Sam Kranzpnu-rpwxmz-nrade-li (92)
Da Kx Mrlzvxitxm Bange
Nabz ngr Sabat, zbqkxnzamati.
Mrlzvxitxm Bange Nzangio-krnge Nim
1-3 Yawe myatxlz-esz'ngrn.
X mrlzvxitxm bange nzawi-krbo bam
X nzglqlz-krnge nim,
Mz nzayrningr gita x ukzlele,
Mzli kznike angrlvz-ngrne nivz lrm mz nourla,
X nzyrlq-angidr-krm natqmqng mz milzpq.
4 Murde aelalz-ngrme drtwrnge da kxetuting kcng tqwz-ngrn.
X nangrbo mz nzabrtzngr mz da lcng tqaleq.
Murde matq-esz'ngrn
5 Yawe, nzwz-krmqng matq-esz'ngr,
X nqmq nr drtwrm vzo zlwz la.
6 Kxnzglqpx-lzbqng nzngqngung
X nardr mqngi mz nztatrkr nzalvztr-krmqng mz nardr. ✡1 Korint 2:14
7 Leplz kxdrka'-ngrng nzetu-krdr
Nzapulr nabztqkr betepu kc tqwou mzli kx mrbcnepwz.
X da kxtrka kcng tzalelr nradr trnayc-zvzu,
A' nzodati-krdr tqvzpe tqvzpe.
8 Krlc tqmu-ngrde lc,
Murde nim kx rmyalz zvz.
9 Yawe, obq ena! Murde enqmi rmqng sa nabzng
Mz nzaovxio-krm kxdrka'-ngrng amrlx.
Apux Nounc Kc Tqpa Zvz
10 A' ninge kx xplr zlwz,
Mz nzrka-krme bange zmatq ngrm.
11 Mcpex nzaovxio-krm kxnzmnc-kapqng mz nznibq-krdr ninge.
X xlrpex nzyrnikr kxdrka'-ngrng lcng mz nzaetq-ngrbz drtqdr.
12-13 Leplz kxnztubqng kcng tztung ma nyz Yawe,
X nzyrlwr-lxblrng mz makoa nyzde nzapulr nounc kxetung.
X nzmnc-zpwxng x nzxplrng
Murde dzbrdr nzvzong mz drtc' kc tqngi natqde.
14 X kxmule-esz' nznginipedr lrtzlvz,
A' sa navz zvz nzvz-nqblq-krdr me pnz drtwrde,
X nradr nayc-zvzbz,
Mz nzapu-krdr nounc kc tqpa zvz.
15 Krlc aelwapx-ngrde nzmrlzkr Yawe,