1 Eto Paul te tipura embomeni nei uhoho te aingeto Rome ta ikara ke eo na Luke enana ga pambasi uo tipura embo tapa avo Rome ta isoro embo javo Julius amo Rome ta embo okose ta isoro kihi humbari embo vahai amita ingeni ta ikea. 2 Eto e nga da Andramyttium ta eto puvuto Asia Province da nei nei ai ta pambasi unu kito vihito pambua. Eto enda Macedonia ta da Thessolonica ta embo vahai javo Aristarchus na dago ga pambuna. 3 Eto eva ta pahuo iho vujenu da Sidon ta puvuo embo Julius na Paul kito osaga eto enu arahata pambuto amita namei kamei kogue amita uje tapa avo ena. 4 Eto da Sidon toto e nga ta pambuhumihe pisara peni vahai be kito tiuka Cyprus tiumbeto jamo ta pambuto 5 province Cilicia seriketo pambuto province Pamphyllia seriketo pambuto da Myrna province Lycia eva tihi ta hetea. 6 Eto ai e nga vahai da Alexandria ta eto puvuto da Rome ta enda Italy ta pambasi unu dago simba ari embo na kito enu dago ai vea. 7 Dago iji heriso pahue pisara peni vahai avoeto osaga kogue pambuto da Cnidus avo auviho pisara tihi hena ta puvutuhunu e nga bende jandireketo pambuto tiuka javo Crete amita tutumo Salmone jamo ai kito tiumbeto 8 kaina hena tiuka hora ta pahue pisara avo eto pambari ngahia ue umo joremba jamo jamo ari javo ‘Safe Harbor’ da Lasea engihi ai horea. 9 Eto iji koso be mihie iji javo Atonement mahu irae eto ga iji ihikenu pisara te eva vasiri peni vahai unu pambari ngahia be enu 10 Paul na hotembeto ke einge ena, “Na ere kogona mo ungotena pambasora amo embo sasari ururoro e nga te donda tapa amo sapura asuja avo na ere kogona,” ainge ena 11 rate isoro embo dago tihi jigina amina Paul ta ke agi ae eto e nga ta mamo te tari jigari embo te ta ke agi ena 12 amo eva vasiri ari iji te ai irari sapura avo eto embo isapamane na joremba javo Phoenix tiuka Crete ta pambasi uje ea. Eto joremba Phoenix amo ihane hena ai eva vasiri ari iji te irari javotoho mihahera.

13 Eto pisara isapa kaina hena ta puvunu embomeni na kito tunga javotoho eto pambasi ke eto e nga jigari avo jigio vihinu Crete ahone hora ta ihiketo pahuo 14 pisara ivo peni vahai javo humburu ombo ta eto puvuto eva ta veto puvunu 15 embo na e nga jigito bende na pambari inono ae enu sio degi nei ta pambuna. 16 Eto pambuto tiuka isapa javo Cauda kaina hena ai eva ivo isapa unu kito e nga isapa avota handukari avo pure ngahia be ue humbuto gaga ta iketo tigia. 17 Eto e nga esi peni na punduto pambuhumihe enda Libya ta hora ai e nga teto pejeuja joru eto bo jigio venu e nga sio degi nei ta pambuna. 18 Eto pambuto evito pisara te eva te vasiri jamo ae enu e nga jo ta donda humbuto eva ta gosukea 19 eto iji nei e nga jigari donda huna avo humbuto eva ta gosukea. 20 Eto pisara peni vahai jamo ae enu iji isapamane amita jo ta kuro te hunjara te iji te kiae avoeto eheheto pambari inono ae enu dago sari asora avo hotembea.

21 Eto embomeni na iji koso donda indae uo Paul na ereto ke einge ena, “Ungo ke nau agi eto Crete toto pambaheva amo ungo sari aheva te ungo ke nau be ingito hamo ngahia evujo ungo mane sari asova 22 te e nga avo pejasuja amita be amo na God ta toho eto na God jakeka eagona 23 amita Anera na mumete nau degi ta ke einge ehei ingena. 24 ‘Paul, umo joru aojo umo Rome ta embo okose ta tihi ta hetasoa. Eto embomeni umo te mihera avo God javotoho na au mane sari asora.’ ainge Anera na ehei ingena 25 avoeto embomeni hamo ngahia evu God ta ari amo na kiarira avo eto ke ehija ainge dombo asuja 26 avoeto ungotenau e nga tiuka nei amita hora ta pambuto tasuja,” ainge Paul na ena.

27 Eto dago mume tapa 14 ainge eva Mediterranean ta hamo ta vihito veto tiroki koheki ue siosao pambuhumihe mume orohuta e nga tari jigari embo ombo ta puvurari ke hotembeto 28 esi na donda bouka avo handuketo eva ta gosukeo vena amita heka tapa 40 meters avo kito amita ambota heka nei amo 30 meters avo kia. 29 Eto enana e nga koro ta teaguja hotembeto e nga jigioi hetaguja “Anchor” tapa 4 ainge avo e nga ta handuketo ikeo venu iho sausau vujaja hihine ijio 30 e nga tari jigari embo na oenga pambasi e nga isapa avo bujeketo ikeo venu e nga ta jigari bende ta avo handukasi ke eto ahe kihira uo 31 Paul na kito isoro embopo te enana ta tihi jigari embo ta degi ke einge ena. “En nga tari simba ari embo pahuroro ungo tapa sasari asova,” ainge enu 32 isoro embo na e nga isapa amita esi avo tiukeo veto oenga pambuna.

33 Eto iho unga vihito hunu Paul na enana indari indora ke einge ena, “Ungo mume tapa 14 indari indae miheva 34 avo indivujo eto ungo mane sari aisova eto ungo mane memenga kogue osaga humbasova,” 35 ainge eto Paul na bread humbuto God ta degi peketo bread periketo indinu 36 embo tapa kito hamo ngahia enu bread humbuto india. 37 Eto dago embo tapa 276 e nga jo ta mihia amina indari indio inono enu 38 e nga ejeha aja indari huna eva ta gosukea.

39 Eto iho vujenu e nga tari jigari embo na ombo amo mahu kiae avo eto ombo avo kito mana mana ea. Eto eva joremba hora javotoho kito ai eto kito aro e nga hora ta vihito hetaja hotembeto 40 e nga jigari amo tiuketo eva ta kororo eto venu tari ta esi amo tiukeo gogora enu bo e nga bende ta jigio vihinu pisara na puvuto tihi hena ta kajenu pambuhumihe 41 eva orohuta hora vihari ai ta e nga bende na hora ta vahaikenu eva piri peni vahai puvuto e nga avo tenu pepejekihinu 42 isoro embopo na tipura embo veto daveto pambari ke hotembeto tipura embo taro pepehekara 43 ke eo isoro ta tihi jigari embo na Paul tunga humbuto teagora hotembeto haekena. Eto tihi jigari 44 embo na ke enu umo davari embo amo umo daveto pahuo embo nei umo davari kiae amo ji tutuho e nga pejena avo humbuto ji ta jigito hora ta pambua. Eto dago tapa memenga osaga kiae teho hora ta pambua.

<- Acts 26Acts 28 ->