Sam Kratrtqki-esz'-nzpnu-pwx-nrade-rpwxmz (149)
Nzbilvz-krgu Nzaovxiokr Yawe
1 Naglqlzku Yawe!
Nangr-ngrbzku bade nabz kxmrna.
Naglqlzku nide mz nzyrlwrpx-krm leplz nedeng mz Mangr-nzangiongr nide.
2 Nigu lr Israel na-abrtzlvzku Yawe mz nzngini-krde Kxrpalz.
X nigu lr Jerusalem naelalz-ngrm drtwrgu King rgu.
3 Naelabzku bade
Mz nzrta-krgu kcte x nzayrni-krgu gita.
4 Murde Yawe abrtz-zlwz-ngrde nigu leplz nedeng,
X aovxiole enqmi rgung mz nzmnc-xgle-krgu nide.
5 Delc nigu kxnztrng nabilvzku nzaovxio-krgu.
X nangr-abrtzku mz nrlckxbq krlzbzle mz nrlckxngrlx.
6 Naogu namalqlvzlr Gct.
X narmaleku toki r vea mz mqgu.
7 Murde na-ayzlubzku da mz lr mrkzbleng,
Mz nzatutr-krgu nzaryplapxkr Gct leplz lcng.
8 X nape-amqngiku king rdrng,
Badr kxnzrmailz rdrng amrlx mz nzaovxio-krgu nidr.
9 Mz nzamatqkr Gct nigu, rlr-ngrmle bagu, nigu leplz nedeng,
Nzprtr-krgu mz nzatutr-krde natqde mz nzayrplapx-krgu lr mrkzbleng.