Gorosari

A vuak igi isoinva ijia giakma a vuak iji buk igia isoinva iji giak. Revo vuak ijiebuon maiji bu madu igia nijaidakfuon.

Adam (Ruk 3:38; Romens 5:14; 1 Korintiens 15:22, 45; 1 Timoti 2:13-14; Jiud 1, 14). E Adam iji e iji God fu amur moik ijia abe amur amarenma ijin. Revo bun Adam ko bara fuon Iv amur ijia buba God igain ijefuon bu ise ren. Bur ise renva ijefuon ema iji bu ijia anerene ise re ruain.

Afasor Jesu fu amur ijia e tuer (12) imut bijiame kega bu e afasor fuon ren. (Ni Metiu 10:1-4; Mak 3:13-19; Ruk 6:12-16 ijia giamne.) E ijieb funa oko fu vuak nijaidiain. Jesu fu guame vo una urinma iji bur ni buon ijia gain. Areme fu kiama bu usem irerag bu ni buon ijia gainva ijiga vuak ma iji abe e kuardiafoin. Regavo bur e iji Jesu ma vierafejo ijiebuon e nigen ren. Buk Eks ijia For ga Banabas ga e roin madu bu afaserno kiain. Ijefuon maiji Jesu Kurais fu madu bu imut bijiame kega bu vuak fuon abe kuaimoin.

Anera Anera iji bu Godon vuak abe oij revo bu nakikmazak varur gufia Godon nifak ijia ikrej. Regavo anera iji vuak abe oijo iji bu ema bakin revo bu kaven. Regavo a bu aiba giak revo bur koikbuon kege samafrekva a ijiason giak. God fu anera fuon kiamga bu ik fuon rekuai ruain. Regavo ik buon iji bu Godon e igi samuagdiavo. (Eks 12:6-11; 27:23; Ibru 1:14). Regavo tavan roin God fu kiaga bu va vuak sumakin kafo e roin kuardiav. Regavo anera ijiebuon e bomana iji anera Maiker. (Juid 9). Regavo anera ikin be iji Gebrior. (Ruk 1:19-26).

Ar bu afuime vuak kuaivo E Jius ijiebuon moik ga mai buon besubesum ijia buka ar buon bu ijia afuivo iji samuoin. Regavo ar iji bu tavan Sabat (Satade) buon bu isuar karijo iji bu ijia aru God sirimamejo. Regavo tavan kafo bu ijia afuivo. Regavo bu ar ijefuon guf ijia Godon buk akaij iji daknum Godon akaij iji nijaidiaknum sirimameknum ijia God oimardavo. Regavo tavan roin bu ijia aru kot rejo.

Asaia (Metiu 3:3; Eks 8:30; Romens 9:27-29). Asaia fu e Godon vuak vierafene kuaimon e ikin be. Jesu Kurais fu rad ruain revo ka ma usuibe ijia fu e Asaiar ire kafo rad Jesuon rekfuon fu ijin kuain.

Buk Sam Buk Sam iji fu buk iji bu dua oimarvo iji God rokafainva ijin. Regavo dua iji fu Devid ga e roin ijieb izeg bu God oijma vo fuon oimarvo iji isoin.

Do ruardiavo Godon buk ijia bu ijeg isoime kuai, Jon fu e uruvana aferdiame Jodan do ijia Godon if ijia do ruardiainmano kuain. Regavo fu e fok kia, Jaka ise jon iji arega oi karoime roga na Godon if ijia do ruardiafno kiain. Bu do ruaikin e fok bu giame vierafero bu ise buon iji bun nuigafiame una oi karoinvaro bu ijeg vierafek. Regavo e iji eraneb bu Jesu Kurais ma vierafejo ijiebuon anf iji bu Jesu Kuraison if ijia do ruaikva e bu ijia giame vierafero e iji fun Jesu Kurais ma vierafene Kuristin renmaro bu ijeg vierafek. Regavo do ruaivo ijefuon anej ma iji igin -

E Akai Nijaidiavo E iji bu akaij iji God fu e Jius ijiebuon fu Mosis mainma bu iji e nijaidiav. Regavo tavan bog bu Mosison buk ijia kege nijaidiav. (Ni Mosison akaij iji gaf).

