Acts 9

Iesu na enu Saul ta jo haperekena

(Acts 22:6-16; 26:12-18)

1 Eto Saul na Iesu ta ambotani tau pehara ke ngahia kaikari ijie Priest ta embo okose amita degi ahari penunu eto humbuto pambuna. 2 Eto amina embo te evohu te Iesu ambo ambo ere uahera avo humbuto Jerusalem tipura ta ikasi Damascus Judea embomeni ta God jakeka ari bande tapa amita embomeni ta degi ahari avo ikasi degi ta pambuto 3 da auvihinu usasa peni vahai be uhu ta eto tanini eto puvuto Saul ta hamo ta kajenu 4 Saul na vurereketo enda ta veto ke einge ingina, “Saul, Saul, umo do eto nau degi ta memenga kaikari ere ikihe?” ainge enu 5 ingito ke mine einge ena, “Bada umo amunure” ainge enu, “Na Iesu ra umo nau degi ta memenga kaikari ere ikihea. 6 Ereto heteto da ta pambuto na ke do asona avo ingesi simba ejo.” 7 eto embo Paul ga pambua amo ke avo ingia te embo ta tombu avo kiae avoeto ke ae teho mihio 8 Paul ereto hetenu tihi hirikena te be kiae unu embona ingenita jigito humbuto pambuto da Damascus ta puvua. 9 Eto Paul tihi sapura enu be kiae ue indari te umote indae mihinu iji 3 irae ena.

10 Eto da Damascus embo amo Bada ta ambotani ta degi God na ehure ta ke einge ena, “Ananias” ainge enu, “Bada do ere?” ainge enu 11 Bada na, “Degi javo ‘Jihukari’ Judas ta bande ai pambuto embo vahai amina nau degi ta penunu eria 12 amita javo Saul da Tarsus embo na ehure ta embo javo Ananias na ingeni hamo ta tembihei tihi mume avo javotoho oi kehija avo eto ai pambuto embo avo jombure eto kijo,” ainge enu 13 Ananias na ke mine einge ena, “Bada embo amina Jerusalem Ekalesia embomeni ta degi ari sapura peni vahai eaguja avo duru ingena. 14 Eto amina priest okose ta degi ke humbuto embomeni tapa na Iesu ta javo ta penunu eagora avo humbuto tipura ta ikasi ehija,” ainge enu 15 Bada na ke mine jandireketo einge ena, “Umo pambu, embo amo nau hondate ari embora eto nau javo humbuto enda ta embomeni tapa kings te Israel embomeni te ta degi ke hande asuja 16 eto embo amo nau javo humbuto hande ururou embo na taro memenga kesuja eto do ainge amo ano kesuja,” ainge ena. 17 Eto Ananias na Judas ta bande ta pambuto horeto Saul ta hamo ta ingeni tembeto ke einge ena. “Nau namei Saul umo ei ta puvutohoe Bada Iesu na degi nau ta puvija eto amina na ikehei puvuto no tihi ano javotoho ururou Ahihi Otohu na no jo enetasuja.” eto ainge enu 18 umo o ta hamo ain ainge tihi ta venu usasa kogue ereto hetenu bapataito 19 eto indari indie sovera ari umbuna.

Saul na da Damascus ta ke hande ena

Eto Saul na iji tuho Damascus jo ta Iesu ta ambotani ga mihahija 20 eto amina sau sau ihiketo Judea embomeni ta God jakeka ari bande tapa amita embomeni ta degi Iesu amo God ta Meni be ra ainge ijie ke hande ere uahija. 21 Eto embo tapa amita ke ingito ke mine ara einge eto ingia, “Embo amo mahu Jerusalem jo ta Iesu ta javo jigama ari embo ta degi sapura uija aravo rete? Eto amina embo andito priest okokose ta degi ikasi puveija amo ke be rete?” ainge 22 eo Saul na ke ngahia na Iesu Keriso puvija amo ke be ra ainge Damascus ta Judea embomeni ta enu ke mine ari inono ae ea.

23 Eto amita ambota Judea embo na Saul taro pehaja uje ea 24 ke avo Saul na ingina eto enana da amita degi pe tapa ai ta Saul tasi iji te mume te simba ere uahera 25 rate Iesu ta ambotani na Saul handija ta juruketo mumete huga otoho ta ikeo oiho ta veto pambuna.

Saul na da Jerusalem ta pambuna

26 Eto Saul na Jerusalem jo ta pambuto Iesu ta ambotani mamahu amiga vahaita asi uje ena rate Saul amo ambotani mane ke eto joru eto uje ae ea. 27 Rate Barnabas na Saul humbuto apostel ta degi pambuto Bada Iesu na Damascus degi ta puvuto Saul ta degi ke enu ingito Damascus jo ta Iesu ta ke sovera eto hande ena avo ambotani ta degi enu ingia 28 eto Saul na ambotani ga mihie Jerusalem jo ta ihiketo pambuto joru ae ke sovera eto Iesu ta javo ta enu ingia 29 eto amina enda Greece ta Judea embomeni ga ke mine ara ijinu Saul taro pehaja uje ea, 30 avo amita namei kamei na ingito Saul humbuto Caesarea ta pambuto ikeo Tarsus ta pambuna.

31 Eto amita ambota enda Judea te Samaria te Galilee te amita ekalesia na iji jamo jamo te kogue mihahera. Eto Ahihi Otohu na enana ta degi ikerekenu sovera ari te tunga javotoho te mihie God joru ue ekalesia peni vahai ea.

Peter na da Lydda te Joppa te ai pambuna

32 Eto Peter na enda tapa isa ue pambuto da Lydda ta ekalesia embomeni kesi pambuto 33 popora embo javo Aeneas amo jua tapa 8 herekari ovohina mihahija avo kito, 34 “Aeneas umo Iesu Keriso na ere kojihia ereto no donda sirikejo” ainge enu Aeneas erena. 35 Eto da Lydda te da Sharon te ta embomeni tapa avo kito Iesu Keriso ta ambota ambota ea.

36 Eto ambotani evohu vahai javo Tabitha eto javo nei Dorcas amina da javo Joppa ta mihie donda ambu embo ta degi ari javotoho ue hondate ere uahija, 37 eto evohu amo ambure humbuto pehenu amita hamo egeto bande jo i ta ikeo herekena. 38 Eto Peter amo da Lydda Joppa ta engihita puvuto mihinu Joppa ta ambotani na duru ingito embo heriso ikeo puvuto Peter jage eto, “Umo sau sau hae.” ainge eo 39 Peter na enana ga pambuto bande i ta vihito jo ta horenu evohu dodoru na joeketo si ijie mihimihe donda ambu embo ta degi hande ikasi Dorcas na bo kembari avo ikeo kito 40 Peter na enu arahata pahuo paunge teteri eto pari eto jandireketo evohu pehari amita degi einge ena, “Tabitha umo ere,” ainge enu tihi hiriketo Peter kito ereto arumbenu 41 Peter na ingeni ta jiginu ereto utu na hetenu ambotani te evohu dodoru te avo jage enu jo ta puvuto evohu pehari vasiri te erena avo kia. 42 Eto da Joppa embomeni tapa na duru avo ingito God ke be hotembea. 43 Eto Peter na da Joppa embo o hamo pure ari embo javo Simon amiga iji koso mihahija.

<- Acts 8 Acts 10 ->