1 Pwen pe Yesu itiyani nongan pwandritiye paiwe yi, ipa toro: 2 <<Kolo king mepo ngara kiro mu kiya aliy para kol paingan yang, ara tehe king hamou ihikule yiy iya kowase yon ta norun kamai nakiyesou. 3 Pwen ipwandrisa hu ndramat para poya mbulyan, para hu kaya pwai kiya kili hu ndramat mepo kinpwanos hu para hu kasa kowase yon, hapeko mbuwali hu para hu kasa.

4 Pwen ipwandrisa hu ndramat para poya mbulyan hayah i, peipa, <Akayapwai kiya kili hu mepo kunpwanos hu para hu kasa ara, tehe yo kunponokulani anandrina kowase yon to pwen. Hu mbulmwakau pe hu kan ato mepo sangihu imuh, ara kanitingundru hu, pe hu melit masih, ara kinmwoimwoi o iripo. Wawu kasa kowase yon para yesou.>

5 Hapeko hu kaniyki lohongahu kinna nongna hu ndramat para poya mbulyan pwi, pe huyau—hamou iya pingen, pe hamou, ara iyapo mbulyan para kipo singayai. 6 Pe hu masih humbultuwe tahatini hu ndramat para poya mbulya king, pe hurandroyani hu pe hu tingundruhu. 7 Pwen king ara ndrinan ilokuh, pe ipwandrisa hu ndram huya, pe hupwalngani topwe hu ndramat para tingundru hu ndramat ara, pe hutimwi kol namandran tahu.

8 Pe ipwai iya kili hu ndramat para poya mbulyan, ipa, <Yon para kowase yesou ara kinmwoimwoi o iripo, hapeko yihu mepo upwanos hu, ara hu kantewihiy para hu kasa pwi. 9 Pwen akaya hu payango sai, pe akapwanos hu mepo akanime hu, para hu kasa kowase yon.> 10 Pwen hu ndramat para poya mbulyan, ara huya hu payango sai, pe hurawure hu ndramat masih mepo hulahiy para hu kakahi hu, hu hiyan pe hu mwomwan kene. Pe yumwa yesou, ara ipep iyata hu ndramat mepo pwanos hu ara.

11 Hapeko iro mwonen king isa nondriyan para kinime hu ndramat mepo hupwanos hu ara, ara iyirowei tehe ndramat hamou iro ariya, ara kinsuluye yiy kinna koiwe yesou pwi. 12 Pwen isok, ipa, <Kowase, asa nondriyan iye tapeh, pe ansuluye wou kinna koiwe yesou pwi?> Pe ndramat ara inun o iro.

13 Pwen king ipwai iya kili hu ndramat para poya mbulyan, ipa, <Akawasi tiriyi niman pe ndrikan, pe akasoyau kiya tan kiya ngawan kiya nondriya kol lokuhan, mepo ngara hu koro rang malihu pe koro yandrisingi koltahu.>

14 Paratesah, Ngindrai kinpwanos hu ndramat soyon, hapeko irakinima hu noye ko.>>

15 Pwen hu Parisiy huya ngawan pe humburi nongan para hu karatuni Yesu kiya nongnan tapeh. 16 Pe hupwandrisa hu ndramira Parisiy hayah huyapolo hu ndramat hayah para kili Herot, pe huya kili Yesu, pe hupa, <<Ndramat Para Hinonou, yowu pahasaniy tehe wou, ara ndramat para nongan ndrokonan opu, pe ngara ahanuwani hu ndramat kiya meresaya Ngindrai kiho ndruwa nongan ndrokonan. Pe wou anhoyos kinna nima hamou pwi, paratesah, wou anoho hire hu ndramat pwi. 17 Pwen apwai kisa kili yowu na; lohongam tapeh? Hiyan para yowu kayuk takis kiya kili Sisar, ndre pwi?>>

18 Hapeko Yesu ara kinyirowe lohongai para pwakekeriu pwassin tahu, pe ipa, <<Wawu ndramat para pwandrandraman, paratapeh pe wawu pakanohonou para karatuni yo? 19 Kiya akapwaingani sombule pat mepo ngara kayuk takis kiya aliy kisa kili yo.>> Pwen huwiri sombule pat hambut iya kili yiy. 20 Pe Yesu ipwai iya kili hu, ipa, <<Aripo sumwoiwa hiyeh iye, pe ngala hiyeh iripo aliy?>>

21 Pe husomwi yiy, hupa, <<Ata Sisar.>>

Pwen Yesu ipwai iya kili hu, ipa, <<Pwen pe akaiki tesah ta Sisar kiya kili Sisar, pe tesah ata Ngindrai kiya kili Ngindrai.>>

