1 Hino, tulongele niki? Bhuli, tughendelele kutenda ulemwa ngati umaha ghwa Chapanga ghuyonjokeheke kyanalumu? 2 Aka kaa! Kiyaha tama ya kutenda ulemwa kuhwegha nkati yetu, hinu twaaghendelela bhuli kangi kutama mu ulemwa? 3 Mana mungumanya kukita twenga twabhoha bhatubatisitwe tulihanga na Kilisito Yesu, tukibatiswa na kulungana kwa kiho kyake. 4 Patubatisitwe tukililunga naywo mu kiho kyake, tukikulilwa papamu naywo, ngati handa bhula Kilisito pakahyukite kwa ukulu ghwa Tate, twenga bhubho tuhotole kulama mu ubhumi ghwa hyono.

5 Kiyaha handa twenga tulilunga naywo mu kiho kyake, ubhwabhu abhu twaalilunga naywo mu uhyuko ghwake. 6 Tungumanya kukita umundu ghwetu ghwa makachu ghukipamandwa papamu na Kilisito, ngati mmili ghubheghite na ulemwa ghupyokoke, tukotoke kubhegha kangi abhandwa bha ulemwa. 7 Kiyaha yibha naha, mundu ywakahweghite, kanyolopolwa kuhuma mu ulemwa. 8 Hino, payikibha tuhwegha papamu na Kilisito, tungudumbalila kukita twaalama papamu naywo. 9 Tungumanya kukita Kilisito kahyuka kala na kaahwegha kangi ndwee, kahone kyakuntenda kahweghe kangi. 10 Kiho kyakahweghite, kakihwegha mala yimu ghweka, ulemwa ghubhegha ng'obhe na makakala kangi, peni ulami ghwakabheghite naghwo kangutama muughumu na Chapanga. 11 Hila hila, mwenga yinoghela mulibhone handa nhwegha kwa mihalo ya ulemwa peni mungulama mu ughumu na Chapanga kwa njila ya Kilisito Yesu.

12 Kya habhu, nkotoke kuyileka mibhili yenu yinakuhwegha yitende ulemwa na kangi nkotoke kuyiyitikila tama yake hakata. 13 Kangi nkotoke kuhilekekehe nga kipalamande kimu kya hibhungo hya mibhili yenu kutenda mahakata na ulemwa. Kihyengo kyake, mulitutumbule mabhene kwa Chapanga handa bhandu bhahyukite na mulibhuhe mabhene kya umaha kwa kya Chapanga umaha. 14 Mana ulemwa ghwabhegha ng'obhe na makakala kwa mwenga, kiyaha mmegha ng'obhe mu kibhopo kya Malaghilo ngati mmegha mu umaha ghwa Chapanga.

15 Hino, tulongele niki? Tughendelele kutenda ulemwa kiyaha tubhegha ng'obhe mu makakala gha Malaghilo ngati tubhegha mu makakala gha umaha ghwa Chapanga? Aka kaa! 16 Mungumanya kukita pamulitabhula mabhene handa abhandwa bhanakunnyitikila teno, mungubhegha hoto ndo abhandwa bha mundu aywo ebu pamulitabhula kubhegha abhandwa bha ulemwa, mabwituko ghake ndo kiho, ebu pamulitabhula kunnyitikila Chapanga na mabwituko ghake ndo kuyitikilwa na Chapanga. 17 Pa kandahi mwenga mukibhegha abhandwa ghwa ulemwa peni nungunumba Chapanga kiyaha hinu muyitikila kwa myoyo yenu yoha kughayitikila mahundo ghanpeghitwe. 18 Nungunnumba Chapanga kiyaha kabhatenda mmeghe hulu ngati nkotoke kutenda ulemwa, kabhatenda mmeghe bhandu bhake bhaabheghite kala kutenda milando yiinnogheha. 19 Nungulongela kianamundu ya kya uyoyoho ghwenu. Handa bhula mu nndaluko ghumo pamulibhuhite mabhene kuutenda milando yinakinyakali na uhakata kwa kya uhokelo, ubhwabhu abhu hinu mulibhuhe mabhene kutenda gha maha ngati mmeghe andumindumi bha Chapanga.

20 Pammeghite abhandwa ghwa ulemwa, mukibhegha mungulema ghala ghakaghapala Chapanga. 21 Hino, mukimokola kyoki kwa milando ayi mu mmanjubha agho kwa milando yene hinu munguyibhonela honi? Kiyaha nbwituko ghwa milando aywo ndo kiho! 22 Peni hinu nkomboleghwa kuhuma ku ubhandwa ghwa ulemwa na mmegha andumindumi bha Chapanga, mapongolo ghanmeghite nagho hinu ndo kuyohwa, na kukingamwa ubhumi ghwa manjubha ghwoha. 23 Kiyaha mapongolo gha ulemwa ndo kiho, peni lilumbo lya yaghi lya Chapanga ndo ubhumi ghwa manjubha ghoha na ghwanga kupela kukindila kwa Kilisito Yesu, Bambo ghwetu.

<- Akaaloma 5Akaaloma 7 ->