Mak 3

Jiszs Amrlzle Kzdq Ncblo Mz Sabat

Matiu 12:9-14; Luk 6:6-11

1 Mz kzdq mou Sabat, mz nzvztrkr Jiszs mz kzdq mangr-nzkrka'ngr, rmctile kc ncblo kx mqde bz. 2 Kzdu kcng Farzsi tzyrlwr-kzng mrkc nzrtangrtrpzng da kx vz-rbrti Jiszs. Sc tzaukzti-angidrpelr mz nzmc-krdr nzmu na-amrlzle doa kxyagox mz Sabat. Murde mz drtwrdr nzamrlzngr doa kxnzyagoxng ngi nzwzngr. 3 Sc tqrpipebz Jiszs mz mrlx kc mqde tqbz kx, “Vzpxm x tu mrlc.” 4 Zbz sc tqrpipebz Jiszs mz leplz kcng kx, “?Nike rlrpxngr Loukxtr scgu nzalengr mz Sabat? ?Nzokatrngr leplz o nzatrkatingr? ?Nzarlapxngr nzlukr ncblo o nzrlr-ngrbz nzbz-krde? Murde krlz-angidramu kx Loukxtr scgu rlrpx-ngrmle bagu nzalengr da kxmrlzti mz Sabat.” A' leplz kcng nzmnc-lrpi-txpwzng murde nzkrlzlr kx mrkc tqvzki nardr vz-rbr. 5 Jiszs obq-ngale-ngrde nidr amrlx ngrdr. X drtwrde ngya x talvzo-ngrde nzrsaprlr-krdr natqdeng. X sc tqrpipebzle mz ncblo kc kx, “Atwztqpx mqm.” X atwztqtxpxle mqde, x mrlztx pnz mou. 6 Zbz Farzsi kcng nzrlasztxdr mangr-nzkrka'ngr. X sc tzvz-anipeng mz nzycmne-etr-krdr badr ncblo neng King Herot Antipas, mz nzrpi-krdr kxnamu nznibq-krdr Jiszs.

Zbo Ngr Leplz Kxetuting Nzvz-nqblqlr Jiszs

7 Jiszs badr ncblo nedeng nzabrkapx-lzbqmqng mz mztea, x sc tzvzpeng Dxbu Gzlili. A' kzdq zbo ngr leplz kxetuting ngr Gzlili Provins sc tzvz-nqblqpelr nidr. 8 X leplz kzbleng nzyrkr-kzpqng mz Jiszs mzli kc tzxlrti-ngrdr rkx kcng tqaletileng. Nzvzkimlr taon kxetu Jerusalem, x mz mztea ngr Judiz Provins amrlx, krlzbzle me nzmncngr lr Edom kcng trngiulrJiu. Nzvz-kzpqng kcng mz nrlar LueJodzn kc tqyctxo. X nzvz-kzpqng kcng Taea x Saedon, taon kxetuting nyz lr mrkzbleng, mrkc Prla Meditrenia. 9-10 Leplz kxnzyagoxng amrlx sc tzapetr-lzbqbzng mz zbo ngr leplz kcng mz nzbxtr-krbzlr nide. Murde nzrpilr na-amrlz-kzpzle nidr da kc tqwai nzamrlzpe-krde leplz kxkqlu. Zbz rpibzle mz ncblo nedeng kx naoliqtibzlr dq bot kx nadwatr-ngrmle dxbu mz nzalvztr-krde nidr. Murde ma tzolikilvztilr nide mz nzalvztr-krde. 11 X mzli kznikeng drka' kxnzmncpx mz leplz nzmcpebzlr nide, sc tztaopebzng bade, tzrpipelr mz nznepx-krdr kx, “Nim mrlx Gct!” 12 A' Jiszs rngidrlvztx-ngrbzle badr kx bzkq nzpinebzlr da lc mz leplz.

Jiszs Mcpxle Aposol Nzpnu-esz'-nrade-li (12)

Matiu 10:1-4; Luk 6:12-16

13 Zbz Jiszs vztxlz-ngrde kc newz x sc tqaveatipele krkcng tqsuti drtwrde, sc tzyrkrpebzng bade. 14 Mcpxle ncblo nzpnu-esz'-nrade-li (12) kx nanginidr ncblo nedeng kxnzmyatxpxbzng, kx na-alvztrleng. Murde, mz nibrde na-atwzlrpx-ngrdeng mz nzyapwxtipx-krdr Nrpakxmrlz. 15 X narngiscng zmatq mz nzrmaszlrpx-krbzlr drka' mz leplz mz drtqde. 16-19 Krkcng nzpnu-esz'-nrade-li (12) tqmcpxleng nidr seleng:

Saemon, kc tqyrlq-kzpz Jiszs drtqde Pita,

Jemes nidr mz mzlede

Jon kcng tznginidr mrlx Sebedi, x Jiszs kabzle badr drtqdr Boanrjis, drtwr ngrde mrlxng bzlrmei, murde nardr mrbc,

