RUK 4

Setan fu Jesu biesuainma ijin

(Metiu 4:1-11; Mak 1:12-13)

1-2 Tavan iji Jon fu Jodan do ijia Jesu do ruardame barekoga Godon Kaven ijar oifuon ijia arime raren. Rega Kaven Akai iji fun Jesu dab ninarume fun afeme ai moikum namo ijia vakoga Setan fu naki foti (40) ijeg Jesu biesuaoin. Regavo tavan iji fu oinma ijia fuka duok kafo ba ioin. Fu duok ba ioko fun naki foti (40) ijeg barenma buin ijia fuka vasia mukoi guain. 3 Fu vasia mukoi guainma ijia Setan fu ijia kekome Jesu kua, Aka ma Godon Fariga ni mun gari kuaga fu una duok rene kuain. 4 Fu ijeg kuardain gavo Jesu fu una roin kua,

Godon buk akai bu isoinva ijia fu kuai, Barubara buba tavan bog duok ijesugin iok gavo bum Godon vuak ijesugin vierafene rekno kuain.

5 Ijegreare Setan fun uri Jesu afeme nafar bomana be manino buin ijia ajie vain. Fu ijia ajie manine ar iror fok e mamkanuk kafokafo bu samuagdiavo iji nijaiknum ga ire uruvana nijain. 6 Areme fun uri Jesu kua, Nar ire nun uruvana a giainma iji kege a vajak. Ijefuon maiji ire uruvana iji nar daro nun ijia samuagdiavo ijefuon nar koiknun kege e be era nar vierafekva iji vajak. 7 Ijefuon a na ato same sirimamekma na ire fok na kuaga ar samuagdiakno kuain. 8 Fu ijeg kuardamga Jesu fu una roin kua, Usuibe buk akai bu isoinva ijia God fu kuai, Janika E Bomana God jon ijesugin fuon ato same sirimameknum ga ik fuon reofno kuain.

9 Areme Setan fun madu Jesu afeme va Jerusarem Godon ar bomana bu sainva azan ijia unain. Fu ijia ajie manikoga Setan fu uri kua, Aka ma Godon Farikma ni ijia furiko moik gamia akoze. 10-11 Ijefuon maiji usuibe buk akai bu isoinva ijia God fu kuai,

Godri anera fuon uruvana kiaga bur a samuagdak. Regavo a furik akozekman bur dabe ari vake moikazan ijia unakva aba arime oi kananamiken. Regavo madu diak on iji aba kege nizukdiakno kuain.

12 Rega Jesu fu uri Setan kua, Usuibe buk akai bu isoinva ijia God fu kuai,

Ab God E Bomana on iji bisuamne kuain.

13 Setan fu ijeg Jesu bisuamoine barme tavan ukakbe fun Jesu areme vain.

Jesu fu Gareri ijia ik fuon anerene reoinma ijin

(Metiu 4:12-17; Mak 1:1-14)

14-15 Ijegreare Jesu fu una Gareri guf iji fu ruainma iji fun Kaven Akai ijar dab ninarumga fu daro abe oknum ik fuon ren. Fu kekome mai besubesum ijia E Jiusbuon ar bu afuime vuak kuaivo ijia arume vuak nijaidiamoin. Fu ijegreogame e uruvana bu vuak fuon iji faime uri fu dab aroin.

E Nasaretko ijieb Jesu uzainva ijin

(Metiu 13:53-58; Mak 6:1-6)

16-17 Areme Jesu fun una madu Nasaret ar iji bu fu nafenva ijia vain. Regavo tavan Sabat (Satade) iji e Jius bu isuar karijo ijia Jesu fun izeg fu tavan uruvana reoino ijeg fun ar bu afuime vuak kuaivo ijia aru vain. Fu ijia arume va manine kiamga bun Asaia e Godon vuak vierafene kuaimon ijefuon buk ijin abe main. Bu abe mavga fu kafarbe irame vuak be bu ijeg isoinva iji dain.

18 Godon Kaven iji fun na nirokdien ijefuon fun Godri na imut bijieme kie, Ni vuak nun ma iji abe va e iji isema karioijo iji kuardiamne. Regavo madu ni va e iji dibur karijo ijiga e ni zuriaigin iji ga madu e iji eraneb bu e ise ijieb samuagdiavo ijin karauniamne. 19 Regavo madu ni e uruvana kuardiame kia, Tavan iji God E Bomana fu ja ma rediakfuon iji fun igijar ruainmano kiamne kuain.

20 Jesu fu buk iji dame barme fun abe una e buk samuamo iji mame fun una ari fin. Fu una ari figa e uruvana ar ijia karinva iji buka uri uruvana Jesu nikajain. 21 Ijegreare Jesu fun anerene uri vuak kuardiame kia, Buk kafar igi na dava ja fainva iji ivia tavan igi fun ijekma aresrenmano kiain. 22 E uruvana bun isuar igia karine vuak fuon ma iji fu ir fuon ijia fu kuaimon iji faiva buka oiserdiain. Ijefuon e iji bu uri kuai, E guri fu Josofon farif gavo fu izeg vuak ijekin iji kuaimno kuain. 23 Bu ijeg kuaivga Jesu fu una kia, Na giaga ja vuak be ijeg kuaikuai vierafen. Ja kuai, A e karauniamo ijefuon ni koikon oi keunanamimne. Regavo ni izeg a ar Kafoniam ijia ire iji a reoina no fainva ijeg una ar on ma igia rega no game a ma vierafejno kiekuai vierafenvano kuain. 24 Regavo na igi kuardiakrejo ni faif. E Godon vuak vierafene kuaivo iji e aiko buon ma iji bu giame ijia oimardiavo bakin.

