1 Am am wa chum s‑mahch matsh wa haschu has e juh am ha tahgio g t‑shohshon matsh wa g Mosesbad am i ha wanim. Jiosh ash hab masma ha nuhkud ch ha wanimed mash wa g chewagi am ha baꞌich him. Kutsh am gahi i huhud g geꞌe shuhdagi. 2 Id atsh hab ha juni mat hekaj ab wo s‑wohog elidad g Mosesbad. 3 Wehsijj ash am koꞌa hegai haꞌichu hugi mash g Jiosh ab ha mahk 4 ch wehsijj ab ihꞌe hegai shuhdagi mash ab geꞌe waw t amjed daꞌiwuni ch s‑wawinig. Ihda waw o wepogidas g Christ mo g doakgaj chum hebai ha wehmaj ch ab ha mahkch g hoꞌigeꞌidalig. 5 Tsh wa eda muꞌijj pi ab hu wohog el g Jiosh. Tsh hekaj si pi ha hohhoꞌi idam k ab ha hugio tohono jewed ch ed mash an oiopohim. Sh g ha‑hohon am wabsh e dagitohim.

6 Pegih, wehs ihda o d wabsh chehgida mat wo t‑shohbi matt pi ab hu wo i tatchua g pi apꞌekam mash wa hab e wua idam 7 ch pi ab hu wui wo t‑hoꞌigeꞌidahu mo haschu pi d Jiosh mash wa hab e wua haꞌijj idam. Bo chuꞌig an Jiosh oꞌohana ed matsh wa am dadhaiwua k huh mat haschu am toꞌi hegai mo chum jioshchud k am i wuwhag k e waila. 8 Am hu hebai ehp, sh haꞌijj wabsh chum hedai ha wehm woꞌiwup. Tsh g Jiosh am haꞌi ha cheha matsh wo ha kokda. Tsh gokko gamai waik mihl (23, 000) e koꞌij hemako tash ed. 9 Am hu hebai ehp, tsh haꞌijj bagach g Jiosh. Tsh heg hekaj am apꞌech matsh wo ha kiꞌikka g kohkꞌoi k wo ha hugio. 10 Am hu hebai ehp, sh haꞌijj pi ap has ahg g Jiosh hab kaijch mash pi ap ha dagioꞌid. Tsh heg hekaj am apꞌech matsh g anghil wo ha hugio. Mt heg hekaj pi am hu ha oidch hab wo e junihid.

11 Id ash wehs an oꞌohanas mat wo t‑shohbidad matt pi hab wo junihid g pi apꞌekam ahchim mach hemu in d dodakam am wehs ha oidch.

12 Haꞌijj amsh hab e elid mam s‑gewpkdag am e‑wohochudadag ed. Mt wabshaba wo si s‑e nenꞌoidk mamt pi wo i e jushadkad k pi wo i gei am pi apꞌekam ch ed no pi wehsijj t‑aꞌappem g Jiawul. 13 Wehs hegai aꞌappema mo ab t‑aihim o chum hedai ab aꞌahe. K wabshaba g Jiosh hab kaij matsh wo t‑nuhkudad ch heg hekaj pi hiwgid mas wo t‑aꞌappe am dahm matt heꞌes wo i t‑nako ch ab t‑mahkch g gewkdag matt wo nakog k wo t‑doꞌibia heg amjed.

14 Pegih, ni‑wepnag mani si em‑tatchua, pi g ab hu wui wo shaꞌi e hoꞌigeꞌidahunad hegai mo haschu pi d Jiosh. 15 Am g wo i aꞌamichud ihda nam pi haꞌichu s‑aꞌamichud. 16 Ab ach hoꞌigeꞌid g Jiosh ch ab si ihm g alidaj mach eda hab wua g mihshmda chemait hugi no pi hab d ahga mat am i dagito g e‑hon kots t ab k am iawua g e‑ehꞌed mat am t‑wehhejed muh. 17 Do waꞌi hemako hegai mat am t‑wehhejed muh. Ch ahchim am t‑chehgidch mach am wehmaj d hemako am t‑wehm hab wuadch g t‑mihshmda chemait hugi.

