1 Eto Priest Peni na Steven ta degi einge eto ingina, “Ke erera amo ke be rete?” ainge enu 2 ke mine einge ena, “Mamahamane te apahamane te ke nau ingivujo. Ungotenau ohihi Abraham enda Haran ta pambae enda Mesopotamia ta mihinu God usasa te puvuto 3 Abraham ta degi ke einge ena, ‘No embomeni te enda te avo toto enda nei avo ano kito ai pambujo’ ainge God na enu 4 ingito enda Chaldea toto Haran ta pambuto mihinu Abraham mamo pehenu ‘Ungota enda ei ta egerembeto puvujo’ ainge God na enu puvuna. 5 Rate God na enda amita ei ta peni te isapa te ikae avo eto Abraham ta meni irae rate emita meniundi na enda erevi umbara ke ena. 6 Eto God na amita degi ke ehako einge ena, ‘No meniundi na enda nei ta pambuto iresora eto jua 400 amita jo ta no meniundi na enda nei embo ta degi pure eto hamo memenga kesora, 7 rate amita ambota na no pure ta memenga ikari embomeni ta degi osaga ikasona. Eto no meniundi na enda avo toto enda ei ta puvuto na jakeka asora,’ ainge eto 8 God na Abraham ta degi asivo na kakamba ari ikena amo amita ke mahu ari ingari amita hajire avo ikena. Eto Abraham ta ae na meni Isaac ingenu iji eight irae enu asivo na hamo kakamba ena eto Isaac pajito amita meni Jacob ta hamo kakamba ena eto Jacob na amita meniundi 12 avo kakamba ena, amo ungotenau ohihi ra. 9 Rate Jacob ta meniundi 11 na enana ta namei Joseph amo embo javotoho avo eto tumo eto irae aja uje eto ombuto koro humbuto ikeo Egypt ta pambuna. Eto God na Joseph ga mihie 10 Joseph ta osaga kito hotembari te kiari te ikenu Egypt ta King Pharoah na Joseph amo siro meni kiari meni avo kito osa eto amita bande peni te enda te avo tihi jigoja ikena.

11 Eto ga veae enu beuje iji peni vahai be Egypt enda ta Canaan enda ta puvunu mamahamane indae tumbae eo embo tapa osaga peni vahai be kia. 12 Eto Jacob na Egypt enda ta indari mihinu duru ingito amita meniundi ungotenau mamahamane avo ikenu Egypt enda ta pambuto indari humbuto puvuto indio irae enu 13 ehako pambuo Joseph na, ‘Na ungota namei Joseph ra’ ainge eto harikena, eto Joseph na amita namei kamei avo Pharoah ta degi enu kina.

14 Eto amita ambota Joseph na ke enu amita mamo te namei kamei te eto amita embomeni tapa 75 ainge Egypt enda ta puvua. 15 Eto puvuto Jacob te ungotenau ohihi te Egypt enda ta pepehekeo 16 hamo humbuto pambasi nununga ea amo enda Shechem amita panga ho avo Abraham na embo Hamor ta meniundi ta degi koro na ombuto humbari ai ikaro sari ara nununga ea. 17 Eto Egypt ta iji koso be mihahera God na Abraham ta meniundi ta enda ikasuja avo iji puvutuhunu ungotenau Judea embomeni Egypt enda ta peni vahai ea. 18 Eto Egypt enda ta King nei amo Joseph kiae puvuto Egypt tihi jigina. 19 Eto amina embomeni ta degi ari sapura be ue meni eha ingihiore ke ijioi humbuto ere gosukihahera.

20 Eto amita iji te Moses meni be avo e na ingeto mamo ta bande ta simba unu hariga 3 irae enu Pharoah na eoi gosukeagona arahata pambuto ojikenu 21 Pharoah ta iae na hambuto kito humbuto ‘Meni nau asuja’ ainge eto simba enu 22 pajito Egypt enda ta school ta pambuto kiari peni humbuto pure embo eto ke embo ena.

23 Eto Moses ta pajirari jua tapa 40 irae enu amita Israel embomeni Egypt embomeni ta pure ere uahera avo Moses na kogue umoro unu 24 Egypt embo na Israel embo torunu kito Moses ta jo memenga enu mine Egypt embo vahai tenu pehena. 25 Moses avo God ta hondate ari meni avo amita Israel embomeni hondate aja ikena avo enana mahu kiari ke ena rate enana kiae. 26 Eto evito Israel embo heriso mine tara uo Moses na oje kahari ke einge ena, ‘Embomeni ungo namei kamei ra do eto mine tara ere ove?’ Ainge enu 27 jujune embo vahai amina Moses mimiketo ke mine einge ena, ‘Embo amuna umo dagota embo okose eto tihi jigoa ke ehei, 28 iji nei umo Egypt embo vahai tehe pehehija eto na tao pehanote?’ ainge enu 29 Moses na ingito joru enda nei Midian ta pambuto mihimihe akate eto ve heriso ikena.