25 Regavo igia faif. Tavan iji e Eraija fu ar Isrer finma ijia bara amun uruvana bu ijia oin. Regavo tavan ijia juaivasia nokbek (3)ga asam sibank ijeg tavan fuba dakoga fuka tavai maren. Fun tavai marme ire ikva uruvana fuka saire barekoga vasia kekome ar iror ijia ruain. 26 Rega bara amun uruvana buka vasia kaniain gavo God fuba Eraija kua, Va bara amun uruvana ifejdiamne kuain. Regavo fum kua, Va ar Zarefet Saidon guf ijia bara amun iji fino ijin ifejdamne kuain. 27 Regavo madu una Eraisa e Godon vuak vierafene kuaimon ijefuon tavan ijia e uruvana ar Isrer ijia karinva iji bu kasi refrosi kuavo iji aben. Rega Eraisa fu Godon if ijia e kafo ba karauniain gavo fum kuamga fu e Neman ai Siriako iji fuonkua keunainmano kiain.

28 Jesu fu ijeg kuardiamga e uruvana bu Jiusbuon ar iji bu afuivo ijia aru karinva iji bu vuak iji faiva buka deajidiain. 29 Bu deajidiamga bu uri Jesu kunaime dab mai iji bu karinva makaf ijia useme dab uruor ijia abesekuai reoin. 30 Bu ijegreoijga Jesu fu e uruvana ijiebuon kafar ijia uniakome vakga bu ijia aren.

Jesu fu e kaven ise ijar dab ninaruoino iji keunainma ijin

(Mak 1:21-28)

31 Areme Jesu fun vake ar Kafoniam moik Gareri guf ijia kekoin. Fu ijia kekome tavan Sabat (Satade) iji bu isuar karine Godon sirimamejo ijia e uruvana vuak nijaidiain. 32 Jesu fu ijia vuak nijaidiamga e uruvana bu vuak fuon fu kuaimon iji faiva buka oiserdiain. Ijefuon maiji vuak fuon iji fuka darokin. 33-34 Regavo e Jiusbuon ar iji bu afuivo guf ijia e be fu kaven ise ijar dab ninaruoino iji fu ijia fin. Ijefuon fu uri uruvana igia Jesu biumame kume, Jesu e Nasaretko gare a nuvuifuon a izeg vierafen? A igi a ruainma akafu no kege arafiruokafa ruain. Na vierafega aiji a Godon e Akaij ijino kumen.

35 Fu ijeg kumega Jesu fu uri kaven ise iji kuriaireme kua, Vuak iji a kuaimon iji arega i bijume keko ruvakne kuain. Fu ijeg kuamga kaven ise iji fu uri e iji dab e uruvana ijiebuon nifak ijia akozme fuba una ire ise kafo fuon ren gavo fum kekome vain. 36 Kaven ise iji fu kekome vakga e ijia karinva bu iji gava buka oiserdiamga bu una bui ganamin. Bu bui ganamiknum kuai, Vuak iji fuka sibe darokido e guri fu darokma kaven ise iji kiaga bu usem vakno kuain. 37 Bu ijeg kuaime uri Jesu izeg fu renma ijefuon vuak iji abe kuaime ar iror ijia oin.

Jesu e uruvana karauniainma ijin

(Metiu 8:14-17; Mak 1:29-34)

38-39 Bu ijegrekoga Jesu fu ar iji areme keko Saimonon ar ijia vain. Regavo Saimonon bara ijefuon asie iji fu vajai vuat bomana urino ijefuon bu Jesu kuaga fu ifejdakafa bu useme kuain. Bu kuardavga Jesu fu va fu namo samaij ijia manine uri vajai fuon vuaturimo iji kuain. Jesu fu adam iji kuamga fu bara iji areme vakga fu maimga fun uri ire vajiaknum samuagdiain.

40 Ijegreare rad tavan koko ijia e roin bu kaifijaf adam kafokafo abenva iji aferdiame Jesuon rokga fu e besubesum imut nigen namdiaknum e uruvana karauniain. 41 Fu ijegreknum madu kaven ise uruvana bu e nirokiavo iji kuriaireme kiamga bu e iji areme usem vain. Bu usem vaknum biumame kume, Aiji anka ma Godon Farifno kumen. Rega Jesu fuka kuriaireme kiamga buba vuak kuain. Ijefuon maiji bun vierafega Jesu fuka ma e iji God kuamga fu ari moikigia e fok karauniakafa ruainma ijin.

42 Areme tavan ik irasemo ijia Jesu fun uri mai ijin areme ari ai moikum namo ijia vain. Fu ijia vakga e uruvana bu uri anerene fu nisaimoine ja bieme nikajain. Ijefuon maiji bu vierafero fu una bu uniame vakro buka bijuknum nikajaoin. 43 Bu ijeg nikajaoijga fu uri kia, Na vierafega naka mai roin ijia Godon vuak ma iji izeg tavan rad fu koikfuon efuon iji samuagdiakfuon ijin abe kuardiak. Ijefuon ma iji God fu ijefuon kiemga na ruainvano kiain. 44 Fu ijeg kuardiame uri mai uruvana guf ijia oknum e Jiusbuon ar besubesum bu afuivo ijia vuak fuon ma iji kuardiaoin.

<- RUK 3 RUK 5 ->