Mapakantjanya 7

1 Nyangka Mama Kuurrtu watjarnu, “Wiya, nyuntuku kurta Yarantu nyuntuku wangka mawatjalku puurrpa Piirula. Tjiinyakurlu-rna ngayulu watjaranyangka ngayuku wangka kulira tjakultjunkupayilu-ya mawatjala yarnangu pirningka, palunyapirinypa. 2 Tjiinya nyuntulun Yaranta tjakultjunku ngayulu-rnanta watjalku wantinyangka. Nyangka Yarantu puurrpa Piirula mawatjalku ngayuku katja yurntalpirti-tjananyanta witultjaku. Nyangka-yayin palunyaku ngurra wantirra yarra. 3 Nyangka-rna puurrpa palunyanya yapupirinymanku witu-witu tirtu nyinarratjaku. Nyangkanta kulilkitjamunu. Tjiinya-rna kutjupa-kutjupa yartakanama ngurra Yiitjipula. Nyangkanta kulilkitjamunu. 4-5 Nyangka-rna pika purlkanya yutilku ngurra Yiitjipunyamartatjiku. Palunyalu-tjananyarnanta ngayuku katja yurntalpirti, tjiinya Yitjurayilku tjamupirti ngurra ngaanguru walara katiku. Nyangka-ya Yiitjipunyamartatji pirnilu nintilu kulilku tjiinya ngayulu-rna Mama Kuurrnga Puurrpa Purlkanya nyinarranyangka.” 6 Nyangka Mawutjanya-pula Yarannga kulira yanu puurrpa Piirula wangkakitja. 7 Tjiinya palunyatjarralpi Mawutjanya yirna purlkanya nyinarranytja, tjiinya-ra kurli 80 ngaralanytja. Nyangka palunyaku kurta Yaranku-ra kurli 83 ngaralanytja.

Yaranku Wana Lirrurringu

8 Nyangka Mama Kuurrtu-pulanya Mawutjala Yaranta watjarnu, 9 “Tjinguru-pulanyanta puurrpa Piirulu watjalku yayirninytjulu kutjupa-kutjupa yartakankutjaku. Nyangkayi nyakulalpi mula-mularriwa. Palunyangka watjala Yarantu palunyaku wana mantakutu warnitjaku puurrpa Piirula tjinangka. Nyangkayi lirrurriwa.” 10 Nyangka mularrpartu Mawutjanya-pula Yarannga yanu puurrpa Piirulakutu Mama Kuurrtu-pulanya watjarnu wantinyangka. Palunyalu Yarantunku wana mantakutu warningu puurrpa Piirula tjinangka puru palunyaku yamatji pirningka mirangka. Nyangka-ya nyangu lirrurringkunyangka. 11 Nyangka puurrpa Piirulu palunyaku maparntjarra pirninya yarltingu. Nyangka-ya pitjangu palunyapirinypartu palyaranytja. 12 Tjiinya-yanku wana warnirranytja. Nyangka-ya pirninyartu lirrurringu. Nyangka Yaranku wana lirrurringkutjatjanulu palunyaku-tjanampa lirru pirninya kuurltjunu wiyarnu. 13 Parturtu puurrpa Piirulu Mawutjanya-pulanya Yarannga tungun-tunguntu tirtu kulira wantirranytja. Tjiinya Mama Kuurrtu watjarnu ngarnmanymanu wantinytjanya, palunyapirinypartu.

Yarantu Kapi Pungkunyangka Yirramirringu

14 Nyangka Mama Kuurrtu Mawutjala watjarnu, “Puurrpa Piirulu yapupirinytju yarnangu pirninya witulkitjamunulu tirtu kanyinma. 15 Kulila-pula. Mungayurntura-pula pakala wana palunyanya lirrurringkutjanya mantjira makati kapi kantilykutu. Palunyalu-pula ngarala nyangama puurrpa Piirunya kapi yirralakutu mapitjanyangka lurrtjurriwa. 16 Palunyalu-pula ngaapirinypa watjala, ‘Mama Kuurrtu Yiipuru pirniku Puurrtu-rni witurnu nyuntula watjaltjaku. Palunyaku katja yurntalpirtinyu witula. Nyangka-yayi mapitja mayu-mayu nyinarranytjalu Mama Kuurrnga marninypuwa. Palunyapirinypa-rnanta watjaranytja. Nyangkan wangka palunyanya kulira wantirranytja. 17 Yuwa, nyuntulun nintirriku tjiinya Mama Kuurrnga Puurrpa Purlkanya nyinarra. Tjiinya-rna wana ngaangka kapi yirrala pungku. Palunyangka-yan nyaku kapi yirramirrinyangka. 18 Nyangka-ya kuka kapingkatja pirninya mirrirriku. Nyangka parnti purlkanya parntirrngarama. Nyangka-yan Yiitjipunyamartatjilu kapi purtu tjikinma.’ ”

19 Nyangka Mama Kuurrtu Mawutjala watjarnu, “Yarannga watjala wana ma-kanyiltjaku yirrala purlkanyawana puru kapi kurlunywanatarrartu. Nyangka-yayi yirramirri. Ngurra lipiwana-ya kapi pirninya yirramirriku puru wayatjarrangkatarrartu yirramirriku.”

20 Nyangka Mawutjanya-pula mularrpartu yanu kapi palunyakutu. Palunyalu-pula puurrpa Piirula puru palunyaku yamatji pirningka lurrtjurringu. Nyangka Yarantu mirangkartu-tjananya wana wakuralpi kapi pungu. Nyangka kapi yirrala Nayilnga yirramirringu. 21 Nyangka-ya kuka kapingkatja pirninya mirrirringkula-wanarnu wiyarringu. Nyangka parnti purlkanya parntirrngaralanytja. Nyangka-ya Yiitjipunyamartatji pirnilu kapi palunyanya purtu tjikira yakuntjuranytja. Tjiinya kapi ngurra lipiwanartu yirramirringu ngarrirranytja. 22 Nyangka-ya puurrpa Piiruku maparntjarra pirnilu palunyapirinypartu palyaranytja. Parturtu puurrpa Piirulu Mawutjanya-pulanya Yarannga tungun-tunguntu tirtu kulira wantirranytja. Tjiinya Mama Kuurrtu watjarnu ngarnmanymanu wantingu witu-witu nyinarratjaku, palunyapirinypartu. 23 Nyangka puurrpa Piirunya wantirra marlaku mapitjangu palunyaku ngurrakutu. 24 Nyangka-ya Yiitjipunyamartatji pirnilu kapi yirralangka kantilytja tjawaranytja kapi tjurnu tjikilkitjalu. Tjiinya-ya kapi yirralangkatja purtu tjikiranytja. 25 Nyangka ngurra 7-tjanu kapi palunyanya marlaku walykumunurringu.

<- Mapakantjanya 6 Mapakantjanya 8 ->