Adru (mzle Saemon Pita),

Filip,

Batolomiu (mrlx Tolmai, kc kzdq drtqde Natzniel),

Matiu (kc kzdq drtqde Livae),

Tomas,

Jemes kc tqngi mrlx Alfizs,

Tadizs (kc tzrpi-kzpz Judzs, mrlx Jemes),

Saemon kc tqprtr ena mz dzbede kc tzrpilr namaszlrtxpx-ngrdr gzpman ngr Rom mz nzmnc-krdr Israel, x

Judzs Iskariot, kc tqamwabzle Jiszs mz enqmi rdeng.

?Zmatq Ngr Jiszs Vzpxm Mz Gct O Mz Setzn?

Matiu 12:22-32; Luk 11:14-23; 12:10

20 Zbz Jiszs yzlu mou bzq mrkc mztea Kzpznizm. X kzdq zbo ngr leplz kxetuting nzyrlwr-ngalelvz-moulr nidr badr ncblo nedeng. Sc tqrblxtxpe nzmu-krdr kxpipz mz nzokatr-krdr leplz lcng. 21 Mzli kc lr ma nyz Jiszs tqxlr-ngrdr da lcng, sc tzrkalzpemqng mz nzoti-krdr nide. Murde nzrpilr leplz kx ngqngupe-ngrde nzwz-kato-krde.

22 X mzli lcpwz kzdung kxnzalvztrng mz Lou sc Mosis kx nzvzkimlr Jerusalem sc tzrpipelr kx, “Mrlx la mncpx-ngrm Beelsebol, kxetu r ma ngr wq, nide kc tqaclvele drka' amrlx, x sc tqrkabz bade zmatq mz nzmaszlrpx-krde drka' mz leplz.” *Mz natq lr Grik drtq Beelsebol drtwr ngrde kxetu r ma ngr wq, kc tqngi kzdq kz drtq Setzn.

23 Zbz Jiszs sc tqrpipebzle kx nayrkrmqng bade. X sc tqryapwxpebz badr mz nzycmne-ebzpxngr lcde sele. Rpibzle kx, “Trtingr! Murde Setzn rblx nzmapulrpx-krde drka' kztedeng mz nabz leplz! 24 Murde kandre kx akipx-lzbq mz dzbede sc tzota-etrpeng, e mzli kxpipzne trnatu-amqngiung. 25 Mz nqmq lcpwz doa lr ma kxesz' kx nzamnc-dali-lzbqng, nzatrkati-lzbqng. 26 X mou, nzmu Setzn badr kztedeng naotablrlr mz nidr esz'-krdr x nzaki-lzbqng, e zmatq ngrde mz nzaclve-krde leplz sc tqmanepe x tqyrkrpxpebz. 27 Mz nzmu-krde lcde, Setzn apule ncblo kx xplr zlwz. A' napebqtx kai, x ncblo kc tqdwatr-atebz ma nyzde mz nztwz-krde dztudeng. Da kc tqwai nzarlapx-ngrbz leplz mz mqde.

28-30 “Rpiamu kx nabznge mncpx-ngrm drka'. A' da angidrtx lc napibo bamu. Gct krlzle nzipqpx-krde alwx x nzrpivxitingr amrlx. A' mz nzrpi-krmu lc zmatq rnge vzpxm mz drka', pivxitiamu Mqngrkxtr kc tqngi nou angidr zmatq lc. X trpnzngr nzipqkr Gct leplz kx pivxitile Mqngrkxtr, murde atao-lzbq mz alwx kx yctx alo.” [b]

Kx Ngi Angidr Lxede Jiszs X Mzledeng

Matiu 12:46-50; Luk 9:19-21

31 Zbz lxede Jiszs x mzledeng nzkrlzbzlr ma kc tqmnc-ngrde. A' rblx nzprtr-krbzlr brma, murde zbo ngr leplz kcng tzmncong mrkc. Nzatwzlrtr-ngrbzng nrpa bade kx navzpx-kaip badr. 32 Kzdu leplz mz zbo ngr leplz kcng tzwxbu-ngalelvzlr Jiszs, nzrpibzlr bade kx, “Lxem x mzlemqng sc tztutrpqng yz, nzrpilr namclr nim.”

33 X sc tqrpipebzle kx, “?A' nekeng tqngi angidr lxenge x mzlengeng?” 34 Obqtxbz mz kxnzrlxngiting kcng tzwxbu-ngalelvzlr nide, x sc tqrpipebzle badr kx, “Doa kxnzapulr nimu lang tqngi lxenge x mzlengeng! 35 Murde krkc tqvz-nqblqle me pnz drtwr Gct, nide la mzlenge x inwenge x lxenge angidrng.”

<- Mak 2 Mak 4 ->