1 Eto nau meni umo Iesu Keriso ta hondate ari na sovera ari humbuto 2 embo isapamane ta tihi ta ehene ingiha avoembo God ta pure ari haite amita degi hande ejo ingito embo nei nei ta ahe poekaro ingito umbare. 3 Eto dago na ere ora ainge dombo Iesu Keriso ta isoro ari singa eto no degi ta ngahia puvurou kito sovera ejo. 4 Eto embo na isoro asi pure humbasuja amo enda ta ari neite neite avo mane hotembasuja te amita isoro ta tihi jigari embo amina kito tunga javotoho aja aisuja. 5 Eto ke nei amo huhevari embo na ke agi ae ue sio huheveto dembasuja amina siro ta kope kogombari mane hoteto humbasuja. 6 Eto embo amuna pure ngahia eto donda ve kovasuja amo embo amina donda kihi humbasuja. 7 Eto na ke erena avo be hotembejo eto Bada na au be kesoa.

8 Eto be hotembejo, Iesu Keriso amo peheto vasiri te erena eto Iesu Keriso ta ohihi amo King David ra. Eto na God ta ke javotoho erevi embo ta degi hande ereona 9 avoeto na enda ta ke peni poekari embo ke ijie chain na tigere osaga te memenga te tapa mihena te God ta ke avo chain na tigaera 10 avoeto God na siriketo humbija embomeni avo Iesu Keriso na oreketo humbuto au usasa ta daroho irora ivo eto mihie pure ereona. 11 Eto ke erevi amo ke be perera. Eto Keriso ga ji atahu ta pehihera amo Keriso ga tapa vasiri te iresora. 12 Eto ivo eto iresora amo Keriso ga tihi jigesora. Eto Keriso egikasora amo Keriso na ungotena egikasuja. 13 Eto ungotena Keriso humota ae asora te Keriso na humota ue amita ke avo mane toasuja.

14 Eto ke erevi mahainge kaiketo ejo ingore. Eto ke be mane avo ijie boru ere jumbuhora avo Bada ta tihita haekejo. Eto ari ainge ere ora amo be mane amina ke ingari embo ta hotembari sapura eaguja. 15 Eto no vasiri iketo pure ururo God na kito nau pure embo be ra ke ainge aisuja eto umo God ta ke be avo kiari embo aisoa avoeto umo mane me kesoa. 16 Eto enana God kiae ue hihi tirihie ere pambuhuma sapura be aisora avoeto umo hihi tirari aingeko avo tojo. 17 Eto enana ta ahe poekari sapura masa te sigeto pambaguja 18 amo embo Hymenaeus te embo Philetus te na ainge ue ke be avo toto pahue embomeni ta degi ke einge eagora “Embo peheto vasiri te erasora amo mahu puvuto pambari ra” ke ainge ijie embomeni ta degi ahe ere poekihere embomeni nei nei God humota eagora amo ere toruhora. 19 Rate God ta ekalesia amo sovera te mihia amita hajire amo einge kajari ra, “Eto Bada na amita embomeni amo kiarira” eto “Embo tapa amuna Keriso amo nau Bada ke aisuja amina ari sasapura mane aisuja te toasuja.”

20 Eto embo ta irari bande amita jo ta amo donda nei ‘gold’ na ari eto nei ‘silver’ na ari amo daroho irari donda eto bande vahai amita jo ta amo donda nei ji te ovu enda te na ari amo pejeuja eto sari eaguja. Eto kihi amina pure javotoho eagora te ambota amina pure sapura eagora 21 eto ainge dombo embo na ari sasapura tapa avo toto pure javotoho ari embo eto otohu ue bande mamo ta pure ari donda javotoho arako ue God ta pure javotoho tapa amo amita degi ari inono be aisuja. 22 Eto meni singa na ari sapura asi uje eaguja aingeko avo toto javotoho ari, humota ari, osa ari peka humbari avo eheheto ejo, eto Bada ta degi jo javotoho na pari eagora embomeni na ari ainge amo eagora. 23 Eto embomeni na sarika ue ke be mane hotembari na ijie tumo uore jujune puvaguja amo umo kiari avoeto tojo. 24 Eto Bada ta pure ari embo na jujune mane aisuja te embo osa ue embo ta ari sasapura hotembeto toto ahe poekasuja. 25 Eto amita degi ngahia ari embomeni enana tunga jamo jamo te ahe poekihirou God na au enana ta jo haperekaute au pambuhuma amita ke be avo kesora. 26 Eto embomeni amo Satan ta uje avo ara vage ikari avo God ta ke avo kito hotembari javotoho humbuto Satan ta vage amo toto pambasora.

<- 2 Timothy 12 Timothy 3 ->