E Godon vuak vierafene kuaimon E Godon vuak vierafe kuaimon iji fu e iji Godri vuak nijaiko fu vuak fuon iji abe una e iji kuardiamo. Ur God fu e vuak fuon vierafene kuaivo uruvana e Samuer ga Asaia ga e Jerimaia aikin iji roin kege uniama bu ruain. Regavo duadok buon ijia God fu ire iji rad rekfuon iji kege samafren. Juaivasia uruvana barenma ijia bu Jesu fu ruakfuon ijigam ire sumakin iji fu rekfuon ijigam irerag ijieb fuon rekfuon iji bur kuaiko rad bu Jesu nafen. Regavo madu bu ire iji bu moikigi fu bareno ijia rekega rad Jesu fu una e ijiebuon ise iji ke mazim giak ruakfuon ijin kuain.

E iji bu Jesuon vuak faivo ijin E iji eraneb Jesu ma vierafe vo unam fuon ijia kegoijo e iji bu e Jesuon vuak faivo. Regavo buk Eks ijia e Jesuon vuak faivo iji bu kia uviaifnuvuon kiavo. E tuer (12) iji Jesuon vuak faivo iji bu e iji Jesur kega bu funa oinva ijin. Regavo fu madu kiamga bu e vuak fuon abe oijo rene vuak fuon abe usem vain. (Ni Metiu 10:1-4 ijia ga).

E isuf baroino E isuf baroino iji e iji bu abega fu e Isrerko ijiebuon God isuf baroino ijin. Jesuon tavan ijia bu Jerusarem ar bu sirimamejo guf ijia e Rivaion uifarif ga e Eronon agan iji kega bur isuf baroij. Regavo e isuf baroijo ijia e iji ka ma ikin iji fun e iji e isuf baroijo iji samuagdiamo ijin. E isuf baroijo ijiebuon e bomana iji fu ar akaij iji bu sirimamejo guf ijia aru ise fuon ga e ijiebuon ise ijefuon Godon isuf baroino.

E Jius bakin Vuak e Jius bakin iji fu e iji bu ma e Jius bakin ijiebuon if. Regavo e Jius bakin iji bu moik kafokafo ar iror igia karioinva ijin. Regavo e Jius iji buka bomana aroikarain ijefuon maiji buiji bu e iji God fu kuai, Jaiji ja e nuno kiainma ijin. Ijefuon e iji Jius bakin bu moik kafo ijia karinva iji bu e Jius iji buka kege ukakna vierafen. Regavo rad God fu e For imut bijama fu vuak fuon abe e Jius bakin iji kuardian. Ijefuon maiji God fu vierafe e Jius bakin buk bu e fuon rek.

E Karauniamo Jesu iji bu kua e moik igeko iji karauniamo ijino kuav. Ijefuon maiji fur e iji bu ise buon ijia vajai fian abekrejo iji karauniam. Jesu fu guainma ijia fu e igi bu vajai fian abekfuon iji fur buifuon vajai fian abega God fu e iji bu fu ma vierafejo ijiebuon ise iji giame aren. Regavo Jesuon duadok ijia fu bu giaga bun maturain.

Eburam Eburam fu e Isrerko ijiebuon asoi amur iji fu. Usuibe God fu Eburam kua fu moik be maga fu ijia finki saifijaf bu rad ijia karikno kuain. Bu ijia karinki moik iji bu buon rek. Ijefuon God fu Eburam kuamga fu moik fuon iji areme uri moik iji nisaim vain. Eburam fu God igame uri juaivasia uruvana ar aibe ijia ar iji nisaime vake moik iji God fu kuainma ijia kekoin. God fun amur ijia Eburamon saifijaf iji bu Godon e rekfuon iji fun Eburam kuardame abe maren. Regavo bu God ma vierafene unam fuon ijia kegokva fu mukorigia samuagdiakno kuain.