18 Jiosh atsh am ha cheha g t‑shohshon mat wo ha kokda g haꞌichu doakam k hekaj wo iagchul g e‑chuꞌijig wehhejed k haha wo huh hegai chuhkug. K hegam mo koꞌa ab ihm g Jiosh. 19 Pegih, k hegam mo ab ha wui iagchulid g e‑jijoshta ab ha ihm koꞌadch g e‑iagchulida. K eda pi d haꞌichu g ha‑jijoshta. 20 Ab o wabsh ha ihm g jijawul pi e mahchch mas has e wua. Kuni pi em‑tatchuid mams wo ha wehm ab ha ihm g jijawul koꞌadch hegai mo ab ha toꞌid. 21 T‑kownalig Jesus Christ o ab t‑mahkch ihda t‑mihshmda chemait hugi. K pi shaꞌi hiwgidas mams wo ha wehmajk amai mo ab ha ihm g e‑jijoshga koꞌadch hegai mo ab ha doꞌid. 22 Shahag wepo mam tatchua mamt wo hehgamch g Jiosh ab ha ihmadch g jijawul mamtp hedai ha wehm koꞌa mo haschu ab wui e toꞌaw g ha‑jijoshga. S‑e g wo nenꞌoidk no pi baꞌich i s‑gewkdag g Jiosh mam ahpim ch wo s‑koꞌokam em‑namkid.

23 Msh haꞌi hab chechꞌe mo wehs haꞌichu hiwgidas matp haschu wehhejed pi an hu haꞌichug g chehanig. Nt wabshaba wo em‑ahgi mo pi wehs haꞌichu s‑apꞌe am t‑wehhejed. Wehs haꞌichu o hiwgidas ch wabshaba pi wehs d wo i t‑wehmtadagk. 24 Am g wo s‑chegitok g chum hedai ha‑apꞌedag ch pi wabsh hejel e‑tatchui.

25 Oi g am wabsh wo huhgi matp haschu am e gagda nolawtakud ch ed k pi wo e kudu mas hebai e bei. Pi o ab hu em‑ab mams ab wo ha kakke mas d hegai mo ab e toꞌid g ha‑jijoshga. 26 An o hab chuꞌig Jiosh oꞌohana ed mo wehs haꞌichu d enigaj.

27 Mamtp wo tatchuad ch am wo e gegosido ha‑kih am hegam mo pi d e doꞌibiakam ch ab em‑waid. Kumt wabsh wo huh matp haschu ab wo i em‑toꞌi k pi ab hu wo ha kakke mas ab e toꞌid g ha‑jijoshga, wabsh pi wo e kudu mas hebai be k ab em‑mah. 28-29 T wabshaba hema ab wo sha si em‑ahgi mat ab e toꞌi g ha‑jijoshga, mt pi wo huh mat heg hekaj pi wo e kudu hegai mo em‑ahgid. Pegih, mtp hems haꞌi hab wo chei, “Ms haschu ahgk hig wo ge has ni‑ahgad heg hekaj mani haschu i koꞌa mani eda heg hekaj ab hoꞌigeꞌid g Jiosh? 30 Kunis haschu ahgk wo ni‑shohbi heg wabsh hekaj mam e kudut?”

31 Pegih, woho o wa mach apꞌedag matt wabsh chum haschu wo koꞌad. K wabshaba ab t‑ab matt ab wo si haꞌichuch g Jiosh wabsh chum haschu k ed, chum hems heg hekaj mach haschu i koꞌad ch haschu i ihꞌe. 32 Am g wabsh s‑ap wo kihkad ch pi haꞌichu am hu hab wo junihid mas heg hekaj hedai am hab wo juh g pi apꞌekam, chum hems hegam mo pi d e doꞌibiakam. 33 Bamt wo masmak mani ahni. Pi ani am hu waꞌi hejel ni‑chegito ch wabshaba wehs s‑ha chegito g hemajkam. Bani wa ni‑wua matp hems heg hekaj wo s‑hohhoꞌi mani has ni‑wua k ab wo s‑wohoch g haꞌichu ni‑ahga k wo e doꞌibia.

<- 1 CORINTHIANS 91 CORINTHIANS 11 ->