1 Mz nibr da lcng, mc-moux kc enjrl kx vzom Heven. Enjrl lc rngisc zmatq kxetu x nrlc yzlr-atwrnrngr mz zluli rde. 2 X sc tqnemipele nzrpi-krde kx, “Bxbilon kc tqngi srlx kc etu, tzodatipe, eu nzodatipe. Taon kc etu mzli ka ngipe me nzmnc-ngrdr drka', drka' kzpetong, x da kxtrka amrlx kx nzlvcneng mz bongavz kx nzapulr palc x kqba. [a] 3 X lr taon kc nzprszpxpelr Gct angidr x nzangiolr kx trngiu Gct angidr. Nzapulr olvz kxyrlz kc tqprszpxle ncblo ngrde mz nzrmwimi-abeane-krde ncblo kzbleng. Leplz amrlx badr king rdr nzaxvctr-lzbqbzng mz alwx ngrde, mz nzapu-krdr ncblo kcng tzrmnq-zlwzng. X ncblo kxnzatatrpqng trau mz nzamwa-krdr da mz nrlc, nidr bcnyr kxnzrngisc-zlwzng. Murde nzamwang da kx naesatxpxngr drtwr leplz ngr taon lc, mz nzngini-krdr kxnzrkcmnz-zlwzng x kxnztrkibr-zlwzng.” [b]

4 Zbz, xlr-moux natq Gct Heven, rpile kx, “Leplz nengeng, dwaszpeamu lr taon lcng, ma tqaxvctr-lzbq-kzpzmu mz alwx ngrdrng, x ma tqprtr-kzamu mz nzayrplapxngr nidr. [c] 5 Murde alwx ngrdrng kqlu-esz'ngr, x nqmq krdr trtxpnzngr nzmrbrtr-krde mz drtwrnge. [d] 6 Ayzlu-mopwzmu badr nikeng nzale-kaipzlr bamu. A' mz nzayzlu-krbzmuleng badr, nangi nqvi lxblr mz nikeng nzalepebzlr bamu. Nzaetqngr drtq kc tzkabzlr bamu nangi nqvi kz nzxplr-krde x kabzmu nzetqkr drtqdr. [e] 7 Leplz ngr taon kc, mz drtwrdr nzmyapx-esz'ngrng x trpnz-moungr kx apule nidr, x trpnzngr da kxtrka kx naprtzbz badr. Nzapulr srlx kc tqglqpx-lzbq mz nzrpi-krde kx, ‘Ninge Kwin mzli ka.’ A' nimu leplz nengeng, rtulrtr-ngrbzmu bade nzavzo-lzbq-krde. X srlx kc mz drtwrde abrtz zvz kz, mz nzrpi-krde kx, ‘Trnipc'u kxabzo kx yrni x drtwrde vz.’ A' kabzmu bade nzyrningr x nzvzkr drtwr. 8 Taon lc sa naodati mz nyr murde ninge Kxetu Gct kc tqrninr-esz'ngr sa na-ayrplapxx nide mz nzatrkati-krnge nide mz zyagox, nzyrningr, x dzbi mz zbq kx esz'txu. [f]

9 “King mz nrlc kcng tzprtrng badr mz alwx ngr nzprszpx-krdr Gct x alwx ngr nzrkcmnzngr x nztrkibrngr, sa namclr zsikapu ngr nzngckr taon lc. X nayrni-ngrdr nzbz-krde, murde da kxmrlzting kcng tzkcmnz-zlwz-ngrdr sc tzodatipeng. 10 Sa natubzng rlru mz nzmwxlrti-krdr nzaxvctr-lxblr-krbzlr mz nzodatingr taon kc. X narpilr kx, ‘Rlr, rlr, nim taon kc etu tqapule Bxbilon kc bqnc, kc tqngi-bcnyrlr x matq. Nzodati-aningr nim apule bzlrpc kc tqpcpx.’ ” [g]

