Luke 19

Embo Zacchaeus na Iesu kesi uje ena

1 Eto Iesu da Jericho jo ta toreto pahunu 2 tax umbari embopo ta okose javo Zacchaeus amo donda embo 3 amina Iesu do aingere avo kesi uje ena rate embo avo tuhoaupa avoeto embo isapamane na titiha eo jateto kiari inono ae enu 4 Iesu pambasuja degi ai ta kiti tutuveto pambuto i boro i ta bitito mitinu 5 Iesu na puvuto arerembeto kogue ke einge ena “Zacchaeus, umo beto hae. Na mume eha emo no bande ta evesona.” ainge enu 6 Zacchaeus sausau beto tunga javotoho ue Iesu umbuto amita bande ta pahunu 7 embomeni na kito ujeae ue ke einge ea, “Iesu do eto ari sapura embo amita bande ta evesi ere oi?” ainge ea. 8 Eto Zacchaeus na ereto heteto Bada ta degi ke einge ena “Bada kijo, na nau donda tapa avo heriso kateketo vahai avo donda ambu embopo ta degi hande ikasona. Eto embo ta koro ke sokova na ijie pegene uhana amo einge ue ikasona. 1 kina uhana amo 4 kina ikano egerembasuja 2 kina uhana amo 8 kina egerembasuja 10 kina uhana amo 40 kina egerembasuja” ainge enu 9-10 Iesu na ingito ke einge ena, “Embo ta Meni na God ta embomeni maine pambari avo jombure eto umbasuja avoeto Abraham ta ahije eremite bande vahai eremita embomeni amite avo God na oreketo ere uhua.” ainge ijinu

King na pure embopo ta koro ikena amita timu hatirari ke

(Matthew 25:14-30)

11 Ingihe einge hotembea Iesu avo Jerusalem auvetija amo pambau God ta titi jigari avo sausau puvuresuja avo hotembitio 12 Iesu na kito timu hatirari ke na einge ena, “Eto embo vahai peni amina amita enda ta king asi sovera ari umbasi enda nei ta pambasi ue 13 amita pure embopo tapa 10 ainge jage enu puvuo embo vahai vahai amita degi koro tapa 100 ainge ikereketo ke einge ena, ‘Na pahurono ungo koro emina pure eto koro nei tahurovo puvuresona,’ ainge eto pahunu, 14 tohota da vahai embomeni na embo avo enana titi jigoja uje ae ue embomeni nei uhoho na embo aravo taekara ikeo ambota pambua. 15 Rate embo amo king aisuja amita sovera umbuto egerembeto puvuto enda titi jigiha amita pure ara koro ikena embopo jage enu puvuo ‘koro hamo ta doinge umbeve?’ ainge enu 16 pure embo vahai amina embo ta titi ta imite heteto ke einge ena, ‘Bada, no koro 100 amina pure etena amita hamo ta amo 1,000 tambena erevira,’ ainge enu 17 amita degi einge ena, ‘Umo pure embo javotohora. Umo koro isapa amina pure javotoho etea avoeto avo da pepeni tapa 10 simba aisoa.’ ainge ijinu 18 embo nei puvuto ke einge ena, ‘Bada no koro 100 amina pure etena amita hamo ta amo 500 tambena erevira,’ ainge enu 19 ‘javotohora, umo da pepeni tapa 5 ainge avo ano simba aisoa’ ainge 20-21 eto embo nei puvuto ke einge ena, ‘Bada umo embo ngahiara, umo mine ikae teho mine vahai umbuoa, eto umo be urae rate teho kahumbeoa avoeto umo joru ue no koro 100 ikita amo pure ae teho togeto ondikitane iriuja erevira umbujo’ ainge enu 22-23 ke mine einge ena ‘Umo pure embo sapura avoeto pe no na umo eonga pehumba ere oa. Eto na embo ngahia avoeto mine ikae mine vahai umbuona be urae rate teho kahumbeona ke erea amo matu kiari kito amo nau koro avo umbuto bank ta ikao nau koro nei hamo ta ikaro irirou puvuto umbaetena’ ainge eto 24 embo nei engitita heteto mitina amita degi ke einge ena ‘Embo emita koro tapa 100 ikitane pure ae toari iriuja avo umbuto embo nei pure eto koro 100 uhaja amita degi ikejo.’ ainge enu 25 ‘Bada, embo amita degi koro peni vahai 1,000 ainge mitia’, ainge eo 26 ke mine einge ena, ‘Ungota degi erena, embo amita degi ari javotoho ta mine mitirou kito amo God na mine nei hamota ikasuja rate embo ta degi ari javotoho irae kito God na embo amita degi do mitia avo umbau irae aisuja rate 27 na enana ta king eona uje ae etera embo amo nau kitoho avoeto umbuto huma nau titi ta tevujo amburore’.” ainge ena.

