1 Mzli kc tqniglcngr Nei Sip kc kadol krarlimz, lr Heven amrlx nzmnc-nabutxng mzli kxpipz trkrlzpwzleu nabz-nepi kxesz'. 2 Zbz mcx nar enjrl kcng rlimz tztutrpzng mrkc tqlxlvrkipx Gct, x nzkabz badr trpu rlimz.

3 X kzdq mou enjrl vzm tutr mz olta kc tzwzngr mz gol, tqtutrpz mrkc tqlxlvrkipx tron. X malele kc baol kx ngi gol, kx nayclz-ngrm bqlr nc ninz kxngc. X nzka-mopwz bade kcng bqlr nc ninz, kx nakamibzle nzkrka'kr leplz ne Gct amrlx mz olta. [a] 4 X mz nzglalzkr enjrl kc baol ngr bqlr nc ninz kc, zsikapu ngr bqlr nc ninz kxmnrte mrlz sc tqvzmilz lxblr nzkrka'kr leplz neng Gct, vzdz x krlzlzbzle Gct. 5 Mz nibrde enjrl kc glaole kc baol ngr bqlr nc ninz kc, tekatrle mz nyr ngr olta x rtco-ngrde mz nrlc. X mzli lcdepwz bzlrpc tqpctipx, bzlrmei tqyrputipx x nrlc tqycngrlr atwrnrngr mz nengq. [b]

6 Zbz enjrl kcng rlimz tzrtaplxsrng trpu, sc tzoliqpeng nzvxu-krdrleng.

7 Mzli kc enjrl kc kai tqvxutrle kc trpu nede, muli-aes x nyr rlxlvzmi mepyr nzrtco-ngrm mz drtc' apule tewa kxdc. Mz nzmu-krde lcde, nctq drtc' kxetu, vzmi nounc x nabr yrkrtxo mz nyr amrlx. [c]

8 Zbz enjrl krali vxutrle trpu nede, x kzdq da kx apule newz kxetu kxngc nzrtcongr prla. X nctq prla kxetu nzlrtipxlr mepyr. 9 X dalr nctq prla lc amrlx nzbzting x lcsu amrlx mz prla lc nzodating. [d]

10 Zbz enjrl kratq vxutr-kzle trpu nede. X vri kxetu taom mz bongavz apuneomle kx ngxlu, x tao mz nctq lue kxkqlu, x aulz kxkqlu. [e] 11 X drtq vri lcde ‘Kxpiz,’ murde apule lue lr nc rtc kxpiz. X lue kxkqlu lcng nilwzdr piz, x leplz nzkqlung kx nzbz-ngrdr nzrmnq-krdr lue lcng tqpiz. [f]

12 Zbz enjrl krapwx vxutr-kzle trpu nede. X nctq nepi, temz x vri nzatrkating amrlx, murde ncte lcng nabzting. Mz nzmu-krde lcde, kzdq nctq ngrlx tryzlr-ngru, x kxmule lcpwz mz nrlckxbq. [g]

13 Mz nibrde obq-mopwc' x mcx nzlvctxlzkr kzdq lr mrkc wq, x sc tqnemipele nzrpi-krde kx, “Nimu lr nrlc na-aclvetioamu. Murde mzli kc enjrl kcng tq navxutr-mou-ngrdr trpu nedr, nzayrplapxngr kxtrka-esz'ngr lang tq sa navz-kzpzng bamu.”

<- Nzaelwapxngr 7Nzaelwapxngr 9 ->