1 Eto amita ambota ari einge puvei kehena. Amo Anera tapa 4 amina kaina ta pahina ta ihane ta eto sohe ta pambuto heheteto pisara enda ta pambaguja haekehere eva ta enda ta eto isibasi ta pambae toruhoi 2-4 Anera nei vahai amina God ta hajire avo ikehei amita ingeni na jigito ihane ta eto puvuto Anera tapa 4 amita degi ta ke peni vahai eto einge ijija “Ungota sovera na enda te eva te isibasi te sosou asi miheva te isapa simba ururovo ungote ungotenau God ta hajire erevi amita pure ari embomeni ta beo ta vahaikaro kakamba ai”. Ke ainge ei Israel ta ohihi javo tapa 12 amita embomeni tapa 144,000 ainge avo God ta hajire ikerekehera

5 Amo Judah ta embomeni tapa 12,000 eto nei Reuben ta embomeni tapa 12,000 eto nei Gad ta embomeni tapa 12,000

6 Eto nei Asher ta embomeni tapa 12,000 eto nei Naphtali ta embomeni tapa 12,000 eto nei Manasseh ta embomeni tapa 12,000

7 Eto nei Simeon ta embomeni tapa 12,000 eto nei Levi ta embomeni tapa 12,000 eto nei Issachar ta embomeni tapa 12,000

8 Eto nei Zebulon ta embomeni tapa 12,000 eto nei Joseph ta embomeni tapa 12,000 eto nei Benjamin ta embomeni tapa 12,000 aingeto God ta hajire beo ta ikehere umbera.

9 Eto amina ambota kehena amo embomeni isapamane be ehekari haiteko mane avo horuketo mihere kehena amo enda neite neite amita embomeni tapa ke neite neite tapa eto ohihi javo neite neite tapa amina puvuto avo arumba peni amita eto O Sheep Meni amita tihi buju ta horukehera amo bo parara kokoso aseto koropa iki jigiriketo mihie 10 ke peni vahai be eto einge ijiera “Embo oreketo humbari amo ungotenau God avo arumba peni ta arumbeto mihia amita degi mihia eto O Sheep Meni amita degi ta mihia”, ainge ijiera. 11 Eto Anera tapa na avo arumba peni te embo okokose te o vasiri te 4 amite avo jorereto veto gombuto God jakeka ijie 12 ke einge ijiera. “Aravora, jakeka ari te usasa te kiari te osa ari te Otohu ari te tihi jigari te sovera ari te avo ungotenau God ta degi daroho iroi, aravora” ainge ijio 13 embo okose vahai amina nau degi ta ahereketo ke einge eto ingija “Embomeni bo parara kokoso asari emo davo embore eto dainge eto puvere?” ainge ehei 14-15 “Mama, embomeni emo umo kiarira” ainge ehene ke mine jandireketo einge ehija. “Embomeni emina enda ta osaga memenga kesora iji puvuresuja ai ta eto puvuto enana ta bo avo O Sheep Meni ta orosa ta egehere parara ehija avoeto enana God ta degi otohu ai horeto iji mahainge avo arumba ta tihi buju ta God ta ke agi ue mihera 16 avoeto enana God na uhumo au umo beuje indari beuje mane kesora eto iji na mane evekau vevere kesora 17 te O Sheep Meni avo arumba peni ugorota mihia amina enana avo o simba arako ue enana urumbeto humbuto pambuto umo vasiri te kuru vihiuja ai ta au indiroro God na enana ta tihi sisivu tuhasuja”. Ainge ijija.

<- Revelation 6Revelation 8 ->