Daniel

1 Lolo higao tuegi hi Nebokadnesa a ratahigi u bombore. A boborea hi u veie mo ladolado lawuagi lune siu mo maturu samwegi. 2 Ratahigi hi mo ware na: tangaloi ram mataduru; a tangaloi ram voki, tangaloi ram lalagohi gena huireana nona tamate, me a tangaloi ram tovotovo mo huri na visiu. Mo warera huri ve ran matamwasaragi na nona boborea. Siu rau vomai ram labe lo nagoi ratahigi, 3 mo veve lawera, “?Nau bombore mo vai eu nam romasi me nam tarani ve na ilo huri ve mo vosangi na havai?” 4 Ngere ram huduhudu lawea me ram gato lo leo Aramig rave, “O ratahigi mwaso vagituei! Go valu na nom bombore lawe gamai, siu gam veve na havagi hi mo vosangie lawego.” 5 A ratahigi mo duvi lawera tangaloi ngerehi, “Nau domigi nie beno huri ve gimiu nei veve na nogu boborea me nein matamwasaragi nie. Tareve nein vevea tea, neu nain tei vurivuri gimiu me a valemiu rain taqao vusi dolue. 6 Nge tareve nein velu na nogu boborea me nein matamwasaragi nie, nogu betebete, gaitawe, me a domi mava, rai vunatu lawe gimiu. Siu nein veve na boborea me nein matamwasaragi nie laweau! 7 Taligu ram veve, ratahigi go valu na boborea hi lawera nom gaihora, siu gamai gam matamwasaragi nie.” 8 Nge i ratahigi move, “Nau ilo huri ve nem vai vena nen revereve taro huri, neu ilo na nogu ladolado beno.” 9 Tareve goi velu na boborea hi tea laweau, a vevegiana lawe gimiu gategale hogosie. Neu bata na leo huri ve nei sine au me nem lado huri ve nomiu leo galigeli hi vin veieu nain tugu na nogu leo taligu. Nge, go valu na nogu boborea siu, nain ilo huri ve goin matamwasaragi nie lai laweau. 10 Nona tangaloi ram veve lawea, “Hate tangaloi gategale lo ure vena vai na havai gom huie. U siaga lawuagi. Hate ratahigi lawua sige huire ve na hui na gineu mwerehi dena tangaloi mataduru, sige a tangaloi ram lalagohi gena huireana nona tamate, me tangaloi visiu. 11 Havai ratahigi mo hui u siaga lawuagi. Tangaloi vin vosangi laie tea lawe na ratahigi. Ngere huqe hogosie, maraga rai toga te lo ure meire tangaloi.” 12 Gineu hi u vei na ratahigi mo sambu lawuagi, mo hora leo huri ve a tangaloi mataisao doluegi tau Babilon rai mate. 13 A leo hi mo mwalue huri ve rain ue vagamate na tangaloi mataisao, tora Daniel mena buluine.

14 Daniel mo lehi Ariok a muei leogoro noi ratahigi. Huri ngeie hi vin ue vagamate na tangaloi mataisao ngerehi. Daniel lo mataisao mena lolorani mo gato meie. 15 Daniel mo huie vena, “?Huri havai i ratahigi mo hora na leo huri ve gamai gan mate?” I Ariok mo veve sere na havagi hi mo vai lawe Daniel. 16 Siu, Daniel mo vano mo hui na ratahigi huri ve na tau na taro, huri ngeie vin matamwasaragi na nona boborea.

17 Siu Daniel u mule lo valena mo valuhuri na leo noi ratahigi lawe rebuluine: Hanania, Misael, me i Asaria. 18 Daniel mo laqa ragasi rebuluine huri ve ra tataro huri na hahagavi noi Huqe lolo taetae, vena gineu hi mo eno vunigi na matamwasara lawera siu, ngere ran mese mate meire tangaloi mataisao noi Babilon. 19 Lolo bongi hi mo vosangi na leovunigi hi huri na nunui boborea hi lawe Daniel. Siu i Daniel mo galohagegi na Huqe lolo taetae. 20 Move,

24 Siu Daniel mo vano lobei Ariok hi, i ratahigi u horae vena wehi vagamate na tangaloi mataisao tau Babilon, mo veve lawea vena, “Mese ue vagamate na tangaloi mataisao tau Babilon. Go lai eu lawe ratahigi neu nain matamwasaragi na nona boborea.” 25 Ariok mo lai Daniel siseri lawe ratahigi move, “Nau hagwe na tangaloi gategale deni re rau reveire dena Juda, ngeie vin matamwasaragi lei na boborea lawe na ratahigi.” 26 I ratahigi mo hui Daniel hi a henana tuegi i Beltesasa, “?I nigo goi vei lei ve goi veve na nogu boborea, siu mo vosangi na havai?”

