Mattiu 13

Nongan pwandritiye ta ndramat para piyeya peke wit

1 Pe iro mwonen lang ara ko, Yesu itali seu iya ngawan pe iya pe impwan ngilse ndran makaiye. 2 Pe hu ndramat soyo-soyon iya, ara husa rawure pe hurahakowan. Pwen iya pe ihis iya nondriya ndroi hakou pe impwan aliy, pe hu ndramat masih, ara huro tine pwaki leng. 3 Pwen itiyani hu titiye soyon, iya kili hu iya nongan pwandritiye. Pe ipwai ipa, <<Ndramat hamou para mbulya piyang iya piye hu peke wit tan. 4 Pe iro mwonen iro piye hu peke wit, hu tiken para aliy, ara hulon huro sai. Pe hu norukan husa pe huiniy topwei. 5 Pe hu tiken i, ara hulon huro ndrita pwan sosolou, mepo pwan soyon kinto aliy pwi. Pe indrou pwi ko, husahambunet, paratesah, pwan kinna hangoh mbulun pwi. 6 Hapeko iro mwonen mwandrai ingas, ara ngandraha mwandrai itimwi hu mepo hulek ara, pe huwayiu, paratesah, ngondrohu kansin hiyan pwi, pe humang. 7 Pe hu peke wit tiken, ara hulon huya mwalinga hu malkei maporon, pwen hu malkei maporon, ara hulek iyasura hu peke wit ara, pe huraimwani hu pe humang. 8 Pe hu peke wit tiken i, ara hulon huya ndrita pwan hiyan, pe hulek pe huppwai, pe sangihu ihon iya soyon iya, tehe peke wit sih iyki peken masangat ndre manongui ndre matingui. 9 Pwen yiy mepo mandraingan, ara kihilingi nongan iye.>>

10 Pe ndramiran hu husa kili yiy pe husok, hupa, <<Paratapeh atawong iya kili hu ndramat iya hu nongan pwandritiye?>>

11 Pe isomwi hu, ipa, <<Lohongai kokohon para kolo king mepo ngara kiro mu kiya aliy para kol paingan yang, ara Ngindrai kiniykiy kinsa leu kinsa kili wawu, hapeko yihu, ara pwi. 12 Paratesah, ndramat mepo mamenmenan, ara andre kipo suran. Hapeko yiy mepo menmenan pwi, konan hape sohoyan kimin, ara andre kawiriy topwei kiya mawen kili yiy. 13 Pwen tehen tora ko, urupo wong hu nongan pwandritiye iya kili hu:

<Ngara hu koro nimei, hapeko tehe hu kannimei pwi;

pe ngara hu koro hilingiy, hapeko tehe hu kanhilingiy pwi, ndre lohongahu kanileu pwi.>

14 Pe nongan sahin ta poropet Yisayah, ara irayah mannan isa kili hu ndramat aripo, ara ipa toro:

<Lang masih wawu andre koro hilingiy, hapeko lohonga wawu, ara andre kinileu pwi.

Pe lang masih andre wawu koro nimei, hapeko tehe wawu kanyirowei pwi.

15 Paratesah, ndriya hu ndramat aripo, ara kanpwoke, pe ndraingahu, ara pakeh kayui, pe marahu, ara kanpwasi. Matisan marahu kanimei, pe ndraingahu kahalingiy, pe lohongahu kaleu, pe hu karapaiwani ndriyahu pe hu kasa kili yo, pe andre kusopwoyani hu.>[a]

16 Hapeko lomwes, ara ita mara wawu, paratesah, mara wawu ita nimei. Pe lomwes, ara ita ndrainga wawu, paratesah, ndrainga wawu ita hilingiy.

17 Paratesah, upwai ndrokonan isa kili wawu, tehe hu poropet soyon pe hu ndramat soyon kultuwayihu imwonen, ara hunamiliy tisingiy para hu kanime tesah mepo wawu topo nimei, hapeko hu kannimei pwi. Pe ndraingahu inamiliy tisingiy para hu kahilingi tesah mepo wawu topo hilingiy, hapeko yihu kanhilingiy pwi.

18 Pwen pe akahilingi mbulndroiyi nongan pwandritiye ta ndramat para piyeya wit. 19 Yihu mepo hu hilingi nongan hiyan para kolo King Ngindrai mepo ngara kiro mu kiya aliy, pe lohongahu kinileu kinna aliy pwi, ara Sinai isa pe ilohi nongan iro ndriyahu iya mawen kili hu. Lohongai para peke wit mepo ilon iro sai, ara ndroiyin aro ko. 20 Hu peke wit mepo hulon huro pwan sosolou, ara tehe ndramat mepo ihilingi nongan, pe hape pwi ko ipwes iya aliy. 21 Hapeko ngondron, ara kinsin hiyan pwi, pe kinto ndrangan niwen pwi. Pe tunan nongna Ngindrai, pe kiro mwonen hu ndramat hu kaiki nopwaran kiya ndritan pe hu karandroyani yiy, ara indrou pwi ko, lohongan ndrisiyon, ara andre kitali yiy. 22 Pe hu peke wit mepo hulon huro mwalinga hu malkei maporon, ara tehe ndramat mepo ihilingi nongna Ngindrai, hapeko ilohongani mipwan hiyan para lang nepo, pe melit soyon para kol pwan ara ipakarawani yiy, pwen pe iraimwani nongna Ngindrai, pe kinippwai pwi. 23 Hapeko hu peke wit mepo hulon huro pwan hiyan, ara tehe ndramat mepo ihilingi nongna Ngindrai, pe lohongan ileu iya aliy. Pe yiy ara ko mepo andre kippwai tehe wit, pe iyki peken iya masangat ndre manongui, ndre matingui iramwaitiniy mepo hasiy.>>

