1 Roman embo ta army Captain vahai javo Cornelius amina Caesarea ta amita ae te meniundi te amita bande ta irari embomeni aingeto mihie 2 God jakeka ijie Judea embo donda ambupu avo hondate ue pari ere uahera. 3 Eto iji vahai hure 3 o’ clock God ta Anera na Cornelius ta degi puvuto ehure ta, “Cornelius” ainge enu, 4 Cornelius na kogue joru ue, “Bada umo do ere?” ainge enu Anera na, “No pari te no donda ambu embo ta degi hande ikari te avo God na jene ae ere kogua 5 avo eto no embo ikejo pambuto embo javo Simon Peter umbare. 6 Embo amina Simon o hamo pure ari embo eva tihi ta amiga mihia.” ainge eto 7 Anera pahunu Cornelius na amita pure embo heriso eto amita army pure embo vahai aingeto jage enu puvuo 8 ehure ta do kina avo hihi tirinu ingio ikenu Simon Peter humbasi da Joppa ta pambua.

9 Eto iji nei enana puvutohumihe da Joppa auviho iji orohuta Peter na bande ita vihito pari ere umihe 10 beuje enu indari agihio ehure ta kina 11 amo uhu pe hirikenu bo peni vahai avo pekihi ta jigito humbuto vea. 12 Eto bo amita jo ta o neite neite o koso o te di te tapa kogunu 13 God na, “Peter ereto o teto heveto indijo.” ainge enu 14 Peter na “Bada, na o sasapura, indahu o avo mane indagona,” ainge ena. 15 Eto God na ehako einge ena, “Eto nanena do ano javotoho asuja avo inena sapura ke mane asoa,” ainge 16 eto ke vahai avo iji nei heriso nei vahai enu bo peni amo ehako uhu ta vihito pambuna. 17 Eto Peter na ehure ta do kina avo hotembihe mihinu Cornelius ta embo ikena amo puvuto Simon o hamo pure ari embo amita bande daingere avo eto ingito pambuto bande pe ta heteto, 18 “Simon Peter ei miheite?” ainge eto ingia. 19 Eto Peter hotembihe mihinu God ta Ahihi na puvuto ke einge ena, “Simon, embo 3 na umo kesi puvera, 20 veto kito mane nei do asoa te enana ga pambujo amo nanena ikehene puvera,” ainge enu, 21 Peter na veto embo ta degi, “Ungo do uje eto puvuto na jombure ere ove?” ainge enu 22 embo na, “Dago Captain Cornelius na ikehei puvera. Embo amo embo javotoho eto God joru eaguja avo Judea embomeni na embo avo osa eagora eto Anera Otohu na amita degi puvuto umo amita bande ta pambuto ke ao ingesi ehei puvera,” ainge eo 23 Peter na ingito enu bande ta vihito arumbeo umoro umihe 24 evito iho vujenu Peter te Joppa ekalesia embomeni te enana ga egerembeto puvuto 25 degi ta evito ereto puvutohuo Cornelius na amita javo vahai embomeni te namei kamei te embo simba ara enu vahaita puvuto simba mihio enana puvua. Eto Peter na bande jo ta horenu Cornelius na Peter ta utu ta humotepain ue venu 26 Peter na, “Umo ereto hete, na embo tehora,” ainge enu ereto hetena, 27 eto Peter ga ke mine ara ijie jo ta horeto embo isapamane vahaita arumbeto mihia avo kito 28 enana ta degi ke einge ena, “Ungo kiagova amo dago Judea embomeni ta ke pepeni amo enda nei embo ga mane umoro eagora avo ungo kiarira rate God na embo tongopa te sapura ke mane aisora rate embo tapa inono inono ara ehei ingena 29 avoeto na jage eheve ke nei do ae teho tambueto puvena rate ungo do eto na jage eheve puvena amita ke be avo ingesi uje ere ona.” ainge enu, 30 Cornelius na ke mine einge ena, “Iji 4 amita kihi ta iji 3 o'clock hurete nau bande ta pari ue mihene embo bo usasa te amina nau tihi ta heteto 31 ke einge ehija, ‘Cornelius, God na no pari ere ingihia eto donda ambu embopo ta degi hondate ere oa avo ere kogua 32 eto embo Simon Peter da Joppa embo Simon o hamo pure ari embo eva engihita iraguja amiga mihia avo jage ejo puvuroi.’ ainge Anera na ehei 33 ingito embo ikehene pambuto umo ehere ingito sau sau nau degi ta puvea amo javotohora. Avo eto dago jo vahai eto God ta tihita puvuto mihera rate God na no degi ta ke do au ingito ejo ingore.”

34 Ainge enu Peter na ihiketo amita ke ena, “Na ere kogona amo Judea embomeni vahai avo pere mane God na osa eaguja 35 rate enda tapa ta embomeni vahai vahai na God joru eto humotepain ururoro God na kito osa asuja. 36 Eto Iesu Keriso, embo tapa ta Bada ta degi pekari te tunga humbari mihia amita ke avo God na Judea embomeni ta degi ikihija. 37 Eto ke amita ikari iji te John na Galilee enda ta ihiketo embo bapataito ari ke hande uija eto amita ambota Israel enda ta ari tapa do uija avo ungo kiarira. 38 Eto God na Iesu Nazareth embo amita degi Ahihi Otohu te sovera te ikihei popora embo kojihe Satan ta sovera na jo andirari avo hondate uija amita be amo God amiga mihia avo eto. 39 Eto amina Judea embomeni ta enda ta eto Jerusalem jo ta do uija tapa amo dago kiarira. Eto enanana ji atahu ta tehere pehena 40 rate iji 3 irae ehei God na ehei vasiri te erihija 41 eto embomeni tapa na Iesu kiae rate God na embo ke hande ara sirikihaja amina koguera. Eto amiga indie mihere 42 dago do asora amina ke tapa ehei ingihera amo embomeni tapa ta degi ke hande asora amo God na Iesu ta degi embo pehari te vasiri te amita ari siriketo hajire ikau kesora 43 rate peroveta na ke kajena amo embo amuna Iesu be hotembeto amita jo aherekasuja amita ari sasapura Iesu na hotembeto toasuja.”

44 Ke ainge Peter na ijinu ingito embo tapa ta degi Ahihi Otohu na puvuna. 45-46 Eto God na amita Ahihi Otohu enda nei embomeni ta ikenu ke neite neite ijie God jakeka ijio Judea embomeni Peter ga puvua amina vani vini ea. Eto Peter na einge ena, 47 “Embo emo umo na bapataito asora amo amuna haekau? Enana dago ainge dombo Ahihi Otohu umbera.” 48 ainge eto amina Iesu Keriso ta javo ta bapataito ea, eto Peter na enana ga iji isapa umoro ena.

<- Acts 9Acts 11 ->