Iesu Keriso Judea embo ta hondate ari embo avo da Jerusalem ta torena

(Matthew 21:1-11, Mark 11:1-11, John 12:12-19)

28 Eto ke ainge enu irae enu Jerusalem pambasi degi ta bivitie 29 da heriso Bethphage te Bethany amo tiri javo olives temo ta kogombari avo auvitie amita ambotani heriso avo ikau pambuto o donkey meni umbara ikasi ue 30 ke einge ena, “Ungo pambuto da degi ovitiho amita pe ta o donkey meni handuketere mitia amo meni avoeto ai ta isa mane eora avo bujeketo umbuto puvuvujo. 31 Eto embo na ‘Ungo do eto donkey meni ere bujekiteve?’ ke ainge aro ingito ungo na einge evujo, ‘Bada na jigama asi uje ere ua’,” ke ainge ara enu 32 pambuto Iesu na o donkey meni ke ena avo tambuto 33 bujekasi uo o mamone na kito “ungo do eto nangota o bujekasi ere ove?” ainge eo 34 “Bada na jigama asi uje ere ua” ainge eto umbuto 35 Iesu ta degi puvuto enana ta bo hamo ta asari avo houketo o hamo ta besi tirito Iesu ohimbeto umbuto o hamo ta ikeo arumbeto 36 degi ta pahunu embomeni na bo nei nei hamo ta pohukari avo hoheto degi ta besi titirikeo haito pambuna. 37 Eto tiri Olives bitito ovitiho ta beto da auvitio Iesu ta ambotani tapa na itiketo osa osa ue God jakeka ue Iesu na ari do ere uatija avo jajage eto 38 einge ea, “Ungotenau king Bada ta javo ta puvuto ere hua avo God na javotoho ari ikau Utu i ta peka te usasa te iroi!” ainge ijio 39 Pharisee ari embopo embo ta ugoro ta mitia amina “ate poekari embo, ejo no ambotani ke erera avo toare” ainge eo 40 ke mine einge ena, “Eto enana ke toasora amo atara tapa ei mitera amina ke gagaha eto aisora” ainge ena

Iesu da Jerusalem avo embo si ena.

41 Eto Jerusalem jota torasi ue Iesu na da kogue si ijie 42 da amita embomeni avoembo ke einge ena. “Peka umbari avo eha kiova uje ere ona te peka umbari avo ungota titi ta ondikarira te 43-44 God na ungo puvuto kesi iji ikari avo puvija te ungo na kito kiarako eteve seniketo ere pahua avoeto iji puvuresuja amikote no kitoho na degi tapa ta eto puvuto umo joeketo umbuto da te da ta meniundi te tapa avo taro iraesuja. Eto atara nei na atara nei amita hamo ta mane tembasuja te tapa jaseto beasuja.” ainge ena.

Iesu na temple jo ta torena

(Matthew 21:12-17, Mark 11:15-19, John 2:13-22)

45 Eto Iesu na temple jo ta toreto donda na ombuto koro ere uhua embopo avo kurumbenu pahuo 46 ke einge ena, “Ke kajari ta amo nau bande eremo pari ari bande aisuja, ainge mitia rate ungo na eteve pegene embo ta bande ere ua,” ainge eto 47 Iesu na iji vahai vahai ainge temple jo ta toreto embomeni ate poekena rate priests pepeni te ke pepeni kiari embopo te embo ta okokose te na Iesu naingeto umbuto tasora avo hotembea 48 rate embomeni isapamane be Iesu ta ke ingesi onde popoga ture eto ingihe mitia avoeto Iesu umbari inono ae ena.

<- Luke 18 Luke 20 ->