1 Eto Iesu na ambotani ta degi ke einge eto ena, “Ungo osaga kiovojo, eto ungo God humota evujo, eto na humota evujo 2 eto nau Mama ta bande ta jo kaneke kaneke ari isapamane be mihia te bande jo neite neite ainge irae amo ungota degi ke mahu ano ingaeheva. Avoeto na pambuto ungota irari besi siriketo, 3 nununga eto ehako egerembeto puvuto ungo humbuto ungote tapa na iragona degi ai pambuto iresora. 4 Eto na pambagona degi amo ungo kiarira.” ainge Iesu na enu, 5 Thomas na ke mine einge ena, “Bada umo pambasoa degi amo dago kiaera te no pambari degi amo dago na kiari ke erea,” ainge enu, 6 Iesu na ke einge ena, “Eto na amo pambari degi te ke be te vasiri te avoeto embo na na tiumbeto Mama ta degi mane pambagora, 7 eto ungo na na ere kogova amo nau Mama te tapa ere kogova. Eto ungo na iji tapa kiagova eto eha oroho emo ere kogova,” ke ainge enu, 8 Philip na ke einge ena, “Bada, ejo dago Mama kito inono are,” ainge enu, 9 Iesu na ke mine einge ena, “Philip, na ungote iji koso mihovona te inena na kiae ke erea. Eto ungo na ere kogova amo Mama ainge dombo ere kogova rate inena Mama ano be kesi ke ere? 10 Eto na Mama ta jo ta mihena eto Mama jo nau ta mihia te umo ke be ae ue erete? Eto na ke tapa erena amo na oenga aera te nau Mama jo nau ta mihia amina pure amita avo eaguja. 11 Eto na Mama ta jo ta Mamo jo nau ta avo kogue ke be evujo. Eto avo ke be ae ue kito sinderi neite neite uore kiagova aita na ke be evujo. 12 Eto na ungota degi ke be erena, eto embo amuna na ke be aisuja amo nanena eagona ainge dombo ari neite neite aisuja. Eto na Mama ta degi pahurono embo amuna na ke be eaguja embo amina ari na eagona amo dembeto aisuja. 13 Eto nanena ano Mama ta javo peni aja ungo na javo nau ta penunu aisova amo ikasona. 14 Eto ungo javo nau ta do uje eto penunu aisova amo ikasona. 15 Eto ungona na osa ue kito amo ke nau tapa avo agi evujo.
Iesu na Ahihi Otohu ikasi onde ena
16 Eto na Mama ta degi ano ungota hondate ari embo ikau puvuto ungote daroho iresuja 17 amo ke be ari ta Ahihi avo enda embomeni teho kiae na mane humbasora te ungo ta degi puvuto jo ungota ta iresuja avoeto ungo na kesova.
18 Eto ungo hojo meni toarako mane aisona te na ehako puvuresona. 19 Amo iji isapa eto enda embomeni na na mane kesora te ungo na na kesova. Eto na vasiri te mihena ainge dombo ungona vasiri te iresova, 20 eto na Mama ta jo ta eto ungo jo nau ta eto na ungota jo ta avoeto iji puvuresuja amo ungona ari avo kito ke be aisova. 21 Eto embo amuna ke nau ingito agi aisuja embo amina na osa aisuja. Eto na osa aisuja embo amo nau Mama na osa ururou nanena embo avo kito osa ue ano na be kesuja,” ainge Iesu na enu, 22 embo Judas Iscariot mane rate Judas nei amina ke einge ena, “Bada, ke erea amita be mo deire? Eto enda embo tapa mane kiora dago pere ao kiora erete?” eto ke ainge enu 23 Iesu na ke mine einge ena, “Eto embo amuna na osa ue ke nau agi aisuja amo nau Mama na embo avo osa ururou dago na puvuto amita jo ta iresora. 24 Eto embo amuna na osa ae eaguja amina ke nau agi mane eaguja. Eto ke amo nau mane rate na ikari Embo ta ke ra.
25 Eto na ungote mihie ke erevi ungota degi erena 26 te ungota hondate ari embo Ahihi Otohu avo nau Mama na nau javo ta ikau puvuto ke tapa do erena amo harikau ungo na ehako hotembasova. 27 Eto ungota degi hande ere ikihena amo nau peka avo ungota degi iketo pambasona. Eto peka amo enda embo na mane ikahera te nanena ungota degi hande ere ikihena avoeto ungo joru ue osaga neite neite avojo.
28 Eto na pambuto egerembasi ke ehene ingeva amo Mama nau amo na aingeko mane embo peni be amita degi ere pambuhona, avoeto ungo na na osa ue amo tunga javotoho evujo 29 eto ari erevi puvurae kihi ta puvurou kito ungo na ke be ava erena. 30 Rate na ungota degi ke koso mane aisona te enda ta tihi jigari embo sapura puvuto ere hua amita ivo na na dembari inono aera, 31 te na Mama osa ere ona amo enda embo tapa kiora Mama ta uje tapa avo pere inono ta ere ona, te have ungote pambare,” ainge Iesu na ena.
