1 Aghu ndo mwanja ghwa ndatu ghwa kuhika kwa mwenga, handa paghalongela Malembo Mang'anyimo gha Chapanga, “Kila nnando ghwalamulwa na uyimiho ghwa bhandu abhili ebhu andatu.” 2 Nikiakinya pameghite na mwenga kya ubhili. Na hinu nungubhuyila pamegha kutali, kukita pahika ndabhegha ng'obhe na luhungu kwa bhala bhoha na bhangi bhaatendite ulemwa kalongohi kyanga kulipetula, 3 kiyaha mungupala naho kukita Kilisto kangulongela kwa kundumila nenga. Kwa mwenga Kilisto chepa nnyoyoho, mukuakakalikila mwenga ngati kabhegha namakakala nkati ya mwenga. 4 Hata payibhele kakibhambwa mulupingika mu mmonekano ghwa uyoyoho, peni hinu kangutama kwa makakala gha Chapanga. Twenga bhubho twaayoyoho mu ywombe, peni twaatama papamu na ywombe kwa makakala gha Chapanga.

5 Mulihingukihe mabhene mmone handa nkali mungutama kwa kuhyubhalila. Mulilolekehe mabhene. Bhuli, mungung'amula ng'obhe kukita Yesu Kilisto kabhegha munkati yenu? Handa mungumanya ng'obhe, mwenga nnepelwa. 6 Peni nunguhyubhalila kukita maamanya kukita twenga tukilepelwa ng'obhe. 7 Tungunnyupa Chapanga nkotoke kutenda uhokelo ghwohele, peni chepa likaho tubhonekane bhandu bhatuhotolite kala, ngati tungupala ntende gha maha, hata handa twenga tungubhonekana tulepelwa. 8 Mana tunguhotola ng'obhe kutenda kyohele kiibheghite kihyengo na hoto, ngati kughendelela kulandamiha hoto ghweka. 9 Tunguyelelwa kukita twenga ndo ayoyoho, peni mwenga mmegha na makakala, hinu tunguayupila ngati nhotole kutenda gha maha. 10 Ndo mana, nungutyeka lihamba ali pamegha kutali, ngati pahika kwa mwenga ngotoke kubhegha nkalipa kwa mwenga hangi ngotoke kutumila likalama lila lyakambeghite Bambo kubhahyata, kulyaghila ndo likalama lya kuchenga na kata lya kuaboghoyola.

11 Hinu, nungualagha maaghanja, mmeghe na utwihiliko, mughakamule makinyo ghangu, mmeghe na hwacho yimo na ntame kwa uhihimilo. Naywo Chapanga ghwa upalo na uhihimilo katabhegha papamu na mwenga.

12 Nnjambuhane mabhene kwa mabhene kwa mapalo gha Kilisto.

13 Bhandu bhoha bha Chapanga bhanguajambuha. 14 Nunguyupa kukita Bambo ywetu Yesu Kilisto kaghendelele kuatangatila muno mwenga mabhoha. Na nunguyupa kukita Bambo ghwetu Yesu Kilisto, na upalo ghwa Chapanga, na uhangano ghwa Nhuki Nng'anyimo ghubheghe na mwenga mabhoha.

<- 2 Akaakolinto 12