1-3 Eto ke nei aisona amo God na amita embomeni egikenute? Ainge aera te namote tapa na Israel embo eto Ahihi nau amo Abraham eto embomeni nau amo Benjamin ra eto God na amita embomeni mahu kina amo God na egikaera. Te peroveta Elijah na Israel embomeni ta jo ngahia avo pehumba eto God ta degi hariketo ke ainge ena avo ungo be hotembevujo, “Bada God, Israel embomeni na no peroveta tapa tehere pepehekehera eto no pene gaga jigito aimbehera na oenga mihena te namote tapa taro pehana ere ora”, ainge enu 4 God na ke mine einge ena, “Ke ainge amo erea te embo tapa 7,000 ainge avo embo nau ara simba ereona amina god ingeni na ari javo Baal avo paunge teteri eto humote pain ae mihera” ke ainge ena 5 avoeto eha oroho emo God na embo amita toho avo uje amita na humbuto simba ere ua. 6 Amo embo ta ari jajavotoho amina God ombae rate God ta uje na embo humbaguja te embo ta ombari avo God na mane humbasuja te embo ta degi hande ere ikihia avoeto uje amita na embo humbaguja. 7 Te ke do aro? Eto Israel embomeni na God kesi jombure ere uahera te hambae ea te God na oenga kito siriketo humbija embomeni amina God ere hambuhora. Eto God na siriketo umbae tona embomeni avo ke be mane kiagora God na tihi ere peikiha 8-9 amita ke amo einge kajari mihia, “Eto God na enana ta siro ehei bouka ehei tihi na kiae eto oje na ingae amo God na ainge ena amikote puvuto eha emite ainge pere mihera”. Amita ke amo David na einge kajena, “Eto enana ta hajae vajae amo ihive aingeko kaiketo mihirou ai ta horaro timbau hajire kesora. 10 Eto tihi ta taro kuru au ari sasapura ta bouka humbuto ku okokombeto daroho iresora.” ke ainge David na Judea embopo God kiae avoembo kajena. 11 Eto eto ingari ke nei asona amo erevira, Israel embomeni na teto tiambueto veto mihera amo mane ereto pambarote? Ereto pambasora te enana ari sasapura eto veto mihera enda nei embomeni God na oreketo uhua avo kogue enana daingeto humbaehija avoeto tunga osaga kogue mihera. 12 Eto ke erevi be hotembevujo, Israel embomeni na God egiketo ari sasapura ta vea avoeto God na enda nei nei embomeni avo ere uhua avoeto enana ta degi ari javotoho puvija, eto Judea embomeni te tapa humbasuja amo ari javotoho be enda tapa ta ainge puvuresuja. 13 Eto ungo enda nei embomeni ta degi ke erena, amo ungota degi ke hande ana God na ikehija pure amo nau degi ta dombo be rate 14 pure erevi ereona amo ungo God ta degi javotoho ari ere uhova avo embomeni nau na kito humbasi uje ururoro God na kito oreketo umbaja pure erevi ereona. 15 Te God na Israel embo tona avoembo enda nei embomeni na God ga namei ere ora te Israel embomeni ehako humbasuja amo pehari ta eto eha erarako aisora. 16 Eto embo na pure ta indari be isapa humbuto God ta degi ikasuja eto pure ta indari tapa amo God ta toho ue otohu aisuja eto nei ji susu amo otohu ururou eto ji amita hatu iki tapa amo otohu aisuja. 17 Eto Israel embomeni ta ke amo ji ‘Olive’ da arahata iraguja amita ke ta humbuto puvuresona. Eto God na ji ‘Olive’ ta hatu sasapura amo jeto kahumbena eto ji ‘Olive’ ahoe ta amita hatu avo humbuto puvuto da ta ji ‘Olive’ amita ikenu kakambuketo ji susu ai ta indari javotoho te umo javotoho te ungo na indie ere papajikihova. 18 Te ungo ji hatu mahu kahumbari avo kogue sapura ke ijie ungo oenga na na avojo, eto ungo na ji susu amita degi indari ikae rate ji susu amo ke mahu God na Abraham ta degi ikari avoeto ungota degi indari ere ikihia. 19 Te ungo ke ereva amo ji hatu sasapura avo kahumbeto gosuketo dago avo ikehei kakambuketo mihera avoeto ungo na dago javotoho ke ereva 20 te kivujo enana amo God ke be ae avoeto kahumbena te ungo amo God ke be ijie humota eagova avoeto miheva te ungo ‘Na na’ avo, teho kogue irivujo, 21 eto hatu be amo tona avoeto ungo ahoe ‘Olive’ ta hatu na God toasova amo ungo te tapa toasuja. 22 Eto God amo osa ari embo eto memenga ikari embo avoeto ungo be hotembevujo, eto enana egikea amita degi memenga ikari embo rate ungo humota ururovo amo ungo simba aisuja te ungona toasova amo ungo tiukau irae aisova. 23 Eto Judea embomeni na jo haperekau God ke be ijie tunga humbuhuro amo God na humbuto ji hatu mahu kahumbena aita ikau kakambukasora, ari ainge amo God na ari inono be ra 24 amita be amo erevira, ungo enda nei embomeni amo ahoe ‘Olive’ avo humbuto da ‘Olive’ ta ikehei kambuheva amo uho ungota be mane ra te Judea embomeni amo da ‘Olive’ ta hatu be avoeto ehako humbuto ikau tohota uhu be aita kambasora.

