1 Eto siro sapura ari embo na keko ke isapa aisona amo ungo ingovote? Eto na ere kogona amo ungo ke ano ingesova, avo ere kogona. 2 Eto God ta hotembari vahai avo nanena hotembitie ungo amo embona pegene umbuora segigi ue mitovona. Eto ungo ekalesia amo Keriso ta kerari avoeto na kakara ta mamo aingeko eto ungo tongopa ambu teho javotoho na mitirovo nanena ungo Keriso ta degi ikasona. 3 Eto o koso o na pamone Eve ta degi ke sokova na enu sapura ta bena ainge nombo ungo embota hotembari sasapura na aro ungota siro sapura au amo Keriso osa ari te tumota ari te avo toto pambuova simba ue mitovona. 4 Eto nanena kogona amo Iesu nangona umbuto puvua avo mane rate Iesu nei amite Ahihi nangona umbuto puvua avo mane rate ahihi nei amite eto duru javotoho hande uera avo mane rate duru nei umbuto hande eora avo ungona ingihe aita porere mane pambuova. 5 Eto apostle sokova ungota degi puvuto ke eora avo embo peni, na isapa ke ainge avo nanena mane aisona 6 Eto na enana aingeko ke gamo na hande ari embo manera te nau degi ta amo God na kiari peni vahai be ikena amo ungote mitie ke hande etene ingihava avoeto ke avo ungona ke be ari inonora.

7 Eto na ungota degi pambuto God ta duru javotoho hande uena amita mine na umbae ari amina ungo jigene eritava te ainge uena amomo ari javotoho umitanete mo ari sapura umitane? 8 Eto na ekalesia nei nei amita koro avo pegene arako eto jigama ue ungota degi pure amo uena. 9 Eto na ungote mitie amo nau ujeje tapa do puvuna amo na ungota degi bouka nei do ikae rate ungota namei kamei enda Macedonia ta eto puvua amina na undua eto na ungota degi ombari asari ta eto bouka ikae mitovona ainge nombo bouka mane ikasona. 10 Eto Keriso ta ke be amo nau jota mitia avoeto amita hamota ke erevi erena amo enda Achaia ekalesia na ke nau erevi mane taekasora. 11 Eto na ungo osa ae avoeto koro umbae ari ke ijie hotembitevete? Na ungo osa ere ona amo God na ere kogua 12 Eto ke sokova ari embopo na nau pure vahai embo ke ijie koro umbasi pure eora avoeto na ke avo taekitie na ungota koro mane umbasona. 13 Eto embo aingeko amo apostle be mane rate pure sokova ue Keriso ta apostle ke ijie eora 14 Eto na enana ta ari avo kito jeneki honeki mane aisona te enana ta ari amo Satan na anera usasa te ke ijie isa euja. 15 Avoeto amita pure ari embopo na amita ari vahai avo ue ari jajavotoho ta pure ari embopo ke ijie ke sokova na eora. Avoeto enana ta pure eora amita iji tutumota amo God na hana kiari ikau kesora.

16 Eto na ke ehako erena amo na siro sapura ari ke mane aisova te siro sapura ari embo ta ke ingito ingarako uore eora aingeko simba ururovo ke nau avo ane. 17 Eto ke nau avo “Na, na” ijirono ingesova amo Bada na mane aetija te na siro sapura ari embona keko aisona 18 amo enana apostel sokova na enda embo tapa na enana ta ari amita ke eora aingeko nanena aisona. 19 Eto ungona dago tupo embora eova te siro sapura ari embomeni ta ke sau be ingiova 20 Amo ungo tupo embo sira ove apostel sokova na puvuto ate poekitore ungona ke agi ue kajumba ue ke tapa avo agi ue age ungota na timbuto indarako ereova. 21 Eto nangona ungota degi kiti pambuto ke sokova na ate poeketene ungo na na kajumba ue age ungota na timbuto indarako aeteva avo nau degi ta me kiari nombo be ra. Eto na siro sapura ari embo na keko ijie ke erevi aisona amo enana na ke ijie “Na, na” eora amo nangote tapa na ke amo “Na, na” ari inonora. 22 Eto enana amo Hebrew embopo rete? Namote tapa Hebrew embora, eto enana amo Israel embopo rete? Namote tapa Israel embora. Enana amo Abraham ta meniundi rete? Namote tapa Abraham ta menira. 23 Enana amo Keriso ta pure ari emboporete? Namote tapa Keriso ta pure ari embora te ungo ere kogova amo nau hotembari javotoho avo toto “Na, na” ijie erena te nau ari tapa amina enana nembari avoeto erena amo pure ngahia eona eto nei amo na tipura ta ikeora eto nei amo na teore memenga kiona eto iji nei nei amo na amburari ahumpa eona 24 Eto Judea embo na iji tapa 5 rate iji vahai vahai amita jo ta na ejembeto tea amo tapa 39 ainge toruera 25 Eto iji 3 amo ituha na toruera eto iji vahai amo atara na toruera eto iji 3 amo na e nga ta pahone e nga teto pejeo, iji vahai amina na iji vahai mume vahai eva ta daveto pambua. 26 Eto na enda tapa ta isa eona degi aita amo umo muenga ta degi osaga kiona eto degi ta embo teto pegene eora aita osaga kiona eto enda nau embomeni ta ingeni ta enda nei embomeni ta ingeni ta osaga kiona eto da jota eto degita eto eva hamota pahue osaga kiona, eto nei amo nau namei ke eora amita degi osaga kiona. 27 Eto nei amo na pure ngahia ue evae eona, eto nei amo indari te umo te na beuje uoi teho mitovona eto nei amo bo ambu eto jajemote avo kiona 28 Eto ari tapa amita hamota amo iji vahai vahai ekalesia avo hotembu hotembu ue iriona, 29 eto ekalesia embo vahai na ivo ambu euja amo na osaga kiona, eto embo vahai na engekari ta beuja amo na osaga kiona.

30 Eto na “Na, na” asona amo nau sovera ta ke avo mane aisona te ivo ambu ta ari avo ungo na kiova ari vahai erevi aisona. 31 Eto ke erevi aisona amo ke be pere avo Bada Iesu ta Mamo God daroho jakeka aisora amina ere kogua avoeto ke emo ke be pere erena. 32 Eto na da Damascus aita pambuto mitio King Aretas ta gavana na na andito umbasi amita isoro ari embopo ikenu da tapa joeketo mitio 33 nau namei kamei na na umbuto hambija peni vahai aita juruketo otoho ta ikeo da tambuta beto kiae pambua.

<- 2 Corinthians 102 Corinthians 12 ->