1 Avoeto ungote God ta hondate ari mo daingeto simba aro? Eto ungotena God ta hondate ari peni vahai be aja ari sasapura kaikari arote? 2 Ainge mane aisora te ungotena Iesu Keriso ga kajueto ari sasapura avoembo pepehekea avoeto ereto ari sasapura mane ue iresora. 3 Amita ke be amo erevira, ungotena Iesu Keriso ga pehari avoeto ungotena bapataito eagora amita ahe kihira avo eagora. 4 Amo God Mamo na amita usasa sovera te na Iesu Keriso pehena avo jiginu vasiri te erena avoeto amiga vasiri eha humbuto irora pehenu kovea aita bapataito eagora. 5 Amo Iesu pehena amiga kaju eagora avoeto Iesu na vasiri te erena ainge dombo ungotenanena vasiri te erasora. 6-7 Eto ungotena ere kogora amo ari sapura embo pehasuja amo ari sapura ehako mane aisuja te irae aisuja avoeto ungotenau hamo ta ari sapura amita sovera avo irae aja Iesu ga cross ta teo pehea amo ari sapura ta ke agi mane aisi ue pehea. 8 Eto ungotena Keriso ga pehea avoeto Keriso ga iresora avo ke be hotembagora. 9 Eto ke nei be hotembagora amo Keriso peheto vasiri te erena amo ehako mane pehasuja te pehari amo Iesu na dembarira. 10 Eto Iesu na iji vahai enda ta ari sapura avoembo peheto vasiri te erena amo God ga iraguja 11 ainge dombo ungo Iesu Keriso avoembo peheto vasiri te ereto God te Iesu Keriso te ga kajueto vahaita miheva. 12 Eto ungo hamo te visi te miheva amikote amo ari sasapura na tihi jigihirou ungo amita ke agi avojo. 13 Eto umo peheto vasiri te erari avoeto no utu rate ingeni rete tihi rete hamo rete amo ari sapura ara mane ikasoa te ari jajavotoho ara pe te God ta degi hande ikejo. 14 Eto umo God ta ke pepeni na andirari embo mane rate God ta hande humbari embo avoeto ari sasapura na umo mane tihi jigesuja.

15 Eto ungotena God ta ke pepeni na andirae rate God ta degi vasiri hande ehei umbera amo ari sasapura aisora amo tehorete? Ainge manera te 16 umo embo amita pure tunga ikasoa amo embo amita ke avo pere agi asoa amo ari sasapura agi ue ere uma pehaote God ta ke agi ue ere uma amita tihi ta embo javotoho ao? 17 Eto ungo mahu amo ari sasapura ta ke agi ari embora te God ta ke hande ore ingihava avo be jigito miheva avoeto God osa ere ora. 18 Avoeto ungo ari sasapura na andirari avo bujeketo araha ta puvuto ke jajavotoho ta agi ari embopo ere ova. 19 Eto ke erena avo ungo be ingova timu hatirari ke na humbuto ere hona amo ari jajavotoho na tihi jigoute mo ari sasapura na tihi jigou? Eto iji mahu amo ungota hamo na ari sasapura isapamane be ere uaeheva avoeto jandireketo ari jajavotoho avo otohu ue amita ke agi ari embopo evujo. 20 Eto iji mahu amo ungo ari jajavotoho na tihi jigae rate ari sasapura na ungo tihi ere jigihahija, iji amikote amo ungota degi ari javotoho puvunute? 21 Na ere kogona amo ungota degi me kiari te pehari te avo puvuna. 22 Rate ungo ari sapura na andirari avo God na vujekehei amita pure embopo ere ova, amo amita pure ere uma Otohu ue vasiri te daroho iresova. 23 Eto ari sasapura ta mine amo pehasora te God ta hande amo Bada Iesu Keriso ta degi vasiri daroho humbuto iresora.

<- Romans 5Romans 7 ->