach g Jiosh. K heg hekaj ab t-mahkch wehs hegai mach tatchua matt hekaj s-ap wo himchudad g t-doakag ch d wo s-apꞌekamk. Ab at i t-gawulkai ab t-chehgidch g si s-tondam e-gewkdag ch s-e-apꞌekam. 4 Si geꞌe haꞌichu atsh hab wo t-juni g Jiosh. Kumt ab i s-wohochud k hab wo edgidad g Jiosh doakag ch wo e doꞌibia ab amjed hegai pi apꞌekam mo in haꞌichug heg hekaj pi ap ha-tatchui g hemajkam.

5 Pegih, ab o em-mahks g wohochudadag. Kumt wo si e nakogad mamt wo s-apꞌek ch am wo si i mamche g s-apꞌekam 6 ch wo s-dodolimak ch s-chechojim ab wo nakogad haꞌichu ch ab wo ihmad g Jiosh. 7 Ab o em-ab mamt ab ep wo si ha tatchuad g e-wehm wohochuddam ch ab wo si pihk e elidad chum hems ha hekaj g hemajkam. 8 Neh, id amt wehs eda am wo e nakogad ch hekaj s-wapagim am hab wo junihid g tatchuij g t-kownalig Jesus Christ. 9 Kutp hedai pi hab wo junihid ihda ch hab wo masmak mo g pi neadam no pi pi ap neid mat gam hu hab i juh g Jiosh g pi ap chuꞌijigaj.

10 Neh, mt hekaj am baꞌich wo i si e nako mamt si s-wihnam wo bei hegai mat haschu wehhejed ab i em-waid k ab i em-gawulkai g Jiosh. T hab pi hekid hab wo e juh mams wo i shul ab amjed g Jiosh. 11 Jiosh at s-ap ab wo em-mah g apꞌedag mamt am wo i wahp t-doꞌibiakam Jesus Christ kownaltalig ed.

12 Heki amki hu s-mahch ihda mani ia em-ahgid ch s-wihnam gegok heg eda wohokam mamt ab bei. Nt wabshaba am wo i em-chechegitolidad mamt wo s-chegitok ch ab s-ap wo bei g e-apꞌedag. 13-14 E o aihim mant im hu hab wo i ni-juh mad hab ni-ahgid g t-kownalig Jesus Christ. Ni hekaj hab ni-ahg mant am wo si em-chechegitolidad wehs ihda am hugkam mant hebai hugkam d wo doakamk. 15 Am ant wo i ni-nako mant am wo oꞌoha wehs ihda. Mt hab masma chum hekid wo s-chegitokad am i dahm mant hekid im hu hab wo i ni-juh.

16 Ia atsh ep wo jiwia g t-kownalig Jesus Christ jewed dahm. T g gewkdaj am ep wo e chehgi. Wohokam ach am em-ahgid id amjed ch pi g hohoꞌoki aꞌagida ahchim machd heki hu am neid g si s-tondam gewkdaj g si t-wuhpuikaj. 17 An achd wehmaj g Jesus. Kud g ohgaj Jiosh ab mah g si has elidadag k ab neok ch hab kaij, “Id o d si ni-tatchuidch ni-alidag.” 18 Id achd kah mo ab neok dahm kahchim t amjed anai machd an wehmaj doꞌag dahm.

19 Id o am si wohokamchud mo haschu heki hu am ahg g Jiosh haꞌichu i tashogiddam. Haꞌichu ha-ahga o wabsh heꞌes ab i t-mahkch g amichudadag hab sha masma matp hems g kanjel t-tonlidch am s-chuhugam k ed. K wabshaba g Jesus am t-mahtchulid ch baꞌich i geꞌe ab t-mahkch g amichudadag hab sha masma mo g s-mahs huꞌu baꞌich i t-tonlidch mat hekid ab wo i chesh mo e aihim g mahsidag. Mt heg hekaj wo s-chegitok g haꞌichu ha-ahga g Jiosh haꞌichu i tashogiddam k ab wo e dagitokch Jesus wui. 20-21 Haꞌichu ha-ahga o pi d wabsh hemajkam haꞌichu ha-ahga. Hekia S-apꞌekam Gewkdag o am ha tashogid g Jiosh haꞌichu ahga. T heg hekaj pi hedai wo e nako mas wabsh g hejel e-mahchigkaj wo i tashogi g haꞌichu ha-ahga.

2 PETER 2 ->