11 Zbz rpi mou Gct kx, “X kxnzamwang da sa nayrning x navzti drtwrdr nide, murde trpengr kx naxpebz da lcng tzamwatilr. [h] 12 Murde nzamwati-pnzng da kxkqlu lcde seleng: da kxnzlu nzwzngr mz gol, silvz, prl, x rplz kxlqlwxng, lrpz kxnzkqngr kxprki, kxprpol, kxpc x kx ngi silk. X nzamwati-kzng trprpa ngr nounc kx nzapulr nc bq, x da kx nzlz mz nounc kxlqlwx, bras, aian, rplz kxlq nzrpibz ‘mabol’ x mz nqngi elefant nzrpibz ‘aevri.’ 13 X nzamwati-kzng bqlr nounc kx bletipxng, x tolo kx mnrte mrlz zlwz, x da kx na-amrlzle dakxnzng kx nzapulr ba x riya. X nzamwati-kzng dakxnzng kx nzapulr wit x flawa ngrde, waen, tolo ngr nra nounc olivi, x kzu, sip, hcsi, x sariot ngr vea. X nzamwati-kzng leplz kxnzawz-nrbalqng.

14 “Eke Bxbilon! Da kxmrlz kcng tqsuti drtwrm yrkrpxpebz, x da kcng tqngi-bcnyrlr-ngrn x nzobq-ngrbz tqmrlzvxiting mrbrtipeng. X trpengr nzngisc-krmleng. 15 Ncblo kcng tzaleng da tqangi-bcnyr-ngrdeng, sa natubzng rlru mz zmwxlr, murde ma tzodati-kzng. Ncblo lcng sa nayrning x drtwrdr navz. 16 X narpilr kx, ‘Rlr, rlr, nim taon kc etu, mzli kc kqq lrpz kxlqlwx x kxprpol x kxpctxpx scmqng. X rluq kz da kx nzwzngr mz gol, prl, x rplz kxlqlwx. 17 A' da lcng tqmrlz scmqng amrlx nzodati-aningr apule bzlrpc kc tqpcpx.’

“Mzli lc, kapten, kxnzwzng mz lcsu, kxnzalilvcmqng lcsu, x leplz kx nzmabzng prla amrlx, sa natutr-kzpqng rlru. 18-19 X mzli kc namc-ngrdr nzvzdzkr zsikapu ngr nyr kc tqangcle taon kc, sa nanemilr mz nzyrni-krdr nzrpi-krdr kx, ‘Esae! Trpnz-moungr taon mz nrlc ka kx narsakrlrng ncdr taon kc etu. Rlr, rlr, taon kc etu! Leplz amrlx kcng tzrngiscng lcsu angi-bcnyrlr-ngrng mz dztumqng. A' nim la tzodati-anipe mzli ka tqapule bzlrpc kc tqpcpx.’ X sa nakilvztilr nardr drtc' mz nzvzkr drtwrdr. 20 Mz nzmu-krde lcde, abrtzamu nimu lr Heven, nimu badr aposol, x profet, x leplz nengeng amrlx, murde odati-ngrne nide mz nikeng alebzleng bamu.” [i]

21 Mz nibr nzycmnekr Gct lc, kzdq enjrl kx xplr kalzmle kc rplz kxmrlepu, rtco-ngrde prla, x rpile kx, “Kxnamu nzodatingr taon lc etu delc, murde mzte namrbrtx alo. 22 Trpengr natq gita, ncblei, x trpu, x trpengr nzngrngr kx naxlrtr-kz-mopwz elr. Trpengr ncblo kx namabzng elr. X trpengr kx narbing kai elr. 23 Bxbilon trpengr lam kx nayzlrpx-ngrm bam, x trpengr ncblo x olvi kx nayrlzpx-mop bam. Nzodatingr nim vzpxm mz ncblo nemqng, kxnzetung kcng tznginidr bcnyrng mz nrlc. Murde nzesabrtilr leplz ngr mrkcng kqlu mz nzmrlzba-krdr dztumqng myaszpxle nzmrlzti-krdr Gct, apule kx rwitiq nidr dabo nem. [j] 24 Eu Bxbilon, x nzodati-kzp murde ayrleq mepyr ngr profet x leplz kxnztrng ne Gct, badr mepyr ngr leplz neng Gct mrka mz nrlc kx nznibqting.” X krlc nzyrkrpxpekr nzayrplapx-rmnrkr Gct kcng rlimz.

<- Nzaelwapxngr 17Nzaelwapxngr 19 ->