1 Pwen tehen tora ko wawu ndramat mepo ngara wawu karasusut nongan kiya kili hamou, ara wawu kanlahiy para kandrihisani mwomwan pwi, paratesah, sehe nongan wawu karasusut kiya kili hamou, ara wawu tora pwalngani wawu mbukenan, paratesah wawu mepo wawu rasusut nongan, ara wawu ngara kambusi hu melit kiya wule tehen aliy opu. 2 Pe worou pahasaniy tehe tamwanye ta Ngindrai ara imwonen pe ndrokonan iya kili hu mepo ngara hu kambusi hu kultuw aro. 3 Pwen pe wou mepo ndramat o mwaihei arasusut nongan iya kili hu, pe wou ngara ambusi hu melit tehen aliy i, ara apa andre wou awop tamwanye ta Ngindrai, ndre? 4 Ndre wawu nime namiliwa Ngindrai, ara tehe mwaihei opu, namiliwan ara namandran, pe ngara kiramwaitini hu nopwaran pe ngara kiro tine pwokeyan. Pe anyirowei tehe namiliwa Ngindrai ara ita luwani wou para arapaiwani ndriyam, ara pwi.

5 Hapeko tunan payam pwokeyan pe mbuwalim para arapaiwani ndriyam, pwen atapo sura kora mwomwan isa kili wou mbukenam, kiro mwonen lenge ndrina lokuh ta Ngindrai, pe tamwanye imwonen tan kirayah. 6 Pe Ngindrai, ara andre kiyki kene ndramat hamou-hamou, ara kiho ndruwa tesah kinmbusi. 7 Pe yihu mepo ngara koro mbusi kultuw hiyan, ara andre kimbusi hu mangalahu, pe andre kihaiyani hu pe Ngindrai andre kiyki taleh kiya kili hu. 8 Hapeko yihu mepo ngara hu kalohongani hu mbukenan, pe hu ndrihisani nongan ndrokonan pe huho ndruwa kultuw mwomwan, ara andre hu kawiri koran hu pe hu kawiri ndrina lokuh ta Ngindrai. 9 Pe nopwaran pe ngandran andre kiwiri hu ndramat masih mepo humbusi kultuw pwassin, andre kiya kili hu Yutah kimu, pwen kiya kili hu Ndramira Lah. 10 Hapeko hu ndramat masih mepo hu ngara kambusi kultuw hiyan, ara Ngindrai andre kiyki ngannganan kiya kili hu, pe kihari ngalahu, pe kiyki ndriya wayis kiya kili hu: andre kiya kili hu Yutah kimu na, pwen kiya kili Ndramira Lah. 11 Paratesah, Ngindrai ara kinho hire pwi.

12 Pe hu masih mepo ngara hu kambusi pakut mwomwan kinto ndruwa nongan para pwahanou pwi, ara andre hu kawiri kora mwomwan ta hu kinto ndruwa nongan para pwahanou pwi. Pe hu mepo huro pahandra nongan para pwahanou pe humbusi pakut mwomwan, ara andre hu koro tine nongan kiyau nongan para pwahanou. 13 Paratesah, kultuwaye ndramat hamou andre kinmwonen kapa kihilingi Nongan para Pwahanou pwi, hapeko yihu mepo huho ndruwa nongan para pwahanou, ara andre Ngindrai kipohowe hu ndramat imwonen. 14 Pe hu Ndramira Lah ara nongan para pwahanou kinto kili hu pwi, nongan para pwahanou tahu ngara hu kambusiy, ara yihu ngara kambusi tesah nongan para pwahanou ipwai. Pe yihu ara manongan para pwahanou tahu mbukenan, konan kapa nongan para pwahanou kinto kili hu pwi. 15 Pe kultuwaye hu ara iyinganiy tehe nongan para pwahanou, ara Ngindrai kintatuluwiy ita ndriyahu, pe lohongahu ipwoke iya aliy. Pe lang hayah lohonga hu ngara kipwasike hu mbukenan, pe lang hayah lohonga hu ngara kipenani hu. 16 Pe hu lohongai kokohon tahu ndramat, ara Ngindrai andre kiyki hu koro tine nongan kiyau kili Yesu Kristus kiro mwonen lang para tamwanye. Pe melit aro andre kirayah kiyau nongan hiyan urupo pohowei iye.