22 Pe iro mwonen huhilingi nongan aro, ara lohongahu indrap. Pwen hutali Yesu pe huyau.

23 Pe iho nondriya lang ara ko, hu Satyusiy, mepo hupa ndre hu ndramat kanmat pwen, ara andre hu kantine paiwe pwi, ara husa kili Yesu iyapolo soksok sahin. 24 Pwen hupa, <<Ndramat para hinonou, Mose kinpwai kinsa kili yowu, tehe kapa ndramat hamou kiyesou, hapeko kinpo mbunah pwi, pe kimat, andre nalin kisoli paranawe nalin, pe kipo norun kiya soiwi nalin. 25 Pwen hu ndramat manandrtimou hu nalihu huye mwalinga yowu. Yiy ndrohan ara iyesou pe imat, pe kinpo norun pwi. Pe nambuyun ihou pe nalin iwiri yiy. 26 Pe kinrayah tehen aliy opu iya kili mundruwa ndrohan, pe parahara mundruwa ndrohan, pe hu manandrtimou kene. Hu masih ara huwiri pihin ara, pe noruhu pwi ko, pe humat topwei. 27 Pe iyamulan masih pihin ara, ara imat i. 28 Pwen pe kiro mwonen lang para hu ndramat kasa tine paiwe, pwen pihin ara, ara andre kirayah nambuyu hiyeh ndrokonan, paratesah, hu manandrtimou kene ara, ara hamou-hamou tahu iwiri pihin ara tehe nambuyun?>>

29 Pwen Yesu isomwi hu, ipa, <<Lohongan wawu kinmwonen pwi, paratesah, wawu kanpahasani hu Nongna Ngindrai pe pwoke ta Ngindrai pwi. 30 Paratesah, kiro mwonen Ngindrai kihingini hu ndramat hu kasa tine paiwe, ara yihu andre kanyesou pwi, pe andre hu kansokombut yesou pwi yi. Yihu andre hu koro ko tehe hu angelou tora kol paingan yang. 31 Hapeko iya lohongai para hu ndramat kanmat pe kasa tine paiwe—wawu kannime tesah mepo Ngindrai kinpwai kinsa kili wawu pwi, ndre? 32 Yiy ipwai, ipa, <Yo ara Ngindrai ta Apraham, pe Ngindrai ta Yisak, pe Ngindrai ta Yakop.>[a] Pe yiy ara Ngindrai tahu ndramat mepo hu kanmat, ara pwi, hapeko yiy ara Ngindrai tahu ndramat hutopo mwalen.>>

33 Pe iro mwonen yihu ndramat soyon ara huhilingi nongan aro, lohongahu, ara indrap iya hinonou tan.

34 Pe iro mwonen yihu Parisiy huhilingiy tehe Yesu iyki tamum iyata hu Satyusiy, pwen yihu Parisiy hurawurehu huya harong. 35 Pe hamou tahu mepo lohongan iman iya nongan para pwahanou, ara inohonou Yesu iya soksok sahin, ipa toro: 36 <<Ndramat para hinonou, sehe nongan para pwahanou, ara ihohin iya, ita nondriya hu nongan para pwahanou masih?>>

37 Pe Yesu isomwiy ipa, << <Ndriyam kimbuluhi Yahweh Ngindrai tam kiya ndriyam masih kene, pe kiya mwoiwam masih kene, pe kiya lohongam masih kene.> 38 Nongan para pwahanou iye, ara iya mu pe ihohin iya, ita nondriya hu nongan para pwahanou masih. 39 Pe nongan para pwahanou luhin para aliy, ara tehen aliy i, pe ipa toro: <Ndriyam kimbuluhi yiy para pakeh kili wou, tehe ndriyam ngara kimbuluhi wou mbukenam.> 40 Nongan para Pwahanou masih pe Nongna hu Poropet, ara nongan malhin iye, ara ihohin iya, pe ndroiyi hu nongan para pwahanou masih.>>

41 Pwen iro mwonen hu Parisiy hurawure hu huro harong, Yesu isok hu, ipa, 42 <<Wawu lohongani tapeh iyata Mesayah? Yiy ara noru hiyeh?>>

Pe husomwi yiy, hupa, <<Noru Tepit kamai.>>

43 Pe Yesu ipwai iya kili hu, ipa, <<Tehen tapeh ndrokonan pe Mwoiwan Haiyan iwong iyau poho Tepit, pe Tepit ipohowe Mesayah, ara <Yapan>? Paratesah, Tepit, ara ipa toro: