1 Pwen porosih i, Yesu iya nondriya yumwa mbultere tahu Yutah, pe ndramat hamou iro aliy, ara niman hakip imat. 2 Pe hu ndramat hayah huro ten sai para hu kaiki Yesu kiya nongan. Pwen pe huro memerani yiy, paratesah, lohongahu hupa ndre kiya pe kirakultuwani nima ndramat ara kiya hiyan kiho nondriya lang Sapat. 3 Pwen Yesu ipwai iya kili ndramat niman imat ara, ipa, <<Asoro tine mbulmara hu ndramat masih iye.>>

4 Pwen Yesu isike hu, ipa, <<Tesah ndrokonan ita nongan para pwahanou para kambusiy kiro lang Sapat? Kambusi hiyan ndre kambusi mwomwan? Kasopwat ndramat ndre katingundru ndramat kimat?>> Hapeko hu ndramat masih, ara huhun o huyen.

5 Yesu maran ihiselep iya kili hu, pe ndrinan ilokuh pe inimei tehe ndriyahu kanpwoke, pwen pe ndriyan irang. Pe ipwai iya kili ndramat aro, ipa, <<Amwaniyani nimam.>> Pwen ndramat ara, ara imwaniyani niman, pe niman irayah hiyan masih tehe mamu. 6 Pwen hu Parisiy huya ngawan, pe yihu iyasura hu ndramira King Herot, pe humburi nongan para katingundru Yesu tapeh.

7 Pwen Yesu itali kol ara iyapolo ndramiran hu, pe huyau huya Ndran Makaiye Kaliliy. Pe hu ndramat soyo-soyon iya para kol malkol namandran hape Kaliliy pe Yutiya, ara huho ndruwan. 8 Pe iro mwonen huhulingi melit soyon iro mbusiy, pwen hu ndramat soyon mepo huyau te Yerusalem, Yitumeya, haroh para Ndran Yortan, pe pakeh kili kol malkol Tayar pe Siton, ara husa kili yiy. 9 Hu ndramat hurohon huya soyon iya; pwen pe Yesu ipwai iya kili ndramiran hu para hu kamwaniyani ndroi hakou mendreheh kiro mwoimwoi, paratesah, kol ipep pe huro tandrapndrap iya kili yiy, pe matisan hu katinihi yiy. 10 Paratesah, Yesu isopwoyani hu ndramat soyon iya, pwen pe hu ndramat humwa iya mwamwa handra-handra, ara huro rasisinge hu huropo huya para nimahu kahatek katan. 11 Pe hu ndramat mepo hu payit iro ndritahu, ara hunime Yesu, pe hulah huya pwan huro mbulmaran, pe huwayeh namandran iya, hupa <<Wou ara Noru Ngindrai Kamai.>> 12 Hapeko Yesu ipwandrandrahani hu payit pe isiyi poho hu para hu mbuna katiyani yiy.

13 Yesu ingas iya iro ngondron sih, pe iyoh hu ndramat mepo inamili hu ko, para yihu kasa kili yiy. 14 Pwen Yesu irakinima hu ndramat songui pe lumou para hu koro sura yiy, pe karayah ndramat para kipwandrisa hu para pohoweya nongna Ngindrai. Pwen pe iyoh hu, ara hu aposel.[a] 15 Pe iyki pwoke nopwaran iya kili hu, para hu karasses hu payit kaya mawen. 16 Hu ndramat songui pe lumou ara, ara ngalahu iye kene: Simon (Yesu ipohowe ngalan handra yi, ara Pita); 17 Yamis NdraSepetiy iyapolo nalin Yohanes—Yesu, ara iyoh hilu tehe Powanerkes. Ndroiyi lohonga ngala hilu, iya nongna kol tahu, ara ipa <hilu noru palan>— 18 Antruw, Pilip, Partolomeu, Mattiu, Tomas, Yamis NdraAlpeyus, Tatteyus, pe Simon yiy hamou ta hu Selot,[b] 19 pe Yutas Yiskariyot, mepo iyamulan iratuni Yesu.

20 Pwen Yesu iyau iya nondriya seu hawum, pe hu ndramat soyon iya, ara husa mbultere hu paiwe. Pwen pe Yesu iyasura ndramiran hu, hu kanlahiy para hu kanamnam, ara pwi. 21 Pwen hu ndraisih imwonen ta Yesu huhulong, pwen pe husa pakasa wiri yiy, paratesah, huro pa, <<Lohongan kinna pwi.>>

22 Pe hu ndramat para hinuwani nongan para pwahanou ara hupwen Yerusalem husa pwan, pe hupa, <<Peelsepul[c] ita ndritan. Pwen pe ita rasses hu payit, ara iyau pwoke ta payit mepo yapane hu payit masih.>>

23 Pwen Yesu iyoh hu husa kili yiy, pe iwong nongan pwandritiye iya kili hu, ipa, <<Tehen tapeh andre sinai kirasses sinai? 24 Kapa kolo king mepo ngara kiro mu kiya aliy ara, ara kihingas kiya kili yiy mbukenan, pe kamasilpat kiya malpat, pwen andre kinlahiy para kiro tine pwokeyan pwi. 25 Pe kapa hu ndrai sih para seu hawum kahangas mwalingahu mbukenan, pe kamasilpat kaya malpat, pwen andre seu ara kinlahiy kiro tine pwokeyan pwi. 26 Pe kapa Sinai kipo pahun kiya kili yiy mbukenan, pwen andre yiy kinlahiy kipwokeyani yiy mbukenan pwi. Andre yiy kihipwen masih. 27 Tehen tora ko, kinlahi ndramat kisong kiya nondriya suwe ndramat hamou pwokeyan, pe kiya po hu meltan, ara pwi. Kapa nakimbusiy tehen tora, ara andre kiwasi tiriyi ndramat pwokeyan ara kimu na. Pwen andre kilahiy para kiya pe kilokihi topwe menmena ndramat ara. 28 Pwen upwai ndrokonan sa kili wawu toro: Ngindrai ilahiy para kitali hu pakut mwomwan handra-handra masih, pe nongan handra-handra ngara hu ndramat kipwasisiman ana hu ndramat kaliy. 29 Hapeko kapa ndramat hamou kipwasisiman ana Mwoiwan Haiyan, ara Ngindrai andre kintali mwomwan ariya pwi. Mwomwan aro, ara andre kinto-kinto. Pakut tan ariya, andre kiro manau ndritan. >>

30 Yesu ipa toro, paratesah, huro pa, <<Payit iro ndritan.>>

31 Pwen tina Yesu iyasura nalin hu husarayah husa pe huro tine ngawan, pe hupwandrisa ndramat hamou para kiya pwai kiya kili Yesu para kisa kili hu. 32 Hu ndramat soyon iya hurompwan pe hurahakowan, pe hupwai iya kili yiy, hupa, <<Tinam pe nalim hu, ara hutora ten wou ngawan.>>

33 Yesu isomwi hu pe isike hu, ipa, <<Hiyeh ndrokonan ara tino pe nali hu?>>

34 Pwen maran ihiselep iya kili hu mepo hurompwan pe hurakayani yiy, pe ipa, <<Akanimei, hu iye ara tino pe nali hu. 35 Pe ndramat mepo kimbusi namiliwai pwokeyan ata Ngindrai, ara yiy nali, pisu, pe tino.>>

<- Mak 2Mak 4 ->