IBRU 6

No Godon vuak ijia e damuigin rekfuon ijin

1 Ijefuon noba vuak iji no amur faime God ma vierafenva iji tavan bog abe karine kuaik. Regavo noka uri vuak igi kaven nuvuon ifejdaga fu daro abekfuon iji vierafek. Regavo jab uri ire ise iji bu ja kam arafiriako ja tavan bog God kuardako fu ise jon giame aremon ijia vak. Regavo madu jab uri God ma vierafejo ijefuon anej ma ijin dab tavan bog kuaimok. 2 Regavo madu unam iji do ruaivo ijigam imut nigen navo ijigam e bu aoime una urijo ijigam rad God nuvuon fu unam no kegoijo iji kege mazim guokfuon ijin jab kuaimok. 3 Regavo vuak iji aregavo roga noka uri vuak iji fu no ifejduoga no e damuigin rekfuon iji abe mimatame rekfuon. Regavo God fu tavan muokma no ijeg rekfuon.

4 Noka kaven ijefuon vuak ijia nijaidiame vaga ijar ifejduoga no e damuigin rek. Ijefuon maiji fuka ma giredo e iji Kuraison vuak ma iji nuigafame vainva iji bu izeg una karoime ruakva bakin. Ijefuon maiji e iji bun amur Kuraison vuak iji bun mukorigia fain. Regavo madu bu Jesu e iji varur ijia ari ruainma iji fun oibuon ijia ik ren revo Kaven Akai ijefuon ire ma iji fateroin bun aben. 5 Regavo madu vuak irerag Godon buk ijia bu isoinva iji bun dame giamga vuak iji fuka ma. Regavo unam izeg God fu rad ikrekfuon iji bun vierafen. 6 Regavo buka una Kurais ma nuigafame vainva iji bu izeg una oi karoime roga God fu ise buon giame arekma bakin. Ijefuon maiji e iji buka izeg tavan iji e Jius bu Kurais Godon Farif iji abe e nifak ijia kuros kanava fu jufabekafa bu renva bu ijeg rej.

7 Regavo e iji God ma vierafejo iji bu moik iji tavan bog ve dame arimo ijekin. Ire fok moik ma ijia tavuavo iji buka ire mukor ijefuon God fu kuai moik iji fun maren. Unam besum ijegvo e iji God ma vierafejo ijieb ire ma kafo God fu oimaikfuon ijin rejo iji God fuka bu daro miame ifejdiam. 8 Regavo e iji God ba ma vierafejo iji buba ire kafo God oimaikfuon iji rejo iji bu moik iji fu ire ufien gurogin namo ijekin. Moik ijekin iji fui ma bakin ijefuon ufien fok bu aseme ke javo igekin. Ijegvo e iji ire kafo God ba oimaikfuon rejo iji bu ijeg aseme mian iji tavan bog ijia naivako ijia jak.

9 Kaifnun na oijmiavo iji na vierafe vuak iji na abe ja kuardiavo iji na vierafe fu jon bakin. Regavo jaiji jan biom una ma rej ijefuon maiji ja moik ma iji ire fok bu ma tavuame sunin kirainma ijekin. Na vierafe ja ire ma iji e bu God ma vierafejo God fu bu karauniainma ijeg rekfuon. 10 Regavo jan vierafe God fu roinknum reno bakin. Ja fuon oijmavo ijiga ja fuifuon ikrenva iji ga e God ma vierafejo iji ja vek unam kafokafo ijia ifejdiav. Ijefuon God fuba ja rubdiak revo fu daro miame ifejdiak. 11 Ijefuon no vierafe e besubesum ja giriesame ijegrene vak. Revo madu jaka uruvana igia God ma vierafekin ja tavan radkma ijia irerag ja oi mafaime samuavo iji kekfuon. 12 Regavo ja zazaime uzakva no vierafe fuba maren ijefuon jaba arek. Regavo jaka e iji bu adumaduigin vierafejo ijeg buonak rekfuon.

Vuak irerag God fu kuainma iji fu rekfuon ijin

13-15 God Eburam fu kuainma iji fu buk iji bu usuibe isoinva ijia ijeg kuai,

Nar daro bomana maga a am uifarif uruvana tuanakno kuain.

God fu ijeg Eburam kuamga fu adumaduigin ire iji samuame fioga God fu ire iji fu kuainma iji fun ren. (Revo ire kafo moikigia naoivo iji bu mamkanuk Godon if asinva bakin ijefuon fu if fuon ijia kuranamime vuak iji Eburam kuain.)

16 Regavo e roin bu oine vuak kuaivo bu if be ka if buon iji ma asidiainma ijia kurame kuaik. Regavo madu e musikuaivo bu Godon if ijia kuavori bu musikuaivo iji bu ijia arev. 17 Ijefuon God fu vierafe fu vuak iji fu kia bu abekno kiainma iji fuka abe samafrediak revo fuba vuak iji fu kuainma iji abe tuasek. Ijefuon God fu if fuon ijia kuranamime kuain.

18 Ijefuon fu ire nokarok (2) iji fu kuainma iji fuba una kufuimek. Ijefuon e iji no God ma vierafejo iji ire nokarok (2) if fuon fu kuranaminma ijiga vuak darokin fuon iji bu no soisoiga no Kurais ma vierafene unam ma karivako fu kuinma iji noka ma vierafekfuon. 19-20 Regavo noka darokma ma vierafega God fu no karaunuok. Ijefuon ire ise kafo bu nuvuon ruakva no vierafe noka giriesame irekfuon. Fun Jesur izeg e iji e isuf baroijo ijiebuon e bomana iji fu efuon ijiebuon fateroin ijia ar ka ma akaij ijia aru vako ijeg ren. Fun fur unam iji no Godon nifak ijia aru vakfuon iji fur dajaduin. Fu Jesu E Bomana nuvuon ijar izeg e Mekisidek fu renma ijeg fur e isuf baroino rene fivakfuon.

<- IBRU 5 IBRU 7 ->