1 Eto, nangota namei kamei, ke nei amo ungo naingeto God ta uje avo ue iresova avo nangona ungota degi ate poekitare ingito ambo ambo ereova eto ari avo be jigito kogoeto ava jo tapa na Bada Iesu ta javo ta erera. 2 Eto ungo ari do jigama ava Bada Iesu ta javota ikitara amo ungo kiarira 3 amo ungo God ta toho ue otohu ava uje ere ua avoeto tiha paiha avojo. 4 Eto ungota ae jimbasova amo nombo be ra ainge ijie otohu ue 5 God kiae embomeni na ungota hamo ta ujeje avo hotembitie eora ainge avojo. 6 Eto ungota namei ta ae amo amita avoeto namei ta degi sapura avojo.

Eto ke peni be ungota degi matu ijiena amo eto ungo na ari sapura erena erevi ainge aisova amo Bada na ungota degi hana kiari ikasuja. 7 Eto ari tongopa sasapura ara siriketo umbae rate ari otohu ue amita toho ara God na umbuna. 8 Eto God Ahihi ikari embo amina ungota degi Ahihi Otohu ikeuja avoeto embo amuna ke erena erevi peive euja amo embo ta ke mane rate God ta ke avo peive euja.

9 Eto nangota namei kamei. Ungo osa mine ara ava God na ate poekitia avoeto ke nei nanena mane kajasona, 10 eto ke be amo ungota namei kamei enda Macedonia jo ta avo osa ere ova te nau namei kamei, ari avo jo tapa na ava penunu erera. 11 Eto irari no avo umo eonga tunga iketo eto kogoeto simba ue tunga jamo jamo te irivujo. Eto ungo na ava ijiera ainge nombo ungota ingeni na indari umbari pure ue embo nei ta degi penunu ae ururovo 12 embo nei ekalesia ta kaju ae mitera amina ungo kogue jakeka aisora.

13 Eto dagota namei kamei ungo ke erena be ingova uje ere ora amo enana Iesu ke be ijie ambuvujekea embomeni amita degi do puvuresuja avo aro ingihe God ke be ae embomeni na osaga peni vahai kogue sisi sasi eora ainge nombo eova aro ingova erera 14 amo Iesu ambuto vasiri te erena avo ke be erera eto ainge nombo embo ambuvujekari amo God na Iesu ta degi au ingito au vasiri te eraro amiga tapa puvuresora. 15 Eto Bada na ke ena avo ungota degi erera amo ungotena vasiri te mitiroro Bada egerembeto puvurou embomeni ambuvujekari avo kiti vasiri te erasora. 16 Eto God ta anera peni amina jajage ijirou God ta huin hukitirou Bada na utu i ta eto beto puvuresuja. 17 Eto Keriso ta javo ta ambuvujekari embomeni kiti ereto pahuroro ungotena vasiri te enda ta irari embopo amite tapa avo God na sau eto umbuto oje ta ikau ojega tapa i ta bitito Bada utu i ta tambuto Bada ga tapa daroho iresora 18 avoeto ke erena erevi ke mine ara eto ingihe tunga javotoho evujo.

<- 1 Thessalonians 31 Thessalonians 5 ->