30 Eto jua nei tapa 40 irae enu Moses na tiri javo Sinai amita engihi ojagatambu ta pahunu ji perimbeto vihina 31 avo kesi auveto amita jo ta Anera kito mana mana enu Bada na amita degi ke einge ena 32 ‘Na no mamahamane ta God eto Abraham ta Isaac ta eto Jacob ta God ra’ ainge enu Moses na joru ue tatatata ue kiari uje ae eto tombu togena 33 eto Bada na amita degi ke ehako einge ena, ‘Umo enda otohu ta heteto mihea, no utu goru houke. 34 Eto nau embomeni Egypt enda ta osaga ere humbuhora avo ere kogona eto enana memenga kogue jajavone ere ingihena avo eto ano arahata pambasora. Aravora Egypt ta ikano pambaerena hae.’ ainge God na ena. 35 Eto embo nei mane Moses avo amita embomeni na kito uje ae eto ke einge ea, ‘Umo amuna dago tihi jigoa ikehei?’ ainge ea. Rate God na Moses na embomeni tihi jigoja ikena ke avo Anera na ji peri jo ta puvuto God na embomeni humbuto arahata pambaja ke ena avo ena. 36 Eto amina Egypt ta eto kihi humbuto pambuna eto Egypt jo ta eva javo pangari eto ojagatambu jua tapa 40 amita jo ta ari neite neite uoi embomeni kito vani vini ere uahera. 37 Embo nei mane Moses avo amita Israel embomeni ta einge ena, ‘Rate ungota meniundi ta eto embo 38 vahai, avo peroveta na ainge dombo God na ikau puvuresuja,’ ainge ena. Eto ojagatambu ta Israel embomeni ungotenau mamahamane ga mihio God ta ke otohu vasiri te daroho irari avo Anera na Moses ta degi puvuto ikenu avo eha jigama ere ora. 39 Rate ungotenau mamahamane na Moses ta ke agi ae eto enda Egypt jo enu egerembeto pambasi uje ea, 40 avoeto Moses ta namei Aaron ta degi penunu einge ea. ‘Moses dainge pambei, avo dago kiaera avo eto dagota gods nei ejo dago kihi humbuto pambare’, 41 eto enana o cow meni ingeni na ove eto amita degi pondo ue pene ikea. 42 Eto God na kito uje ae eto tonu hariga te kuro te avo jakeka ere ijiahera. Ke amo peroveta na mahu book ta einge kajari ra. ‘Israel embomeni, ungo jua tapa 40 ojagatambuta o teto nau degi ta pene avete? 43 Ainge ae ungo na ungota god Moloch ta jakeka ari horoma geriketo humbuto ere pambuhaheva eto ungota god Rephan ta kuro ove eto jakeka ere ijiaeheva avo eto ungo enda Babylon oiho ta ikano pambuto iresova,’ ke emo God na enu peroveta na kajena. 44 God na Moses ta degi amita irari temple daingeto aro avo enu ingito bo na gerikea 45 avo ungotenau mamahamane na humbuto ojagatambuta ere pambuhahera eto ambota Joshua na temple avo humbuto ungotenau mamahamane te kihi humbuto enda ta ere uahija enda asa embomeni avo God na enana ta tihi ta ohimbena. Eto temple amo enda ai ta David ta iji te mihahija. 46 Eto David amo God ta tunga humbari meni eto amita mamo Jacob ta God amita Temple be koro na ari ikasi uje eto God ta degi penunu ena, 47 rate amita meni Solomon na God ta Temple gerikena, 48 rate God Sovera te amina bande embo ta ingeni na ari ai mane iraguja te God ta ke amo peroveta na einge kajena, 49 ‘Eto uhu i amo nau arumbari eto enda amo nau utu tembari avo eto nau irari bande daingeto avo, eto nau jangu indari arara dainge avo 50 uhu ta enda ta donda tapa amo nau ingeni na ari rete o ae re?’ Ke avo God na enu peroveta na kajena. 51 Eto ungo eha miheva sarika embomeni, ungo ta jo tongopa te oje susujukari te ra eto ungota mamahamane na Ahihi Otohu agi ae ere uahera eto ainge dombo ungo na ere ova. 52 Ungota mamahamane na peroveta tapa ta degi ngahia uore osaga ere koguahera eto peroveta nei nei na javotoho ari embo puvuresuja ainge ijiore ungota mamahamane na peroveta toruore pepehekihahera avo eto ungo na javotoho ari embo hariketo teheve pehehija. 53 Eto God ta ke pepeni otohu amo Anera na ungota degi ikena rate ungo na agi ae ra.”

54 Steven na ke ainge enu Sanhedrin horukari embomeni na ingito ti kambuo kiroro kiroro ena, 55 rate Steven Ahihi Otohu na enetenu tihi i ta eto God usasa te Iesu God ta ingeni be ta heteto mihinu kito ke einge ena, 56 “Kivujo uhu pe hirikehei Embo ta Meni, God ta ingeni be ta heteto mihia.” ainge enu 57 embomeni na ke avo ingari uje ae eto oje susujuketo jajavone peni vahai eto pambuto 58 Steven jigito goruketo da arahata humbuto puvuto koro na tea. Eto torue enana ta bo houketo embo Saul ta utu ta tembea. 59 Eto enana avo ere torua avo Steven na God ta degi pari einge ena, “Bada Iesu nau ahihi umbujo” ainge ijie 60 paunge na veto teteri eto javone einge ena, “Bada, enana ta ari sapura evi hotembeto tojo” ainge ijie veto pehena.

<- Acts 6Acts 8 ->