Fanuf-kamer (Metiu 3:4; 19:24; 23:24; Mak 10:25; Ruk 18:25) Fanuf-kamer iji bu fanuf ka mamkanuk e bu ijia ajieme oijo ga madu bu sinuom uruvana karvo. Revo tavan roin bu jau buon ijia sinuom amardiavo.

Fasova Iro iji bu kua Fasovano kuavo iji fuka e Jius ijiebuon tavan ikin bu iro ijo ijin. Tavan ijia bu iro ijo iji bu una usuibe bu ai Ijift ijia ba mon ikreoijo ijia bu areme usem ruainva iji vierafej. Regavo tavan ijia God fu anera fuon kuamga fu e Ijiftkobuon ar ijia am farif amur kaniamga bu aoin. Regavo fu e Jius iji kia buka maf-sif uka ijia kaniame kavuan iji kege ar buon besubesum tuar ijia azifno kiain. Regavo tavan iji anera fu kavuan iji gakma fuba am farif amur buon kaniakgavo fu asidiak.

Fata isuf baroijo E Jius iji bu tavan bog Godon isuf baroijo. Regavo bu maf-sif ga maf-gout ga maf-kau ijia kaniame fata ijia isuf baroij. Regavo fata iji bu mun ijia sa ajieme ijia amaren. Regavo a fiksa ijefuon gakma ni buk kafar 659 ijia ga. Regavo fiksa be iji ni buk kafar 668 ijia ga.

Fentikos Tavan Fentikos ijefuon iro ijo ijin. (Eks 2:1; 20:16; 1 Korintiens 16:8). Tavan Fentikos iji fuka tavan ikin be e Jius bu iro ijo. Regavo if Fentikos ijefuon anej ma iji fifti (50). Ijefuon maiji e Jius iji bu iro Fasova iji ine naki fifti (50) ijeg barko bu una tavan Fentikos ijefuon iro in. Fentikos iji bu izeg Kaven Akaij iji fu amur e iji Jesu Kurais ma vierafejo ijiebuon ruainma iji vierafejo ijefuon tavan ijin. (Eks 2:1-4).

Ferisis E Ferisis iji bu e ikin kafo bu e Jius ijiebuon uf ijia karioij. Bu e iji vuak akai nijaidiavo ijiena besum afuime oij. Bu akaij iji God fu Mosis mainma iji buka mukorigia vierafej. Bu vierafe e fok buka akaij ijesugin mukorigia vierafekuai bu ijeg vierafej. Regavo bu madu unam ga akai kafo bum bur buon vierafenva ijia kege una ijekma mazim nain. Regavo buka aroikaraoijo ijefuon maiji bu vierafero buka bur e roin asidiame mukorigia vierafejoro bu ijeg vierafejo. Regavo buka e maturainva igegreoijo revo vierafe buon iji buka ma ise. E Ferisis ijieb Jesu bu dab kuros kanain.

Frenkinsens (Metiu 2:11; Revareson 18:13) Frenkinsens iji ire be buka mon mamkanuk kimejo. Regavo ire iji in ni be bu ai aibe ijia oinva ijiebuon murit ijia karme ire Frenkinsens iji amarev. Regavo in murit bu ijia kege baroiga fu udi mukor urino.

Godon Ar Godon ar fu besum Jerusarem moik Isrer guf ijia manino. Regavo e Jius iji bu tavan uruvana bu ijia tavan kafo mamkanuk roko iji bu ijia iro iknum God isuf baroidav. Regavo e iji bu ma Jius bakin iji buiba ar guf ijia aru vako. Regavo bum makaf ijesugin karij. Regavo ar guf ma iji bu Godon ire akaij iji karme ijia nain. Regavo guf ijar aru vakfuon iji fun e isuf baroino ijiebuon e bomana ijia fuonkua ijia aru vak. Regavo vien bu ugon ka ma bomana ijia abe guf ijia kirakurain. Regavo tavan iji Jesu fu guainma ijia ugon iji fu dab uf ijia buja ari gamia kekoin. Regavo suar iji ni Metiu 27:51; Mak 15:38; Ruk 23:45 ijia giamne. Regavo ijar nijaiduomo iji e iji erar fu Jesu Kurais ma vierafeno iji fun Jesur vien dajaido fu Godon nifak ijia aru vakfuon.

