Sam Kranzpnu-nzlvqn-nrade-esz' (51)
Nabz Leplz Kx Avzo-lzbq
Nabz ne King Devet,
kx yrle mz nibr nzycmne-plztitr-krbz Profet Neitzn mz nzmwimi-krde Batsibz.
Wztibz nabznge
1 Gct, nayc mz drtwrm ninge,
X atubqtim nzvz-rbr-krngeng, murde aodu-zvzq ninge.
2 Wztibz nabznge mz alwx rngeng amrlx
Kcng tzatrkatilr ninge.
3 Murde opxpe mz mzke' nzvz-rbr-krngeng.
X plzpxbo nzesablqti-zvz-krnge nim,
4 X myapxbz nim kc tqxpqbrlr-ngrne
Mz nzrnzlvzo-krnge Loukxtr scm.
Delc, tubqq mz nzrpi-krme bange kx vz-rbrx,
X mz nzyrlq-krm nzayrplapxngr ninge. ✡Rom 3:4
Ipq Ninge
5 Mrlzm bange nzale-krnge alwx
Murde mzli kc tqmncbe-ngrne mz nelz lxenge, alwx rnge ycpebz.
6 A' suti drtwrm kx nabznge navz-nqblqle nzmncngr angidr.
Delc, na-alvztr-ngrn ninge murde nayrplapxx.
7 Wzti-angidrbz nabznge,
Murde nzprki-krnge namyaszpxle nqbya r nrc.
8 Ipq ninge murde na-abrtzx,
X drtwrnge kc tqavzbzme naelalz-mop.
9 Bzkq obqtrpeq nzmyakr drtqnge mz alwx rngeng,
A' ipqpxbz alwx rngeng amrlx.
Tekqtrpz Nabznge
10 Gct, tekqtrpz nabznge murde natubqx,
X amrnale mqngrnge murde navz-nqblqx nim.
11 Bzkq maszlrpx-ngrn ninge mz nzmnctr-krbo bam.
X bzkq katxpxq nzokatrkr Mqngrm ninge.
12 Okatrp ninge murde na-abrtz-mou-ngrne nzarlapx-krm ninge,
X drtqnge navq mz nzvz-nqblqngr natqm.
13 Zbz sa na-alvztrpo nqmq krmqng mz kxdrka'-ngrng,
Murde nayzlu-mopwzlr bam.
Nawztrpo Bam
14 Gct, bzkq ayzlu-mope' bange nzrnibq-krnge ncblo,
Murde na-angrlvzx nim mz nzarlapx-krm lc ninge.
15 Kxetu, okatrp ninge
Murde naglqlz-ngrne nim nivz lrm.
16-17 Trabrtz-ngrwq nzangco-ngrm blz mz olta nyzm.
A' blz kx mrlzbz bam nabz leplz kx avzo-lzbq x plzpxle alwx ngrdeng.
Delc trna-angco-ngrpwc'u blz mz olta nyzm,
A' avzo-lzbq-zvztxpwo bam.
Blz Kxtubq
18 Krka'-ngrbo bam kx naokatrpe' nigr leplz nemqng
Mz nzamqngi-mou-krgr drkq ngr Jerusalem.
19 Murde nzangco-krmgr blz mz olta nyzm
navzpxm mz nzka-lzbq-krbzkr bam.
navzpxm mz nzka-lzbq-krbzkr bam.