1 Pwen Yesu iyapolo ndramiran hu, hutali haroh para Ndran Makaiye Kaliliy, pe huya haroh iyapwen te kol namandran hape ngalan Kerasa. 2 Pwen huyarayah o, pe Yesu iropo isa mawen nondriya ndroi, ara ndramat hamou isa mawen hu ngare hu ndramat kanmat. Ndramat ara, ara payit iro ndritan, pe isa pe ipohonani Yesu. 3 Pe yiy ngara kiro matin nondriya hu ngat sou, pe kinlahi hamou para kiwasi yiy kiya wasiu ndre malkei handra-handra pwi. Konan kapa hu kawasi yiy kiya malkei hayen[a] ndrahandringon, hapeko malkei masih, ara kinlahiy pwi ko. 4 Paratesah, hu kanwasi yiy pwen lang soyon kinna iya wasiu pwokeyan iya. Huwasi niman pe ndrikan iya kondrei hupaltaniy iyau hayen, pe malkei hayen i,[b] hapeko kinlahiy pwi yi. Masih kene ara, ara indrohomwiri hu topwei, pe hamou kinlahiy para kipwahatini yiy pwi masih. 5 Lang pe ping sih tehe sih ngara kihombui ngarasou sih kiya sih pe ngondron sih kiya sih, pe ngara kilomei pe kisondriti yiy mbukenan kiya hu pat.

6 Pe iro mwonen inime Yesu iho ndron mwanan hape, ara ingap iya kili yiy pe ihikuwani ngundrun iya ngondro ndrika Yesu 7 Pe iwayeh namandran iya, ipa, <<Yesu, Noru Ngindrai Kamai Iyera Paingan Iya, wou nasa sahaye yo? Upwai tisingiy isa kili wou iya ngala Ngindrai, mbuna aiki ngandran sato.>> 8 Iwayeh toro, paratesah, Yesu kinpwai kinna kili yiy, ipa, <<Wou payit mwomwan, asa mawen kili ndramat ara.>>

9 Pwen Yesu isike yiy, ipa, <<Ngalam hiyeh?>>

Pe ipwai, ipa, <<Ngolo, ara Hundram,‡Iya nongna kol tahu Krik, ngalan <<Hundram>> (Latin/Greek: <<Legion>>) iyinganiy tehe hu payit soyo-soyon iya hutora ndrita ndramat ara. Eng: Legion; a Roman legion was a large group of soldiers; sometimes there were 5,000 to 6,000 men in one legion. paratesah, yowu soyon iya.>> 10 Pwen yiy iro rakekeyani Yesu ken iho ken para mbuna kirapiyani yihu payit mwomwan kaya mawen kili kol namandran ariya.

11 Pwen hu puw hayoi soyon iya, ara huro susuwan iya sese parangondron haroh pakeh kili hu. 12 Pwen pe hu payit hurakekeyani Yesu, hupa, <<Apa hiyan kisata yowu para yowu kaya ndrita hu puw.>> 13 Pwen Yesu ipa hiyan para hu kaya. Pwen hu payit hutali ndramat ara, pe huya nondriya hu puw. Ndromwoya hu puw ara iho pakeh malpou (2,000). Pe hu puw, ara huwop turut, pe hurapak mbusupahayi huya pwan, pe huya yos huya ndran makaiye. Pwen pe huya mut topwei.

14 Pe hu ndramat para hangna puw hunimei pe huwop, pe huya tiyaniy iya kol ngawan pe hu kol mendreheh pakeh kili hu. Pwen pe hu ndramat para hu kol ara, ara husa nime sehe melit irayah. 15 Pwen husarayah husa kili Yesu, pe hunime ndramat mepo mamu hu payit soyon iya huro ndritan, ara kinsuluyani yiy pwen kinna koyau, pe lohongan kinileu pe irompwan. Pwen hunime ndramat ara pe hunoh. 16 Hu ndramat mepo hunime melit masih kantayah, ara hutiyani melit masih kene irayah iro kili ndramat mepo payit iro ndritan; pe hutiyani titiye tahu puw i. 17 Pwen pe hurakekeyani Yesu para kitali kolohu pe kiyau kiya mawen.

18 Pwen Yesu iro his nakiya nondriya ndroi, pe ndramat mepo mamu payit iro ndritan, ara irakekeyani Yesu para kihis kiyasura yiy. 19 Hapeko Yesu ara kinsomwi yiy pwi, pe ipwai iya kili yiy, ipa, <<Amui aya kili ndramiram hu, pe apwai kiya kili hu kiya melit masih Yapan kinmbusiy pwen kinsa kili wou, pe atiyani koisirai tan mepo kinsopwat wou kinna aliy.>> 20 Pwen ndramat ara, ara iyau iya hu kol namandran para Tekapolis[d] pe iro tiyani melit masih Yesu kinmbusiy kinna kili yiy. Pe hu ndramat, ara huhilingiy pe huro lohonge ndrit.