Godon Ar Muvuaka Usuibe e Isrerko bu ai moikum namo ijia oinva ijia God fu Mosis kuama fu Ar Muvuaka be sain. Regavo fu madu Mosis fu izeg fanuf surif ga ugon ijia ar iji sakfuon ijin kuardain. Regavo ar iji bu ijia Mavua Akaij iji abe abedevo ijin. (Ni vuak Mavua Akaij ijia ga). E Jius iji bu ar ijia sirimameknum God isuf baroidaknum ijegre vake e Soromonri Godon ar ma iji sain. Regavo a fiksa ijefuon ga vierafekma ni buk kafar 665 ijia ga.

Insens Ire insens iji fuka ire be udi mukor urino. Regavo ire iji bu in murit ga inak ijigam gireg ijia kege amarvo. Regavo ire insens iji e Jius bu tavan iji bu God sirimamejo ijia bu ar guf ijia baroiga fu udi mukor urino.

Isrer Isrer iji if iji God fu Jekaf mainma ijin. Regavo Jekaf fu Aisek ko bara fuon Rebeka ijiebuon am diar ijin. Regavo Isreron uifarif ijia if buon bu kafokafo ifdiain. Be bu kia bu e Isrerkono kiain. Regavo rad bu una kia e Jius ga madu e Ibrukono kiain. (Ni vuak Jius ijia ga). Regavo moik iji e Isrerko bu karijo iji bu madu kuai, Isrerno kuain. Regavo amur moik iji bu kua Keinan gavo iviakma bu kua Feristaino kuavo. Regavo moik Isrer ijefuon fiksa ni buk nuon ijia ga.

Iv (2 Korintiens 11:3; 1 Timoti 2:13). Regavo ik anej God fu moikigi amarenma ijia fu amur Adam amaren. Rene rad fu uri Adamon ken iji dabume abe una Iv amaren. Regavo rad Setan fu tabar rene keko Iv biesuamga fu igame in sunin iji God fu kia jab turame ikno kiainma iji daturame in. Fu iga kafo kege Adam vajama fuk kege in. Bur amur ijia ba Godon akaij iji igainva ijefuon ema igi no ruainva iji no ise rej. Regavo Adam ko Iv bu am farif nokbek (3) ga if buon Kein ga Ebor ga Set.

Jerimaia (Metiu 2:17; 16:14; 27:9). Jerimaia fu e Godon vuak vierafene kuaimon be. Fur amur ire fok rad Kurais e iji e karauniamo iji God fu kuai fu ruakno kuainma iji fu reoikfuon iji kuaimoin.

Jesu If Jesu ijefuon anej ma iji E Karauniamo. Regavo if roin bu Jesu inva iji bu kua Jesu Kuraisno kuain. Regavo be iji bu kua Godon Farifno kuain. Regavo be iji bu kua Ema ijiebuon Farifno kuain. Regavo be iji bu kua Devidon Farifno kuain.

Jius E iji bu kia Jiusno kiavo iji bu e Eburamon uifarif. (Ni if Eburam ijia gaf). Regavo if Jius iji bu irerafuon ijeg kuainva iji e Judaon agan ijieb moik Juda ijia karinva ijefuon bu Jiusno kuain. Regavo Juda fu e Isrerkobuon agan tuer (12) ijefuon if be. Regavo rad bu if Jius iji abe e Isrerko fok bu kia e Jiusno kiain.

