1 Regavo uviaifnun e God ma vierafeno be fu ise ijar biesuaga fu zazaikma e iji ja Kaven Akai ijefuon daro ijia ikrejo iji ja isuar oi mafaime kabuaikabuaikin ifejdaga fu una unam ma ijia vak. Regavo jak koikjo samuanamiknum ifejdaf. Regavo jab zazaiga ise ijar vo ise ijefkin ijieb ja iviame vaga jak ise rek. 2 Regavo madu ja e kafobuon afik iji abe dabeknum dasumdiakva iji ja Kuraison vuak oijmanamivo iji jav. 3 Regavo erar fu aroikaraknum vierafe fu e bomanado fuba e ijekin iji ifejdiakma e iji fu koikfuon biesuanamimo ijefuon fu Godon nifak ijia fuka e ma bakin. 4 Regavo e besubesum ire iji ja rejo iji koikjo giame vierafega ja isema ren vo ja ma rejo iji giaf. Regavo ja giamga irerag ja rejo iji ja mukorigia rejga iji jaka ijefuon oimarek. Regavo jab kuai unam nuvuon no rejo iji fu mukor ga kaifnuvuon roin bum sibank mukoi kegno kuaik. 5 Regavo e kafobuon unam bu kegoijo iji jab giame kuaik ijefuon maiji no e fok no Godon nifak ijia irega fu ire fok no renva iji kege besum mazim guokfuon.

6 Regavo e iji erar bu Godon vuak iji nijaiva fu fainma iji fuka ire fuon fu nainma iji kege e nijaidiamon fuon kafo vajiakfuon.

7 Regavo ja vierafe ja God biesuakva iji ja isema vierafen ijefuon maiji ja izeg God biesuakva bakin. Regavo e be erar ire uij be abe mekma iji fu una ire ni besum iji rukfuon. Ijegvo fu iro bara abe mekma iji fu iro bara iji una ruk. 8 Unam besum ijeg e be fu tavan bog ire vajat iji fu oimaikfuon iji reoino iji fu kaven fuon iji dab arafirido ire ise kafokafo fu fuon ruakfuon. Regavo una be iji erar fu tavan bog Godon Kaven iji fu oimaikfuon ijia reoino iji fu Kaven ijefuon ire ma kafo karknum unam ma karivako iji abek. 9 Ijefuon noba zazaime unam ma iji no kegoijo ijia zazaiknum anajuar abekfuon. Ijefuon maiji noba zazaikva no tavan iji God fu abedenma ijia ire ma iji fok bu rega no giame roin kekfuon. 10 Ijefuon tavan ma kafo ruakma ni e fok eraneb bu oifian abejo iji ifejdiaknum of. Regavo e iji bu jana agan besum rene God ma vierafejo iji bu bomana vierafene bu ma rediaf.

11 Iviakma vuak nun fun iga barem ijefuon na kainun na kuardako fu vuak nun isoinma iji fu areko na koiknu vuak radkma iji isoiv. Na isoiga ja vuak mamkanuk iji na isoinva iji giame vierafero fas igi For nar koiknu isoim nijiavro ja ijeg vierafek. 12 Regavo e iji eraneb bu ja vajai jon ijia kania ufume anf nakuai bu kikekmiavo iji bu jar giame buon oimarkuai bu iji rej. Bu ijegrejo na For na Jesu Kuraison kuros ijia na vajai fian abenva iji buba ijeg vajai fian abekfuon. 13 Regavo e iji eraneb bu amur vajai surif buon kania ufume anf nainva iji bu Mosison akai fok bu jame igiavo bakin. Regavo bu ja kiaga ja vajai jon ijia kania ufume anf naga e Jius bu ja giame una bu arordiakuai bu iji rej.

14 Regavo naiji na if nun iji abe aroikaravo bakin. Regavo na Jesuon if iji abe ajievknum aroikarav ijefuon maiji fu kuros ijia nuifuon guain. Regavo ire fok moik igefuon iji nan guainva ijekin ijefuon ire iji bu una na samuagdievo bakin. Regavo na roin na rejo bakin ijefuon maiji na bu nan areme gua ruainva ijekin. 15 Regavo efarif kafo bu vajai surif buon iji kania ufume anf nainva iji ga ba anf nainva iji fu ire bomana bakin. Regavo Godon Kaven ijar fu e be abe nibe rega fu Godon nifak ijia e iviamkor rekma iji fuka ma ire bomana ga mukor. 16 Regavo e iji bu oi karoime e iviamkor renva ijiga e fok ar iror igia Godon afijaf renva iji na buifuon sirimamek. Na sirimamega Godri tavan bog roigin buon oifian abene ma rediaknum samuagdiaga bu afuime karikfuon.

17 Regavo vuak nun radkma igi na ja kuardiavno jab arega e kafo bu una na vajai fian ga oifian abe miek. Ijefuon maiji ur vajai nun igi mataimatan na abenva iji ja gieme vierafe naiji na e Jesuon ikrejo.

18 Regavo uviaifnun na sirimamega E Bomana Jesu Kurais fu ja ma rediaga ja mukorigia kari vakfuon.

<- GARESIENS 5