1 Mzli kc tqmcngr Jiszs zbo ngr leplz kcng tzvzmqng bade, sc tqvzdzpe mz kzdq nra mz nzalvztr-krde nidr. X ncblo nedeng nzwxbu-ngalelvzlr nide mrkc tqwxbu-ngrde. [a]
3 “Ngi da kxmrlz nzkrlz-krmu kx mnc-xgleamu nzokatrkr Gct, murde Gct sa nakabzle bamu da kx vzpxm mz nzngini-krde King rmu.
4 “Ngi da kxmrlz nzvzkr drtwrmu, murde Gct sa na-amqtrpzle nabzmu. [b]
5 “Ngi da kxmrlz nzavzo-lzbq-krmu, murde Gct sa nakabzle bamu zmatq mz nzaclve-krmu mz nrlc. [c]
6 “Ngi da kxmrlz nzpqkr nabzmu mz nzrtangrti-krmu Gct, murde Gct sa naokatrle nimu mz nzvz-nqblq-krmu me pnz drtwrde. [d]
7 “Ngi da kxmrlz nzyckr drtwrmu leplz mz nzokatr-krmu nidr, murde Gct sa nayc kz mz drtwrde nimu.
8 “Ngi da kxmrlz nztubqkr nabzmu, murde sa nakrlz-angidramu Gct x nqmq kxtubq. [e]
9 “Ngi da kxmrlz nzaodutr-lxblr-krmu leplz mz nzmnc-krdr mz nrwx, murde Gct sa narpile kx nimu doa nedeng.
10 “Ngi da kxmrlz nzatrkatingr nimu mz nzale-krmu da kxtubq, murde mnclzbzmu mz Gct mz nzngini-krde King rmu. [f]
11 “Ngi da kxmrlz nzatrkatingr x nzrpibqtingr x nzobqszongr nimu mz nzvz-nqblq-krmu ninge mz nrlc ka. [g] 12 Mzli ka na-abrtzlvzamu nzapu-krmu profet ne Gct kcng tzatrkati pnz melrmqmung. Murde mz nrlc kc navzm, sa natwz-kzamu da kc tqmyapx-esz'ngr.” [h]
13 Jiszs rpi-mopwzle mz nzycmne-ebzpxngr kx, “Na-apuamu dcpiz kxmrlz mz nrlc ka. Murde na-amnc-angidr-kzamu leplz da kc tqwai dcpiz nzayc-angidr-krde dakxnzng. A' nzmu nilwz dcpiz kx tqmrbrle la, trpengr nzamrlz-moungr. Trpnzngr da kx takitrde, a' takitxtrpwzle nzrtctxngr mrkc tzvz-ngrdr leplz. Mz nzmu-krde lcpwz, bzkq esaki nzvectr-krmamu leplz bange mz nzarlapx-krnge nidr. 14 X nzmu na-apu-kzamu zyzlr kc namailzbzle leplz mz Gct. [i] Murde nztubqkr nqmq krmu naopx-angidrbz badr, da kc tqwai zyzlr ngr taon kx ycom mz newz tryc-kapqu. 15 X navz zvz nzale-krmu da kxmrlz, murde trpnzngr doa kx rtekatr lam sc tqyrlq-kapqpele. X tralalvzo-kzleu topla. A' lam nzadolzpwz wq, murde leplz namclr zyzlr mz nzdwatr-krmlr brma. 16 Mz nqmq lcpwz, na-aelwapx-ngrbzmu mz leplz nztubqkr nqmq krmu, kc navz-nqblqbzlr mz Trtemu kc Heven, mz nzglqlz-krdr nide.”
