1 Eto Iesu na ke avo enu irae enu Galilee enda toto Judea ta enda tumo umo Jordan oiho ihane ta pambunu 2 embomeni isapamane amita degi puvuto amita ambure nei te nei te avo eo enu kokojekea.

3 Eto ai ta mihinu Pharisee embomeni nei uhoho na Iesu ke sokova aute eto kesi amita degi ke einge eto ingia, “Ungotenau ke pepeni ta amo do ainge mihei? Eto embo na teho uje na ae toasuja aravorete? Avo ejo ingore.” ainge eo Iesu na 4 “Iji eha be eha ta God na embo te evohu te ena amikote God na ke einge ena, 5 ‘na embo te evohu te ena avoeto embo na e mamo toto ae ga kaju eto oenga ra mane aisora te visi vahai aisora’ ainge God na eto amita ke ta kajena avo ungo kiaere? 6 Avoeto enana heriso mane rate vahai eagora ari avo God na eaguja eto God na kaju eto vahai aisuja avo embo na mane kaheketo ehako oengara aisuja.” 7 Ke ainge Iesu na enu enana Pharisee embomeni na ke einge eto ingia, “Rate embo na ae toasi uje ue kito ke avo embo tapa kiora ahari ta kaeto ikau kioro toto pambasuja, ari ainge avo Moses na do eto ara enu?” ainge eo Iesu na 8 “Eto Moses na ungo ae toari ta ke kajena amita be amo ungo ari javotoho ahe poekari avo ngahia be ra. Rate iji eha be eha ta embo te evohu te ari iji te ari ainge irae bera. 9 Avoeto nanena ungota degi erena. Embo amuna amita ae amo javotoho tiha mane eaguja rate embo amina evohu amo toto evohu nei jimbasuja embo amina evohu eha jimbasuja avoeto amina tiha aisuja,” ainge Iesu na enu Pharisee embomeni pahuo 10 amita ambotani ke einge ea. “Eto embo te evohu te tiha eagora avoeto amo javotohorami singa na kakara mane jimbau?” 11 amita ke mine re Iesu na einge ena, “Eto embo aka te ae iragora amo embo tapa ari mane vahai vahai na eagora. 12 Nei amo e na ingari ta eto bau ambura eto nei amo embo ta ingeni na bau kurukari avoeto mane aka te eagora. Eto embo nei amo God ta pure pere asi hotembihe akate mane eagora avoeto embo amuna ari ainge ari haite kito toau aisuja” ke ainge Iesu na ena.

13 Eto embomeni na Iesu na ingeni hamo ta tembihie pari aja enana ta meni undi humbuto puvuo amita ambotani na kito haekihe embomeni ta degi ke ngahia eo 14 Iesu na kito einge ena, “Tovujo meni isasaraho nau degi ta puvurore amita be amo God na tihi jigaguja degi amo meni isasaraho ta ari aingeko embomeni ta tohora.” ke ainge 15 eto amita ingeni siro ta tembenu irae enu ereto pambuna.

16 Iji vahai embo vahai amina puvuto Iesu ta degi ke einge eto ingina, “Ahe poekari embo, na irari datoho ta iresi ari javotoho do ano?” ainge enu 17 Iesu na, “Umo do eto nau degi ta ari javotoho jombure ue eto ere ingihe God vahai amo javotohora avoeto umo irari datoho ta iresi uje eto kito God ta ke tapa agi ejo.” ainge enu 18 “God ta ke deire agi ano” ainge enu 19 Iesu na mine einge ena, “Umo embo mane tao pehasuja, tiha paiha mane aisoa, pegene mane aisoa, embo nei ta ari ke be na perekari harikasoa, aja mama amo dombo ke ijie enana ta ke agi aisoa no hamo osa ere oa ainge dombo embo nei osa ejo.” ainge enu, 20 embo amina, “Na God ta ke erevi tapa agi eagona avoeto ari nei do ano?” ainge enu 21 Iesu na, “Eto umo embo javotoho asi uje ere oa avo no donda tapa ombuto koro humbuto donda ambu embomeni ta degi hande ao God na uhu ta hajae vajae no amo nununga aisuja. Ari ainge eto egerembeto na ambo ambo e,” ainge enu 22 embo eha amina ingito amita hajae vajae isapamane avoeto tunga osaga kogue Iesu toto pambuna. 23 Eto Iesu na amita ambotani ta degi ke einge ena, “Na ungota degi ke be erena, haja vajae embomeni na tunga osaga peni vahai kogue God na tihi jigaguja degi ai ta horasora. 24 Eto ke avo ehako erena, O javo camel amo peni vahai avoeto poma ho ta horeto pambari ngahia be ra te hajae vajae embo na God ta meni asi aisuja amo ngahia be ngahia ra.” ainge enu 25 amita ambotani na ingito mana mana ue ke be kesi einge eto ingia, “Eto hajae vajae embo na God ta meni ari inono ae kito embo amuna God ta meni au?” ainge eo 26 Iesu na enana tihi na jaseto kogue ke einge ena, “Embo amo ungo oenga God ta meni ari inono ae be ra te God na aisuja amo ari inono be ra.” ainge enu 27 Peter na ereto einge ena, “Kijo, dago donda tapa toto umo ambo ambo ere ora amo mine do umbaro?” ainge enu 28 Iesu na enana ta degi ke einge ena, “Na ungota degi ke be erena, enda eha uhu eha aisuja iji amina na Embo ta Meni na nau avo arumba peni usasa te ai urumbeto mihirono ungo nau apostel 12 na avo arumba tapa 12 ai ta arumbeto mihie Israel embomeni javo vahai tapa 12 avo tihi jigesova. 29 Eto tapa amuna bande te du te aja mama te meniundi te hajae vajae te tapa na embo toasuja amina donda ainge pere isapamane humbuto irari datoho iresuja. 30 Rate embo peni na ai ta embo teho aisora eto embo teho na ai ta embo peni aisora.”