1 Eto nanena, “Na, na” ijie ungota degi ke ehako anote? Eto amita heta javotoho mane puvuresuja avo kogona te Bada ta ke nau degita harikihoi ehureta kiarako uena avo ungota degi ano ingivujo. 2 Eto Keriso ta embo vahai nanena kiari amo jua 14 irae ehija amita ihikari ta embo vahai amo God na humbuto uhu i be ta pambuna amo hamote visi te na pambunute hamo visi pehena pambunu amo na kiaera te God na vahai kina. 3 Te embo vahai amo hamote rete hamo ambu re amo God na vahai kina 4 embo amina uhu i God ta irari degi aita pambuto ke jajavotoho avo ingina te God na haekari avoeto embo na ke avo mane harikasuja 5 eto na embo amita javota nane ke aisona te “Na na” oenga amo ivo irae ke avo aisona. 6 Eto na ke nau be avo humbuto, “Na, na” ahena amo ke be avoeto na me mane kiaehena te na embo peni rete isapa re avo embo ta hotembari na aerate nau ke te arite avo embona kogue na embo peni rete embo isapa re avo ara uje ere ona avoeto nanena, “Na, na” mane aisona.
7 Eto na degi javotoho aita pambuto ari jajavotoho neite neite kehena avoeto na embo peni ke ijie one God na nau degita ambure vahai ikehei Satan ta pure embo na arako kaikari ereona avoeto na embo peni ke mane eagona 8 avoeto na ambure kaikari eagona avoeto iji 3 ainge Bada na humbau irae aja pari uenate 9 Bada na ke mine einge ijija, “Eto na no ambure avo mane umbano irae aisuja te iji vahai vahai na umo hondate aisona amo inonora te umo ivo ambu embo ururo ivo nau avo no degita ikano peni vahai aisuja,” ke ainge ijija avoeto Keriso ta ivo avo nau degi ta iroja ivo nau irae avoeto tunga javotoho ue, “Na, na” aisona. 10 Eto ke avoeto nau ivo ambuari embo ta isembari, hamota tari, ahumbari neite neite Keriso ta javota kiagona avoeto aita amo nau degi ta sovera ari puvaguja.
Paul na Da Corinth embomeni avoembo osaga kina
11 Eto na siro sapura ari embo na arako ue ke erevi ere kajihena amo ujekari ungota avoembo ereona te ungona osa ue ke be aheva amo na ke einge emo mane kajaehena te ungo be kivujo, ungota apostel sokova amo peni, na isapa arako manera. 12 Eto na apostel be amita hajire pepeni neite neite avo ungota degi one ungona iji koso be kogueva 13 eto nanena ungo avo ekalesia nei uhoho amiga inonora ainge ene ungona kogovete? Eto kogueva amo na ekalesia nei uhoho amita degi koro humbuhenate ungo nei nei amita degi amo koro umbae amina ehei inono ae ari ke erevete? Avoeto ari nau kito hotembeto tovujo. 14 Eto na ungota degi iji heriso mahu pambuhena te eha emo ehako pambuto ungota degi umoro ue ungona ari ngahia nei do ava ke mane aisona. Eto na ungota degi pambuto humbasi uje ereona amo ungota koro mane rate ungota osa ari. Eto erena amo meni isasaraho na enanata e mamo mane unduagorate emamo na meniundi simba ue unduagora. 15 Avoeto na ungota degi ta pambuto ungo hondate ururono nau koro te hamo te amo jigama ano irae aehija. Eto na ungo osa peni vahai ereona avoeto ungona na mine osa isapa be aheva.
16 Eto na ungota degi pambuto mihio na undiheva aita osaga nei do hambae rate embo nei na eagore ingagona amo nanena ungota degi pambuto ke gamo poekari ke na ene ingihava 17 amo ke hande ari embomeni ungota degi ikehene pambuhera amina ungo ke gamo na poekae 18 eto na Titus pambaja ijie ungotenau namei vahai amiga ikehene pambuhija avoeto Titus na ungota degi ke gamo na poekae rate ungona kogova amo Titus te namote amo ari vahai ahihi vahai amina eagora.
19 Eto dagona ke ere kajihera avo ungona dago embo jajavotoho ke ava kajari ke ijie ere hotembihevete? Eto nau namei kamei, ke amo ainge ae rate God ta tihi eto Iesu ta javota ungo avoembo ke emore ere kajihera. 20 Eto na ari vahai erevi joru ere ovona amo na aita pambuto ungota irari nei avo kogurono ungona na kogue amo ngahia embo ke aisova avo na joru ere ona. Eto nei amo jujunete, embo nei ta donda uje ari te humote, embo kahekarite, javo ari sapura arite, ke sokova hande arite viso orongote, vasiri siosao arite, tapa avo aita hambanote avo na joru ere ona. 21 Eto na ungota degi pambasona amo ungo nei nei na tiha paiha te sesena sasapura te hamo ta ujeje sasapura neite neite amo mahu ere ovova avo toae avo na God ta tihi ta me kesona avo joru ere ona.
