1 Eto ungo God ta osa ari meniundi avoeto God ta ari avo hamo eto evujo. 2 Eto Keriso na ungotena osa ue hamo amita avo God ta degi pene mune te avo ikihinu God na kito tunga javotoho ena avoeto ungota osa ari amina ungo tihi jigoja evujo.

3 Eto ungo God ta embomeni avoeto tiha pahia, sesena sasapura uje neite neite amina ungota irari javotoho avoeto ke sasapura eremina ungota degi mane ereto pajiresuja. 4 Eto nei ke tongopa ganini sasapura ainge amo ungona mane jigama aisova te God ta degi osa jakeka ari ta ke avo pere evujo. 5 Eto ungo kogova amo tiha paiha embo eto ari sasapura ari embo eto donda uje isapamane ari embo (amo donda na amita god eaguja) eto embomeni aingeko amina Keriso ta tihi jigari ta mane horeto God ta degi hotari humbasora. 6 Eto God ta ke agi ae ue ari avo ari embo ta degi God na tumo pajire be aisuja, avoeto embo amuna ungo ari sapura ainge ava ke sokova na jo kajasuja embo amita ke mane ingesova te 7 embomeni ainge avo tovujo oenga tinheto irore. 8 Eto ungo mahu mume ta irari embomeni rate Bada ta embomeni ueva amina usasa ta horiheva, avoeto usasa ta embomeni ta ari humbuto mihirovo 9 usasa ai ta amo be javotoho ekasuja amo ke sokova ai ta irae, ke be ari eto javotoho ari ekehija avo hambasova 10 avoeto ari deirami avo Bada na kito tunga javotoho aisuja avo pere evujo. 11 Eto mume ta ari amo be ambu avoeto ari ainge mane aisova te tovujo. Eto ari sapura evu araha ta puvurou embomeni kiore. 12 Eto enana ta ari ojikari ta eagora amo me kiari ta ari avoeto amita ke ijie me kiaehera. 13 Eto ari tapa humbuto usasa ta iketo kiagora amo ari amita tombu hajire be avo kiagora. 14 Amo usasa amina eoi ari tapa usasa eaguja amita ke amo einge kajari mihia, “Umo evari embo, pehari ta eto erao Keriso na no hamo ta gainhiro usasa aisuja”. Ke ainge mihia 15 avoeto irari ungota avo simba evujo, ungo kiae kiae embomeni mane ra, ungo kiari embomeni ra, irivujo. 16 Eto iji eha sapura avoeto ari jajavotoho deirami aisova avo jombure evujo. 17 Eto ungo uha irae embomeni na arako avojo te Bada na ungo do avo uje ere uo avo jombure evujo. 18 Eto ungo jae indito kava aisova amina ungo sapura aisuja avoeto ari avo toto Ahihi Otohu na ungo tihi jigoja simba evujo. 19 Eto ‘Psalms’ God ta ke ta kajari mihia amite eto haveni ototohu amite amita ke humbuto ke mine ara ijie jo tapa na Bada jakeka ijie evujo. 20 Eto Bada Iesu Keriso ta javota donda tapa eto ari tapa avoeto God Mamo ta degi osa evujo.

21 Eto ungo Keriso Otohu ere ova avoeto agi mine ara evujo. 22 Eto ungo airi na Bada ta ke agi eagova ainge dombo ungota ipone ta ke agi evujo. 23 Eto Kerisona hamo amita na ekalesia orekena avoeto tihi jigaguja ainge dombo ungo ipone na airi tihi jigivujo. 24 Avoeto ekalesia na Keriso ta ke agi eaguja ainge dombo ungo airi na ipone ta ke agi inono ta evujo. 25 Eto ungo ipone ta degi erena, eto Keriso na ekalesia osa eto hamo amita avo ikihe pehena ainge dombo ungota airi osa evujo. 26 Eto Keriso na amita duru javotoho eto amita bapataito ari umo amina amita ekalesia egeto hande javotoho be God ta degi ikena. 27 Eto ainge ena amo amita ekalesia amo sago kiari javotoho be sapura tongopa tapa irae donda javotoho be avo nau hande ra ijie umbuna. 28 Eto embo na ae osa eaguja amo hamo amita avo osa eaguja avoeto ungo embo na hamo ungota osa eagova ainge dombo ungota airi osa ava erena. 29 Eto ungo kogova amo embo na hamo tohota avo uje ae ari iraerate embo tapa na totohota hamo osa ue indari indie simba eagora, eto ari ainge dombo Keriso na amita ekalesia simba eaguja. 30 Eto ungotena amo Keriso ta hamo amita utukoho hamo uhu ra. 31 Eto God ta ke kajari ta amo ke einge mihia, “Eto embo na avoembo amita emamo toto pambuto ae ga kajueto amiga visi vahai aisuja” 32 ainge mihia te na kogona amo Keriso te amita ekalesia te ta timu hatirari ke rate 33 avo pere mane rate ungo ipone na hamo ungota osa eagova ainge dombo airi osa ururovo airi na ipone humota aisora amita ke ra.

<- Ephesians 4Ephesians 6 ->