25 Eto nau namei kamei, ke be vahai araha ta mane, ma ta ojikari avo nanena ano ingova uje ere ona amo ungo God na humbari ke ijie na na eagova avo eto ke erevi ano ingova erena, Israel embomeni huna amina God ta degi jo ngahia ue mihera avoeto enda nei embomeni God na humbau inono au 26 Israel embo nei huna God na oreketo humbasuja, amita ke amo einge kajari mihia, “Eto enana ta orekari embo amo tiri Zion ta eto puvuto Jacob ta embomeni na God ta degi tumo eagora avo au irae au 27 enana ta degi noma kaeto enana ta ari sasapura avo umbano irae aisuja” ke ainge God na ena. 28 Eto Judea embomeni na God ta duru javotoho avo ingari uje ae ue God ta degi kitoho ereora amo ungo enda nei embomeni avoembo ereora. Rate Judea embomeni ta ohihi mamahu amo God na kihi umbuna avoeto Judea embomeni amo embomeni amita ke ijie osa ere ua 29 amo mahu kihi hondate asi ke ijie humbuto noma kajena avoeto enana mane toasuja. 30 Eto ungo enda nei embomeni na God ta degi ari sasapura ere uaeheva ainge dombo Judea embomeni na eha oroho God ta degi ari sasapura ore ungona God ta jo ari avo kogue ere uhova. 31 Eto God na ungota degi jo ere ua avoembo iji ambota amo enana Judea embomeni God ta degi ari sasapura ereora avo God na jo au humbasuja. 32 Eto Judea embomeni te enda nei embomeni te tapa avo God na jo ururou hondate au kesora avoeto embomeni tapa na God ta degi ari sasapura ara tona.

33 Ajao, God ta javotoho ari te hotembari te kiari te, eva ta ukomo ainge peni vahai be eto God na embota ari sirikari amo embo na kiae ra eto God ta ari neite neite tapa amo embona kiari inono ae ra. 34 Eto embo amuna Bada ta hotembari kogue oje kahau? Embo na kogue ari inono ae ra. 35 Eto embo amuna God ta degi hande ikihirou hande mine ikau? Hande mine ikari inono ae ra. 36 Eto uhu ta donda te enda ta donda te tapa amo amita sovera te kiari te na umo oenga avoembo ena avoeto amita degi usasa daroho iresuja, amen.

<- Romans 10Romans 12 ->