23-24 “Mz nzmu-krde lcde, tubqti-lzbq-kaiamu mz kztem kc tqngyati drtwrde nim. Na-aleq da lc nzmu navzq mz Mangr-nzangiongr Yawe mz nzrka-krm blz mz olta, a' dcpx mz drtwrm kx kzdq doa ngyati drtwrde nim. Bzkq kaq blz kc, a' yrlq txpwz ena, x tubqti-lzbq-kaiamu mz kztem. Zbz takitrde nzyzlu-kr-mopwe' Mangr-nzangiongr mz nzrka-krm blz kc. [m]
25 “Mz nqmq kcpwz, mz nzvz-krmu mz lrpzki, tubqti-lzbq-kaiamu mz ncblo kc natwzle nim mz kot. Murde ma tqaprcbzle nim mz majzstret kc na-aprc-alzupwzle nim mz pulis, x pulis sc tzadwatrpelr nim mz presin, 26 mrkc namnc-ngrn x nakrlz-zpwxbzle nzxpepx-krm trau amrlx kcng nakapxq.”
29-30 “Mz nzmu-krde lcde, aclveti-lzbq kz. Bzkq rlr-ngrbzme mz alwx nzaclve-krde nim. A' mz mzli r nzatalzngr arlapx-lzbq. X katxpx-lzbqm mz nzatalzngr kx batrpzle nztao-zvz-krm. Murde nzwz-kato-krm mz nzmncngr kxtubq mzli ka, x nzmnc-zvz-krm Heven kalr, myaszpx-zlwzle nzaxtx-krbzme nzrlxngiti-krm mzli ka, x nzmnc-zvz-krm mz Hxl kalr.” [o]
31 Jiszs rpi-mopwzle kx, “Krlzamu kx mzli kc bqnc Gct kabzle natq lc mz melrmqgung, mz nzrpi-krde kx, ‘Ncblo kx na-axtxde krnalzde, naka-kaipzle bade pepz ngr nzaki-lzbq-krdr.’ [p] 32 A' rpibo bamu kx ncblo kx axtxde olvz rde kx tr-rmwimiu ncblo kzble batrpzle bade nztao-krde mz alwx ngr nzrmwingr ncblo kzble nzmu nayrlz-moule. X ncblo kc tqyrlztile olvz lcde tao kz mz alwx lcdepwz.” [q]
38 Jiszs rpi-mopwzle kx, “Krlzamu kx mzli kc bqnc Gct kabzle natq lc mz melrmqgung, mz nzrpi-krde kx, ‘Nzayrplapxngr narsakrlr-ngrpwz mz nike nzvz-rbrngr. Doa kx tz-batrpzle mz kztede, natz-batr-kzpzle mzte. X doa kx tzlqpxbzle nqngi kztede, natzlqpx-kzpzle nqngide.’ [t] 39 A' rpibo bamu kx bzkq ayzlubzme nike nzwaisr-ngrm, a' ayzlu-alzupwz mz nivz. Nzmu ncblo naobqszole nim mz nztztr-krbzle blzmznaom kxrtc, bzkq ayzluq, a' ao-lxlvr-kzpz nrlarde kxmc mz nztz-kz-krpzlele. 40 X nzmu ncblo natwzle nim mz kot murde rpile nrz scmqng nangi scdeng, ka-kzpz bade bot scm. [u]
43 Jiszs rpi-mopwzle kx, “Krlzamu kx mzli kc bqnc Gct kabzle natq lc mz melrmqgung, mz nzrpi-krde kx, ‘Mrlzti kztemqng, a' namwati drtwrm enqmi rmqng.’ [w] 44 A' rpibo bamu kx namrlzti-kzamu enqmi rmung. X nakrka'-ngrnamu leplz kcng tzatrkatilr nimu. 45 Murde mz nzale-krmu da lc, sa nanginimu mrlxng Gct Trtemu kc Heven x na-apuamu nide. Murde mrlztile leplz kxmule-esz' kxdrka'-ngrng o kxnzmrlzng, mz nzati-krbzle nepi x nzadc-krbzle tewa mz leplz amrlx. 46 Nzmu namrlzti-txpwzmu kxnzmrlztilr nimu, Gct ma trkapwzleu da kxmrlz bamu. Murde tr-rblxu nzalengr, x kxnzatakqting takes nzale-kzlr da lc. 47 Nzmu narpi-txpwzmu kx, ‘Nimu la,’ mz kztemung, trmyaszpxleu leplz kc-kzng. Murde tr-rblxu nzalengr, x kxnzmnc-mrbrng nzale-kzlr da lc. 48 Mz nzmu-krde lcde, namrlztiamu leplz amrlx, da kc tqwai Trtemu kc Heven nzmrlzti-zlwz-krde leplz amrlx.”
