Sam Kranzpnu-rpwxmz-nrade-pwx (94)
Gct Sa Na-ayrplapxle Kxdrka'-ngrng
Yawe, Ayrplapx Kxdrka'-ngrng!
1 Yawe, nim Gct kc tqayzlubz mz leplz kxnzvz-rbrng da kxnzalelr.
Aelwapxngr zmatq ngrm.
2 Nim kx na-ayzlubz da mz lr nrlc.
Ayrplapx kxnzglqlz-lzbqng navz-nqblqle nike nzalelrng.
3 Yawe, bzkq rlr-ngrbzme mz kxdrka'-ngrng
Nzabrtz-krdr mz da kxtrka kcng tzalelr.
4 Nzpivxitilr da kxtubq,
X nzbilvzlr nzale-krdr alwx.
5 Nzatrkatilr nigr, leplz nemqng,
Mz nzaetqti-krbzlr drtqgr.
6 Kxnzetung nznibqtilr olvz kxnzabzong, x doa kxnzbzszng,
X lr mrkzbleng kx mnckrng badr.
7 Nzrpilr kx, “Trtxpnzngr nzmckr Yawe nigu.
X trycneu mz drtwr Gct rdr da lcng tqaletikung.”
Yawe Obqplxle Nzaokr Drtwr Leplz
8 A' nimu kx nardr mqngi, nalalztqmamu bange.
?Myx mzli kx nayrplapx-krlzu-rnamu?
9 ?Mz drtwrmu rpiamu kx Gct kc tqwz-ngrde nradrtqgu x mzku,
Nradrtqde ngq x mzte mwi?
10 X sc tqayrplapxpele lr mrkzbleng.
?Myx kxmule, trtxpnzngr nzayrplapx-kz-krde nimu?
X alvztrle leplz amrlx.
?Mz drtwrmu trpnzngr da kx krlzle?
11 Yawe obqplxle nzaokr drtwr leplz,
X krlzle kx drtwr kx nzyrlqlr mane. ✡1 Korint 3:20
Mrlz Nzpnanatikr Yawe Leplz Nedeng
12 Yawe, namrlzbz mz krkcng tqpnanatiqng,
Mz nzalvztr-krm nidr mz loukxtr scm.
13 X trnarlrpx-ngrnqu nzkxpu-krdr, a' amnc-zpwxq nidr,
Vz vz mzli kx ayrkro-ngrn kxdrka'-ngrng mz gq.
14 Yawe, trpxtxpx-ngrnqu leplz nemqng,
X tr-rlasz-ngrnqu nigr kcng tqmcpxq.
15 Mzli kc navzm, nzaclvekr kxnzrmailzng sa natubq,
X krkcng nabzdr tqlqngi sc tzabrtz-ateng.
16 Yawe, nim txpwz kx tum mz nibrnge,
X nim kztenge mz nzarlapx-krbzme ninge mz kxdrka'-ngrng.
Yawe Tu-zvzbzle Mz Nibr Kxnztubqng
17 Nzmu trnaokatrwq ninge,
Mzli trnaboiu x ninge kc tqbzpex.
18 A' mzli kc tqkqle-ngrne nim mz nzkxpu-krnge,
Lolvz-amqngiq ninge mz nivz lrm.
19 X mzli kc tqtalvzongr drtwrnge,
Zvz amqtrpe' drtwrnge x abrtz-moux.
20 Px-ngrn nzngi-te-krmu badr kxnzetung kxdrka'-ngrng
Mz nzrnzlvzo-krdr loukxtr scm.
21 Murde nzyrlwrpx-lxblr-ngrdr mz nzrpwa'-krdr kxnztubqng,
X nzaprc-krdr kxnzmrlzng mz nzrnibqngr.
22 A' Yawe, Gct rnge, nide lrpalvc nyznge,
X butqbr kc tqrlakitrx.
23 Yawe, Gct rgr, sa naodatile nidr mz nqmq krdr kc tqtrka,