1 Eto ungo meni isasaraho ungo Keriso ta toho avoeto emone mamone agi ari ta jata mane aisova te agi aisova. 2 Eto God ta ke 10 Moses ta ikenu kajena ai ta ke vahai amo embo na agi ururou javotoho ari amita degi puvuroja God na onde ena amo erevira “No aja mama avo Otohu ue ke agi ejo” ke ainge mitia eto javotoho ari God na onde ena amo eingera 3 “Eto ke agi ururovo God na au irari javotoho ue iji koso enda ta iresova” ainge God na ijie onde ena. 4 Eto ungo emamo ta degi erena, amo ungota meniundi na ungota degi tini kambari eora avo kaiketo mane isembasova te Keriso na embomeni ate poekena ainge nombo ue onde katitie ate poekavo ari jajavotoho na pajirore.

5 Eto ungo embo nei ta ke agi ue pure ari embomeni ta degi erena amo ungota pure mamone amo Otohu ue ungota jo te tapa na enana ta ke agi evujo, amo ungona Keriso ta ke agi eova ainge inono ta enana ta ke agi evujo. 6 Eto enana na ungo koguroro jakeka ari ta pure mane aisova te ungo Keriso ta pure ari embopo avoeto God ta uje avo jo tapa na eova ainge nombo enana ta ke agi evujo. 7 Eto jo tapa na pure ngahia asi ue embo avoembo mane aisova te Bada avoembo asi hotembevujo. 8 Eto ungo kogova amo embo nei ta pure embo rete tohota pure embo re amo Bada na ari jajavotoho tapa kogue mine inono ta ikau umbasora. 9 Eto ungo pure titi jigirikari embopo ta degi ke erena amo ari javotoho ainge amina ungota ke agi ari embopo ta degi evujo. Eto enana tasi ke mane aisova te titi jigari embo enana ta eto ungota amo utu i ta mitia amita titi ta amo embo nei peni embo nei isapa ainge manera te embo tapa inono inonora.

10 Eto ke tutumota erena amo Bada ta sovera umbuto irivujo. 11 Eto Satan ta ke gamo ta degi isoro asi Bada ta ki emi te isoro donda te umbuto asevujo. 12 Amo ungotena embo bisi te amita degi isoro ae rate mume ta titi jigirikari Ahihi neite neite eto mume ta sovera neite neite amo Satan ta isoro ari embopo Ahihi sasapura ta irari degi ta isoro eora amita degi isoro ereora 13 avoeto God ta ki emi tapa umbuto asuketo nununga evujo. Eto ari sapura puvuresuja iji te amo isoro ue mane beasoa te sovera ari umbuto heteto iresova. 14 Avoeto isoro embo na pupuri tigito euja aingeko God ta ke be jigito heteto irivujo, eto ungota jenge ta asukari amo javotoho ari na oreka aisuja. 15 Eto ungota utu goru amo God ta peka ta duru javotoho avo tehue hande asi uje evujo. 16 Eto God tumota ari amo beha aingeko ungo oreka ururou Satan ta ki bevere te amina ikau puvuto ungo mane kajaro evekasova. 17 Eto ungo God na oreketo umbasuja amo ungota siro kope ainge hotembevujo eto God ta ke Ahihi Otohu na ikasuja amo isoro asivo aingeko avo ikau umbuto jigivujo. 18 Eto iji tapa ari tapa avoembo pari evujo amo Ahihi ta sovera na kaiketo pari ue siro pure eto God ta embomeni tapa hotembitie enana embo pari evujo. 19 Eto God na nau degi ta ke ikau ingito amita duru javotoho matu ondikari avo joru ae ue embo ta degi hande ana pari evujo. 20 Amo na amita ke hande ari embo ‘chain’ na tigere mitena te na embo joru ae ue sovera ari umbuto ke hande ana God na pari avo uje ere ua.

21 Eto Bada ta ke agi ari embo javotoho ungotenau namei Tychicus amina ungota degi pambuto ke nau eto ari nau na do ereona amo amina au ingesova 22 Avoeto ungota degi ikano pambuto dagota ke avo au ingito sovera ari umbasova.

23 Eto God Mamo te Bada Iesu Keriso te na ungo namei kamei ekalesia tapa ta degi pekari te osa ari te tumota ari te avo ikaro umbasova 24 Eto jo tapa na Bada Iesu Keriso osa eora embomeni amita degi God ta hondate ari iresuja.

<- Ephesians 5