2 Timothy 4

1 Eto God ta tihi ta eto Iesu Keriso amo puvuto embo peharite vasiri te amita ari siriketo humbuto enana ta king eto tihi jigesuja amita tombu ta inena erevi ae erena. 2 Eto God ta ke embomeni ta degi hande ejo. Eto iji javotoho te eto iji sapura te ke hande asi nununga ejo. Eto ekalesia embomeni na sapura ururoro kito inena no ke na haeketo ejo javotoho are. Eto ke javotoho ejo ingihe sovera ari umbare. Eto inena embomeni avo mane toasoa te kogue ahe poekejo. 3 Eto erevi ao ingora erena amita be amo iji puvurou embomeni na God ta ke be ingari uje ae ue ungota ujeje sasapura avo ue ke gamo avo aro ingesi ahe poekari embomeni isapamane siriketo humbasora 4 amina ke be avo ingari uje ae ue oje sujuto ahereketo hihi sokova avo ingesora. 5 Eto umo iji tapa no siro jigama ue memenga puvuresuja amo sovera ejo. Eto God ta ke javotoho avo hande ue no ekalesia ta pure avo ejo inono ai.

6 Eto God ta pene ikari gaga ai ta wine overeketo God ta degi hande ikagora aingeko dombo nau pambari iji puvei hamo nau God ta degi hande ikasona 7 eto na isoro javotoho ehena, eto huhevari ta javotoho ehena, eto na God toae humota ere ovona. 8 Avoeto ari javotoho ari ta siro kope avo nununga ari mihia avo, embo sirikari embo javotoho, ungotenau Bada amina iji kombu te humbuto na kogombasuja amo na pere mane rate embo amuna Iesu ta puvurari simba ere ovora amite tapa kogombasuja.

Ahari tutumota ke ena

9 Eto na embo tapa na toto pambari avoeto umo sau sau nau degi ta puvujo. 10 Eto embo Demas amo enda ta ari osa isapamane ue na toto da Thessalonica ta pambuhoi eto embo Crescens na enda Galatia ta pambuhoi eto embo Titus amo enda Dalmatia ta pambuhoi 11 eto Luke na vahai namote mihia, avoeto embo Mark amo pure nau hondate ari inono avoeto Mark humbuto puvujo 12 eto embo Tychicus amo da Ephesus ta ikehene pambuhija. 13 Eto nei amo nau pohukari bo amo da Troas embo Carpus ta degi toa avo humbuto puvujo. Eto peni be amo nau o hamo ta ke kajari amite nau books te aingeto humbuto puvujo. 14 Eto embo Alexander amo auri pure ari embo amina nau degi ta ari sapura be uija amo Bada na mine au kesuja 15 eto embo amina ungotenau ke avo ingito tumo eto jujune uija avoeto umo te tapa embo avo be kijo.

16 Eto na kihi koto ta ganoka ehera amo na hondate ari embo amo joru ue puvurae ehera amita degi Bada na memenga mane ikasuja evo erena 17 eto Bada vahai na namote mihie sovera ari ikehei humbuto amita ke tapa avo enda nei embomeni ta degi ingora hande ehena. Eto na o lion ta pe ta oreto humbija 18 ainge dombo ari sapura te isoro te nau degi ta do puvuresuja amo Bada na oreto humbuto ere uma iji puvurou tihi jigari degi uhu i ta ikau iresona. Eto usasa te daroho amita degi iroi, Amen.

Eto embo pekena

19 Eto evohu Priscilla te amita ivu Aquila te embo Onesiphorus ta embomeni te ere pekihena. 20 Eto embo Erastus amo pambae da Corinth ai ta mihia, eto Trophimus ambure humbei da Miletus ai ta toto puvena. 21 Eto jajemo iji puvurae ua emikote umo mahu sau puvujo. Eto ungotenau namei kamei embo Eubulus te Pudens te Linus te Claudia te enana tapa na umo ere pekihera.

22 Eto Bada na no jo ta iresuja. Eto amita hondate ari ungota degi iroi.

<- 2 Timothy 3