Jona (Metiu 12:39-41; 16:4; Ruk 11:29-32). Jona fu e Godon vuak vierafene kuaimon be. Tavan be God fu Jona kua, Ani va mai Nineva ijia vuak nun abe kuardiamne kuain. Regavo fu uzame uri sisim abe una ai be vain. Regavo tavan iji fu sisim abe vako ijia God fu buibur iji kuama fu ufime ijia vain. Regavo e iji sisim ijia karinva iji bu vierafe fun Jona ijia buna fino ijefuon buibur iji fu ufim ijefuon bu uri fu kunaim dab saof ijia akozen. Bu abe akozvga kijum ma bomana ijar dab in. Regavo naki nokbek (3) barko fu una Jona foine dab jier azan ijia abeden. Rega rad Jona fu ijia una God igame va Nineva ijia vuak fuon iji abe e iji nijaidiain.

Kaven Akai Kaven Akaij iji Godon Kaven. No God ma vierafene oi nuvuon karoikva Godri Kaven fuon iji uniafduoga fur ifejduoga no unam ma ijia karivakfuon. Regavo madu fu ire sumakin kafo rejknum Godon vuak kege efuon iji samafrediak.

Kaven ise Kaven ise iji bu anera igekin ijefuon maiji anera ga kaven ise iji no ni nuvuon ijia giavo bakin. Regavo kaven ise iji bu Setan jaoijo ijin. Regavo kaven ise ijieb unam buon kafokafo ijia ema iji biesiaga buba God igaga buka una Setanon unam ijia reoij. Regavo tavan roin kaven ise iji bu e roin kam ninarudiaga bu Setanon ik iji reoknum unam ise ijia reoij.

Keinan Keinan iji moik iji God fu e Isrerko iji miaga bu abe karikro fu kuainma ijin. Regavo iviakma moik iji bu kua Isrerno kuavo. Regavo tavan roin bu kua Feristaino kuavo.

Kurais Igris ijia vuak Kurais iji bu kua Mesaiano kuavo. Regavo vuak ijefuon maiji God fu kuai fu e be kuaga fu efuon iji karauniaga bu e iji God fu oi buon iji samuagdiamo ijiena mazik. Regavo e iji bu fu kua Kuraisno kuavo. Ijefuon maiji God fu e iji imut bijame kuama fu ruain.

Kuristin (Eks 26:28; Jon 3:16) Vuak Kuristin ijefuon anej ma iji e iji fu Jesu Kurais ma vierafene vuak fuon ijia jaoijo ijin. Regavo madu izeg Jesu fu reoinma iji fuk fu ijegreoinon ijin.

Kuros Kuros iji e Romkobuon unam bu izeg e roin bu e kania bu aoivo e niesaknum unam ise roin rejo iji bu kam kuros bu in ijia amardiavo ijia kaniav. (Ni kuros ijefuon fiksa iji buk kafar 431 ijia ga.)

Maf-sif Jesuon tavan ijia e besum fuka maf-sif uruvana samuagdiam. Regavo bu mai buon samaij ijia samuagdiavo bakin. Regavo buka aferdiame va aibe garas nainma ijia uniaga bu garas ij. Regavo e iji maf-sif samuagdiamo iji fuka maf-sif ijiebuon fak kiraikin naki fu ijia samuagdiaoikin e kafo buba kaniakfuon. Regavo e iji maf-sif samuagdiamo iji fuka fak vien iji mukor samuak. Ijefuon maiji e niesavo iji bu isuar sauime ro niesakfuon. Regavo e Jius iji bu maf-sif uka ijia kaniame God isuf baroidavo. (Ni maf-sif uka ijia ga).

Maf-sif Uka E Jon e do ruardiamo iji Jesu fu kua Godon Maf-Sif Ukano kuain (Jon 1:29, 36). E Jius ijiebuon unam iji bu vierafe God fu ise buon giame arekma iji bu maf-sif uka iji kaniame Godon isuf baroijo. Bu ijegrega maf-sif uka ijefuon kavuan ijar ise buon sodiaga bu Godon nifak ijia e maturai rek. Regavo Jesu bu kua Godon Mav-Sif Ukano kuav. Ijefuon maiji fur vajai fuon abe isuf igeg baroiga God fu ise nuvuon guome arem.