21 Pwen Yesu imui iya haroh para ndran makaiye paiwe yi, pe hu ndramat soyon iya huya rawure hu huro sura yiy. Pe huro pakeh pwaki ndran makaiye. 22 Pwen ndramat mepo pohon hamou para yumwa mbultere tahu Yutah ara isa kili yiy; yiy ara ngalan Yairus. Pe iro mwonen inime Yesu, ilah iya pwan ngondrokan. 23 Pe irakamam iya kili yiy, ipa, <<Noru pihindrahin, ara imwa kinna mwomwan masih, pe pakeh nakimat. Asa pe aiki nimam kiya kili yiy pe asopwoyani yiy pe andre kingoh pe kiro mwalen.>> 24 Pwen Yesu irikai iyapolo yiy.

Pe hu ndramat soyon iya huho ndruwan, pe hurakayani yiy pe huro tandrapndrap. 25 Pe pihin hamou iro mwalingahu, ara mwamwa ndrai iro kili yiy iho nondriya hayou songui pe luwoh. 26 Pe iropo iya nime hu ndrokta soyon, hapeko huroiki ngandran namandran iya imui iya kili yiy. Pe singayai tan masih iro kili yiy, ara iro piye topwei o mwaihei iya kili hu. Hapeko mwamwa tan, ara kinhipwen pwi yoh; iro wiri yiy iya mwomwan masih. 27 Pe iro mwonen ihilong titiye ta Yesu, ara isa iho yau mwalinga hu ndramat soyon iya ara, pe niman iyahatek iya payango koiwe Yesu. 28 Paratesah, lohongan ipa, <<Kapa kuiki nimo ko kiyahatek kiya payango koiwen, pwen andre kurayah hiyan.>> 29 Pe indrou pwi ko, mwamwa ndrai tan ihipwen; pe ihingorowei tehe mandran imwak pe kinmwoimwoi pe kiningoh.

30 Pe indrou pwi ko, Yesu ihingorowei tehe pwoke kintali yiy kinna mawen, pe ipaiwani yiy iho mwalinga hu ndramat, pe isok hu, ipa, <<Hiyeh ndrokonan niman kinsahatek kinsa koiwe?>>

31 Pwen ndramiran hu husike yiy, hupa, <<Paratapeh asok tora? Animei, hutopo tandrapndrap sura wou.>>

32 Hapeko Yesu maran iro hiselep pe iro ten hiyeh ndrokonan kinmbusiy. 33 Pwen pihin ara, ara ipahasani sehe melit kintayah kili yiy, pe inoh turuwe yiy. Pwen ilah iya pwan mbulmara Yesu, pe itiyani melit masih ndrokonan kintayah kili yiy iya ngawan kili Yesu. 34 Pe Yesu ipwai iya kili yiy, ipa, <<Noru, lohongai ndrisiyon tam ara imbusi wou antayah hiyan. Ayau ayapolo ndriya wayis. Pe ngandran aro nondriyan ara kintali wou.>>

35 Yesu iro wong manau, pe hu ndramat hayah husarayah. Hu ndramat ara, huyau seu kili Yairus, yiy pohon para yumwa mbultere tahu Yutah. Husa pe hupwai iya kili yiy hupa, <<Norum pihin kinmat pwen. Konan. Paratapeh pe atarakekeyani ndramat para hinonou ara para kisa manau.>>

36 Yesu iro hilingi hu, hapeko kiniyki ndraingan kinna nongnahu pwi. Pe ipwai iya kili Yairus, ipa, <<Mbuna anoh; apwotisingi lohongam opu.>>

37 Pe ipa mbuwalin para hamou kiho ndruwan. Hu ndramiran matimou opu—Pita, Yamis, pe iyasura nalin Yohanes—hu ara ko, ipa hiyan para hu kaya sura yiy. 38 Pe iro mwonen huyarayah huya seu ta Yairus, ara Yesu inimei tehe hu kanpiye hu kanna ndriyang; pe huro rang turut pe ngaliya hu iropo iya namandran iya. 39 Pwen Yesu iya nondriya seu pe ipwai iya kili hu, ipa, <<Paratesah wawu rang, pe ngaliya wawu, ara iya namandran iya? Mbunah ara, ara kinimat pwi; hapeko ita matin.>> 40 Pe huhaisani yiy.

Pwen irasses hu masih huya ngawan, pe iwiri tama mbunah pe tinan, iyapolo ndramiran hu matimou, huya nondriyan hapeleheh mepo mbunah ara iyen aliy. 41 Pwen imbultuwe nima mbunah ara pe ipwai iya kili yiy, ipa, <<Talita, koum.>> Ndroiyi nongna kolo hu, ara ipa toro: <<Pihindrahin, upwai isa kili wou, atine.>> 42 Pwen indrou pwi ko, pihindrahin ara itine pe iro tikai, pe hayou tan ara songui pe luwoh. Pe hunimei, pe mwoiwahu ihin namandran iya, pe hunun o. 43 Pwen Yesu ipwatisingi nongnan iya kili hu para hu mbuna karanenese sehe melit irayah. Pe ipwai iya kili hu para hu kahang pihindrahin ara hape anandrinai.

<- Mak 4Mak 6 ->