Youti nenpe Jon lantei

1 Ki metine liti kuntoluwepe nimoure mete pite Ma Ili, ki kantei youti nepei ne moto wuso Ma Ili pele keiniene nepe nire eple pene, le pe wuso ki onom puwopetei pepe. Ki kuteteiye onom puwoise kolo, mete yeflipi wuso pretape il punkom pepe, pe re ku mepi onom puwoise, 2 wusoli il punkom pepe, il pal pelpe olo ku mesiepe le ku ma mingiepe wem oli oli.

3 Ma Ili, le Eiya ili lite yuwei, le lire ninge lele Jisas Krais, te miso kani onom tantouku re onom manouku, le te wauku onom malye wem ku mingiepe il punkom, le ku onom puwo nemple.

Wai liti onom puwo nemple

4 Ki onom teinginetei wem ki kerengape eple ilepe peiye, pe wala pingiepe il punkom wuso Eiya ili lite yuwei lirpouku piti mingiepe pepe. 5 So ye moto, ki keiteiye piti ku ma onom puwo nemple. Ki kaptei il nemple yeflipi waiye kolo olo, wolo il wuso ku mingitepe re kapi fei wem ku weitei yefi, il pepei so ki kaptei kirpeiye pepe. 6 Ki kirpei kire wai liti ku onom puwo nemple pepe, ki kirpei piti ku mratei mingiepe il pite Ma Ili wuso lirpei piti ku ma mingiepe pepe. Il wuso ise yeflipiye yingitepe re kapi fei wem ise weitei yefi, il pirpei pirpolo, ku yeflipiye ma ratei mingiepe wai piti onom puwo nemple.

7 Mete piti pempetei pepe, wuru pelpe olo liye liye re peye pinge tef lepei, pe wuso pempetei pirpei pirpolo Jisas Krais lau tef lepei le le leltei topo tale watafei ku mete walem piti tef lepei kolo olo. Metine piti lirpei fei lolpepe lepe, le metine piti lempesipe mete, le le metine eringi lite Krais. 8 Ise kotopa isotei soma towa leise wuso yesio fei lepe ma kere yawi kolo olo, wolo ise ma kapi menmen teingipetei wuso Ma Ili loporipe piti ma waise pepe.

9 Metine piti lingiepe il pite Krais kolo olo, wolo le lingiepe il nemple pele, metine fei lepe Ma Ili olo liri rounge tratei kolo olo. Le metine piti lingiepe il pite Krais, yaitei lire ninge ma tire metine fei lepe pepi pratei. 10 Le wuso metine nele lau faleise le le leitaloise lire il fei pepei kolo olo, ise ma kesi yila ye winangou peise kolo olo, le ise ma yeisi fei yolomen re, ma olo. 11 Minele piti leisi lepe, le kanowo piti rounge tingiepe il olpe pele.

Il piti kirpei kapulu

12 Ki il wuru piti kirpeise wolo ki ma kire nimpe fai kaptei il paitei youti piti kirpeise kolo olo. Ki onposi piti kau kulise le ki kutei ma kirpeise wem ise yulwepe mi mati peiki soma ku ma mepi enke teingipetei.

13 Oru peise wuso Ma Ili keiniene nepe, ne eple pene pirpei wem teingi le ise.