Mavua Akai (Ni Ibru 9:4; Revareson 11:19 ijia ga). Mavua Akaij iji bu in ijia amare ga ire gord ijia azan iji kamaoine aren. Regavo mavua guf iji bu mun fat mamkanuk nokarok (2) iji God fu akai fuon ten (10) iji isoinma bu ijin kege guf ijia sain. (Ibru 9:4-5). Regavo tavan iji e Isrerko bu ai moikum namo ijia bu vainva iji bu mavua iji dab gieme ijia oin. Regavo tavan kafo bu tavan jaoijmana ar besum ijia karijo iji Mavua Akaij iji bu abe Ar Mavua Akai bu kua Tabenikorno kuaivo ijia abedevo. Regavo mavua ijiga ire iji bu ijia sainva iji buka ma akai. Ijefuon maiji ire iji bu anf iji God fu e Isrerko ijiebuon renma ijin. (Ni fiksa fuon buk kafar 667 ijia ga.)

Me (Metiu 2:11; Jon 19:39; Revareson 18:13). Ire me iji fuka ire be udi mukor urino rega buka mon mamkanuk ijia kimejo. Regavo ire me iji bu in udi urino ijefuon murit ijia amarvo. Regavo in murit iji bu e Jius ijiebuon muramura mukor. Bu in murit iji abe ijo iji vajai buon iji fu madiamo. Regavo madu bu in murit ijia kege e iji aoivo iji azirdiame mako ruvo.

Mena (Jon 6:31; Ibru 9:4). Usuibe e Isrerko bu ai Ijift areme usem ruainva iji bu ai moikum namo ijia juaivasia foti (40) ijeg ijia vajai fian abeoijga God fu duok vajiain. Regavo duok iji bu kua menano kuavo. Duok iji fu tavan bog fu varur gufia ari moik ijia roga bu karvo. Regavo tavan Sabat (Satade) iji bu isuar karine God sirimamejo ijesugin fu arimo bakin. Regavo a duok ijefuon vuak iji dakma ni buk Aferdia Usem Vain 16:13-36 ijia ga.

Mosis Mosis fuka e bomana rene e Isrerko iji samuagdiain. Tavan iji e Isrerko bu e Ijiftko ijiebuon ba mon ikreoijga God fu Mosis kuardain. Fu kuamga Mosis fu e Isrerko iji aferdiame keko ar fu bu miakafa kuainma ijia vain. Regavo God fu Mosis bienma iji fuka unam ni be ijia bien. Ijefuon ar tarar iji main naiga Mosis fu vierafero God fu ijiaro fu ijia urame vain. Fu ijia vakga God fu vuak kuardame kua, Na ivia a imut bijain ijefuon ni va e nun aferdiame una ar buon ma ijia vakne kuain.

Noa (Metiu 24:37-38; Ruk 3:36; 17:26-27; Ibru 11:7; 1 Fita 3:20; 2 Fita 2:5). Noa fu usuibe fioin. Regavo tavan ijia e uruvana moikigia karinva iji bu ire ma ise uruvana ren. Ijefuon God fu tavan bomana kuama fu dakoga do firame e ga ire fok moikigia naoivo iji kam iseren. Regavo Noa fuonkua fuka e mukor ijefuon fu God igain. Ijefuon God fu Noa sisim fu izeg amardiakfuon iji kuardamga fu ijeg fine sisim iji amaren. Rene fu kuamga fu bara fuon ga afijaf nokbek (3) ijigam barafijaf aferdiame sisim ijia ajien. Regavo fu madu kuama fu fanuf ga um ni kafokafo iraf seven (7) ga kumat seven (7) ga fanuf ba ijo nokarok (2) iraf ga kumat ijeg giaknum aferdiame ijia uniain. Noa fu God ma vierafenma ijefuon fu uri irerag fu kuardainma ijeg ren. Areme Noa fu efuon ijiena sisim ijia ajieme barko rad God fu ve bomana kuamo fu dain. Fu dakoga tor bomana firame uruor mamkanuk fok fuka okuriamga e fok bu do ine aoim baren revo Noa ga agan fuon buba aoin.