27 Daniel mo duvi lawe ratahigi Nebokadnesa vena, “Hate tangaloi Mataisao, sige tangaloi ramo voki, tangaloi mataduru, ngere tangaloi visiu, tangaloi mo veve na gineu lo taro mo vumai teu, vena vi matamwasaragi na gineu vunigi hi ratahigi mo huie huri, 28 nge i Huqe lolo taetae mo vosangi na gineu vunigi. Ngeie u haharagi lawe ratahigi, a nom boborea me havai gu lehe mo eno lolo domimu tavohe gom eno lo niemu ngere. Mo haharagi nigo a hava gineu vin vei lolo rani mo vomai mosigei. 29 Ratahigi, tavohe gu meturu gu bomboregi na gineu vin vomai mosigei. Lo nom boborea, i Huqe Mauri hi mo haharagi na gineu lawego mo eno vunigi vin vomai mosigei. 30 Nge i neu a gineu vunigi ngaha u vosagiana laweau hate huri ve ba a nogu lolorani u lawua deni re lavasigi, nge huri ve i Huqe lolo taetae na matamwasaragi na nom boborea siu nigo ratahigi goin ilo na havagi hi mo eno lolo domimu. 31 Ratahigi, lolo nomu boborea gu lehi na nunui tangaloi lawua me u qaravu liu u labe lo nagomu, me u varavara dena varavara. Nunu hi u veigo gom matagu ve go lehie. 32 A qatune rau veie gena vatu homu mwasara, a mabune mena limana gena vatu renige, a taqangine mena baloana gena vatu meraga, 33 garune gairue rau veire lo aean, qaqai qalagena gena aean mena tano qeaqea. 34 Siu tavohe gom lelehurie, a vatu u teiana hate gena limei tangaloi mo totogi na nunui tangaloi hi lo ului gave rau veire, lo aean mena tano qeaqea rom mavurivuri. 35 Siu aean, vatu qeaqea, vatu meraga. Vatu renige me a vatu homu rau mevurivuri mwere na bebei tovu. A Langi mo heregi vohogi nire gategale he eno tea. Nge a vatu hi mo mauri sueulu mo vuragi vusi lawua, mo horongi na ureure doluegi.

36 Ngehi a nom boborea, siu siserigi hi gai matamwasaragi nie lawe na ratahigi. 37 O ratahigi, nigo a ratahigi nora ratahigi; huri i Huqe lolo taetae u ragasigo mo bete na huireana, me mo vaigo gom lawua liu na ratahigi doluegi. 38 U veigo gom vuragi ratahigi goro na tangaloi doluegi vataha na ute ram toga lune lolo ureure; me goro na gangarue turu talolo songo, manu lolo mahava, mena ige lolo tahi me i nigo hi a vatu homu. 39 Lo tagumu: ngere lo bambai ratahigi tuegi gategale vage rain maraga mwere na vatu renige, ngere rai lado mavagi nie tea mwereigo. Me a bambai ratahigi gai toligi nge a vatu meraga, vin ratahigi goro na ureure doluegi. 40 Me vagasigi, a bambai ratahigi gaivesigi u siaga mwere na aean; huri a aean mo volo, me mo momogagi na gineu doluegi. Me mwerehi a aean mo volo vurivuri na gineu, siu ngeie vin momogagi nire me vin volora lalavasigi doluegi. 41 Mwerehi gu lehi na qaqai geru mena bisu, ru veiana duvigi a aean duvigi a tano qeaqea, siu a sinobu noi ratahigi rain mawahewahe; huri a huine u mwere na aean maraga i nge mo roigi mena tano qeaqea. 42 Mwerehi a bisu lo garune duvigi a aean duvigi a tano qeaqea, siu, sinobu noi ratahigi hi lavasigi rau huire lavasigi hatie. 43 Vage, gu lehi na tano qeaqea mo bulu mena aean, ngehi mo haharagi nie vena ngere a duvi aean me ngere duvi tano qeaqea,tangaloi ram lado huri ve rain bubugi vin garea maraga, a tano qeaqea roin roigi tea lai mena aean. Siu, a tangaloi rain bulu tea mwere na tano qeaqea mena aean. 44 Lo taro nora ratahigi ngerehi, Huqe lolo taetae vin rivu na ratahigi vin toga vagitue. Siu vin siregi na tanoi nona ratahigi tea lawe na tangaloi dolue. Ngeie vin momogagi na tanoi ratahigi ngerehi doluegi, me i ngeie sibona vin labe vagituei. 45 Nge ngaha a havagi gu bomboregi nie huri a vatu u teiana dena vusi lawua hate gena limei tangaloi, me mo toto vurivuri na aean, a vatu meraga, a tano qeaqea, a vatu renige, mena vatu homu; a Huqe lawua u haharagi na ratahigi mo ilo na havagi mo vomai mosigei. A boborea hi a hogo me havagi nam matamwasaragi nie a hogo!”

46 Siu, i ratahigi Nebokadnesa mo taigi na nagona vuine mo galohagi Daniel, me mo veve lawe na nona tangaloi huri ve ran hogohogo lawea ran bete na gineu bonana u buhoru. 47 I ratahigi mo veve lawe Daniel, “A hogo a nom Huqe Mauri nge a Huqe Mauri nora huqe me a Huqe nora ratahigi. Me mo vosangi na gineu vunigi, huri nigo gu vei lei gom matamwasaragi na gineu vunigi.” 48 Siu i ratahigi mo tau Daniel mo vuragi tangaloi lawua me mo bete na hogohogo sao lalawua lawea. Siu mo taue mo vuragi qatui leogoro na togagi venue varea dena Babilon. Me nge mo vuragi na qatui leogoro na tangaloi mataisao doluegi noi Babilon. 49 Siu, Daniel mo hui na ratahigi, me mo tau Sedrak, Misak me i Abednigo ram leogoro na togagi venue lolo Babilon, nge i Daniel mo tabana lolo gamali ratahigi.

<- Daniel 1Daniel 3 ->