<- Matiu 4Matiu 6 ->- a Krlc nqmq kr lr Jiu mz nzalvztr-krdr leplz. Matiu 5:2—7:27 nzrpibz Nzalvztrngr mz Nra. Mz nzalvztrngr lc, Jiszs ycmnebz mz krkcng tzlxngitipelr nide, kxmule-esz' leplz kxnzkqlung nzlalztq-kzpzng bade.
- b Asaea 61:2
- c Sam 37:11
- d Asaea 55:1-2
- e Sam 24:3-5
- f 1 Pita 3:14
- g 1 Pita 4:14
- h 2 Be Ngrdr 36:16; Aposol 7:52
- i Jon 8:12; 9:5
- j Nzatutr-krde natq Gct drtwr ngrde nidr seleng: 1) Atutrle natq Gct kxnzplzpx amrlx kx nzyapwxtipxngr Kxnzmcpx. 2) Atutr-kzle da amrlx kcng tqesalz-ngrbz Gct mz leplz nedeng. 3) Vzm mz nzngini-krde ncblo kx tubq-esz'ngr kx trpnzngr alwx ngrde, mz nzvz-nqblq-angidr-krde lou sc Gct amrlx. 4) Vzm mz nzalvztr-krde drtwr angidr ngr natq Gct mz Nzryrngrkxtr kc kai. 5) X vz-kzp mz nzrka-krbzle kzdu-kzng nzalvztrngr, murde Nzryrngrkxtr kc kai x natqdeng namwitr-lxblrng.
- k Luk 16:17
- l Nzrlaszngr 20:13; Lou Kcpwz 5:17
- m Nou 4:4-7; Nzyrplapxngr 15:8; Asaea 1:10-15; Jeremaea 6:20; Emos 5:21-24
- n Nzrlaszngr 20:14; Lou Kcpwz 5:18
- o Matiu 18:8-9; Mak 9:43-47; Luk 17:1-2
- p Lou Kcpwz 24:1
- q Mz mzli nyz Jiszs, ncblo txpwz kx krlzle nzaxtx-krde olvz rde. A' mz nztwz-krgu drtwr lc mz nzmnc-krgu, nakrlzku kx drtwr ngrde doa amrlx bzkq nzaxtxdr krnalzdr.
- r Livae 19:12; Nzkqlu-krdr 30:2; Lou Kcpwz 23:21, 23
- s Mzli kznike ncblo yrlqle nzesalz-krde mz kzdq da, opxm kx nide kxpokia, murde natqdeng esz'-krdr trtakitrdeu nzatutr-krde nzesalz-krde. A' kxmule-esz' ncblo yrlqle nzesalz-krde mz kzdq da, a' kzdung mzli pokia. Delc na-aelwapx-ngrgu mz nqmq krgu kx pi-zvzku da angidr. X na-atutr-zvzku da kx piku. Mc Jon 8:44 x Jemes 5:12.
- t Nzrlaszngr 21:24; Livae 24:20; Lou Kcpwz 19:21
- u Nzycmnekr Jiszs angidr dese: Nzmu ncblo natwzle nim mz kot murde rpile nzkq scm kc tqyctxtr kai nangi scde, ka-kzpz lrpz ngr zbao scm.
- v Lou Kcpwz 15:9-11; Sam 112:5, 9; Nzyrplapxngr 19:17; Luk 6:35
- w Livae 19:18