Sejusis E Sejusis iji buk bu ebuon ikin kafo bu e Jius ijiebuon uf ijia karij. Bur akaij iji God fu Mosis mainma ijiga e Jiusbuon unam iji e nijaidiaoij. Bu e Ferisis izeg bu reoijo buk bu unam besum ijeg reoij. (Ni vuak Ferisis iji ga). Regavo tavan roin bu e Jius ijiena musikuaivo. Ijefuon maiji Jius iji bu ma vierafe e iji aoinva iji bu una urikfuon revo e Sejusis iji bu ma vierafe e iji aoinva iji bu una urikfuon revo e Sejusis iji bu ma vierafero e iji aoinva iji buba una urikro bu ijeg vierafej.

Setan Setan e iji fu kaven ise iji samuagdiamo ijin. Fu Godon e ani ga fu madu ema ijiebuon vierafe iji kam arafiriaga bu ise reoij. Regavo madu fu e ijiebuon ise iji bu amur renva iji una vierafe vajiaga e Jesu Kurais ma vierafejo iji bu una vierafero God fu ise buon fuba giame aremoro bu ijeg vierafej. Regavo Setan fu madu e be moikigi samuamo.

Sisa Sisa iji e Romkobuon Kin ijefuon if. E Romko ijieb e moik uruvana iji buna bijaime bur rareme kaniain. Regavo tavan iji fu e Sisar samuagdiako bu ijeg reoin. Regavo tavan kafokafo ijia e iji erar fu e Romkobuon Kin reno iji bu kua Sisano kuaiv.

Unam Iviamkor / Unam Ma Karivako (Akai usuikor - Eks 3:25; 7:8; Garesiens 3:17; Ibru 9:1. Unam iviamkor - Metiu 26:28; Mak 14:24; Ruk 22:20; Romens 11:27; 1 Korintiens 11:25; 2 Korintiens 3:6; Ibru 7:22; 8:6-13; 9:15; 10:16, 29; 12:24; 13:20). Unam iji no una Godna besum rekfuon iji fu kuaim ke marenma iji bu nokarok (2). Vuak amur iji God fu Mosis kuainma iji fu ijeg kuai, E iji eraneb bu akai nun iji igiakva e iji na kega bu e nun rekno kuain. Regavo e besum be fuba akai fuon iji igiainma ijefuon vuak amur God fu kuainma ijia e be fu Godon nifak ijia fu maturainma bakin. Regavo ura unam iviamkor be iji God fu kuainma iji fu kuai, E iji eraneb bu Jesu Kurais ma vierafekva e iji na kia bu e maturainvano kiakno kuain.

Vajat surif kania ufume anf navo E Jiusbuon unam iji bu am nafega fu vuik besum (1) baremoni bu kege vajai surif buon kania ufume anf namdiav. Regavo iji fun Godri Eburam kua a ijeg rekno kuainma ijefuon bu ijin ijeg rejo. Ni Ik Anej 17:9-14 ijia ga. Regavo vajai surif kania ufuvo iji bu e Jius ijiebuon anf ijin. E bu ijia giame vierafero buiji bu e Jiusro bu ijeg vierafejo ijin.

Zaion (Metiu 21:5; Jon 12:15; Romens 9:33; 11:26; 1 Fita 2:6). Zaion iji fu uruor iji bu mai Jerusarem sainva ijin. Godon ar bu uruor ijia sain revo fuka ar ma akai mai guf ijia. Regavo tavan roin if Zaion iji bu ar Jerusarem fok ijin ijeg kuav. Regavo tavan roin Zaion bu kuavo iji bu mai iviamkor Jerusarem God fu ijia fino kaf gufia namo ijin. (Ni Ibru 12:22; Revareson 14:1 ijia gamne).