17 Hapeko kapa apohowe wou Yutah hamou, pe aiki lohongam masih kiya nongan para pwahanou, pe asikiye wou tehe wou ara ata Ngindrai, 18 pe kapa apahasani namiliwai pwokeyan atan, pe tesah mepo ihohin, paratesah, anpahas kinna nongan para pwahanou, 19 pe kapa lohongam kipwoke tehe andre aluwani hu ndramat marahu iyoh, pe arayah ngana sui sih kiya kili hu mepo hu tora lokuhan, 20 pe arayah ndramat hamou para hinuwani hu ndramat mepo lohongai waison kili hu pwi, pe arayah ndramat hamou para hinuwani hu ndramat mepo lohongahu kiniman pwi, paratesah, nongan para pwahanou ara iyki lohongai hiyan pe nongan ndrokonan— 21 pwen pe wou mepo ngara ahanuwani hu ndramat hayah, ara ngara ahanuwani wou mbukenam, ndre pwi? Wou mepo ngara apohowe nongan para mbuna kapahana, ara ngara apahana, ndre pwi? 22 Wou mepo ngara apa hu ndramat mbuna kapopilah, ara ngara apopilah, ndre pwi? Wou mepo ngara apa mbuna akatotohun kiya kili hu kerewek, ara ngara apahana hu kerewek nondriya hu yumwa totohun namandran, ndre pwi? 23 Pe wou mepo ngara asikiye wou tehe apahasani nongan para pwahanou, ara antanuhuyani Ngindrai pwi, pe ngara andrihisani nongan para pwahanou. 24 Pwen tehe pwayan kinpwai toro: <<Tunan wawu Yutah opu, pwen hu Ndramira Lah, ara hu pwasimiri ngala Ngindrai.>>

25 Pe kapa kultuw para sosondrih sangi ndramat ara mahaiye para aliy kapa wawu koho ndruwa nongan para pwahanou, hapeko kapa wawu konto ndruwan pwi, pwen kultuw para sondriti sangi ndramat, ara irayah melit o mwaihei opu. 26 Pe kapa hu mepo kansondriti sangi hu pwi, ara hu tokuyani nongan para pwahanou, pwen Ngindrai andre kinime hu tehe hu sondriti sangi hu, ndre pwi? 27 Pe yiy mepo kinsondriti sangin pwi hapeko iho ndruwa nongan para pwahanou manau, ara andre kirasusut nongan kisa kili wawu Yutah mepo kantatuluwi nongan para pwahanou ita kili wawu, para sondriti sangi wawu. Paratesah, nongan para pwahanou ita kili wawu, hapeko wawu kantokuyaniy pwi.

28 Pe kapa ndramat hamou kinsosondrih sangin, sosondrih ara, ara kinyingani yiy tehe yiy Yutah hamou, ara pwi. Kultuw para sosondrih ara, ara kinwong kinna sosondrih para nombuwe ndramat o pwi, hapeko iwong iya sosondrih para ndriya ndramat. 29 Hapeko ndramira Yutah ndrokonan, ara yiy mepo ndriyan iro mwonen iya kili Ngindrai. Pe kultuw para sosondrih sangi ndramat ara sosondrih para ndriya ndramat, pe iyau kili Mwoiwan Haiyan, pe kinyau nongan para pwahanou mepo kanratuluwiy, ara pwi. Pwen ndramat tehen tora, ara andre Ngindrai kipwesani yiy, pe ndramat hayah andre kinpwesani yiy pwi.

<- ROM 1ROM 3 ->