Sam Kranzpnu-rtqmz-nrade-pwx (84)
Kxnzmncpxmqng Mangr-nzangiongr Yawe Gct kc Tqrninr Nzmnc-zpwxng
Nabz ne nqvi lr Kora kx nzyrbzlr mz kxrmailz ngr dzbe kxnzngrng.
Yawe Kc Tqrninr
1-2 Yawe kc tqrninr, nim Gct kc tqlu.
X mrlz-zlwzm bange Mangr-nzangiongr nim.
Murde sutitx zlwz drtwrnge nzmncpx-krmc makoa ngrde,
Mrkc tqngr-abrtz-ngrbo bam mz nabznge atwrnrngr.
3 Yawe kc tqrninr, nim Gct x King rnge.
Kxnzvzdzng Jerusalem mz nzangio-krdr nim nzrlatrng mz olta nyzmqng.
Murde olta nyzm apule ma nyz doa nemqng.
Da kc tqwai utc tzwz-ngrdr ma nyz neidr, mz nztapirpx-krdr neimrdr.
4 X doa lcng tzmncpxmqng Mangr-nzangiongr nim nzmnc-zpwxng
Mz nzangrlvz-zvz-krdr nim.
Newz Saeon
5 Namrlzbz mz leplz kcng tzvzdzng mz Newz Saeon mz nzangio-krdr nim,
Murde sa na-axplr-mowq nidr.
6 Mz nzkawi-krdr nabzlwa kxmingr narmctilr nabzde kx lrting
Mz nibr nzdckr tewa.
7 X mz nzesotr-krdr Jerusalem nzxplr-krdr sa naetunepx,
Murde ycpe pipz nzkrlz-krbzlr Newz Saeon mz nzangio-krdr nim.
X nim Gct rgr kxmyaszlzle krkcng tzmncng mzlilxlr amrlx
Tzangiolr lr mrkzbleng.
8 Yawe Gct kc tqrninr, nim Gct r melrmqgr Jekop.
Xlrm nzkrka'-krnge mz nzvztr-krnge ma nyzm.
Nzmnc-zpwxngr
9 Rlxtibo bam
Kx amrlz-zvzbz king rgr kc tqmcpxq.
10 Murde nzmnctr-ngrbz bam mz Mangr-nzangiongr nim mz zbq kxesz',
Myaszpxle nzmncngr drlve keng mz nrlc mz zbq kang kqlu.
X nzprtr-ate-krbo mz naonrx ngr ma nyzm,
Myaszpxle nzmnc-zvz-krnge mz ma kxnzetung nyz kxdrka'-ngrng.
11 Murde Yawe, nim King rgr kc tqbatrple nzamatqngr nigr.
X nim temz ngr lomrgr kc tqyrputrngr nipna.
X aclveq nigr mz zmrlz ngrm,
Mz nzrlrpx-zvz-krbzme da kxmrlzting mz kxnztubqng.
12 Yawe kc tqrninr,