Nongan pwandritiye para hu ndromwindriu mwomwan

24 Pwen Yesu itiyani nongan pwandritiye handra yi iya kili hu, ipa toro: <<Kolo king mepo ngara kiro mu kiya aliy para kol paingan yang, ara tehe ndramat hamou ipiye peke wit hiyan iya pingen. 25 Hapeko iro mwonen hu ndramat masih huro matin, yoyou tan isa pe ipiye peke ndromwindriu mwomwan iya mwalinga hu wit tan pe kinnau. 26 Pe iro mwonen hu peke wit husahambunet pe hu pakappwai, hu ndromwindriu mwomwan, ara husarayah huro surahu yi.

27 Pwen hu ndramat para poya mbulya mbukena piyang, ara huya kili yiy, pe hupa, <Namandran, wou apiye hu peke wit hiyan opu iya pingem, ndre? Pwen paratapeh pe hu ndromwindriu aripo, ara hu topo lek iye?>

28 Pe isomwi hu, ipa, <Yoyou hamou ara imbusi aro.> Pe hu ndramat para poya mbulyan husok yiy, hupa, <Wou anamiliy para yowu kaya pe kaloli hu, ndre?>

29 Pe isomwiy, ipa, <Pwi! Paratesah, matisan akorolo hu ndromwindriu mwomwan, pe andre akaloli hu wit kayapolon i. 30 Konan, maldra kene koro lek kiyawule, kipoo kiya rahihini lang para poya wit. Kiro mwonen lang ara, yo andre kupwai kiya kili hu ndramat para poya wit toro: Andre akaloli hu ndromwindriu kimu, pe akawasi hapus-hapus kayawule para katimwiy, kihipwen akambultani wit pe akawiriy kisa nondriya kaisowa anandrinai to.> >>

Nongan pwandritiye malhin para mbuwa mastet, pe para Yis

31 Pwen Yesu itiyani nongan pwandritiye handra yi iya kili hu, ipa toro: <<Kolo king mepo ngara kiro mu kiya aliy para kol paingan yang, ara tehe peke mbuwa mastet sih mepo ndramat hamou iwiriy pe iya hasiy iya pingen. 32 Konan peke mbuwa mastet ara mbuskau masih, iya peke mbuwa hu kei masih, hapeko kiro mwonen kilek, ara andre kirayah namandran pe kiramwaitini anandrinai masih para piyang pe kirayah kei hakou. Pwen pe hu norukan ngara hu kasa pe kapun yumwahu koho ndrandran.>>

33 Pe Yesu itiyani nongan pwandritiye handra yi iya kili hu, ipa toro: <<Kolo king mepo ngara kiro mu kiya aliy para kol paingan yang ara tehe yis mepo pihin hamou isuluyaniy iya palawa soyon iya,[b] kipoo yis ara kisilihi palawa masih.>>

34 Yesu ipohowe nongan masih aro iya kili hu ndramat soyon ara, ara iya nongan pwandritiye ko. Iro pohowe nongan masih iya kili hu, ara kintali nongan pwandritiye pwi. 35 Pwen pe nongan mepo poropet Yisayah kinpwai, ara irayah mannan toro:

<<Andre kuwong kiya nongan pwandritiye ko.

Andre kutiyani hu melit mepo hutora kohon ndrukoluw kinna, tandrohonga kol pwan irayah.>>

Yesu itiyani ndroiyi nongan pwandritiye para ndromwindriu mwomwan

36 Pwen Yesu itali hu ndramat soyon ara, pe isong iya nondriya seu. Pe ndramiran hu husa kili yiy, pe hupa, <<Apwaingani ndroiyi nongan pwandritiye para hu ndromwindriu mwomwan ita piyang kisa leu kisa kili yowu.>>

37 Pe isomwi hu, ipa, <<Yiy mepo ipiye peke wit hiyan, ara yiy Noru Ndramat. 38 Pe piyang, ara kol pwan, pe hu peke wit hiyan, ara hu ndramira kolo King Ngindrai mepo ngara kiro mu kiya aliy. Pe peke ndromwindriu mwomwan, ara hu ndramira Sinai. 39 Pe yoyou mepo ipiye hu peke ndromwindriu mwomwan, ara Sinai. Pe lang para poya anandrinai, ara lang nakiyahapwen. Pe yihu mepo nakapo anandrinai, ara hu angelou.

40 Pwen andre hu kaloli hu ndromwindriu mwomwan, pe andre hu katimwi hu kaya mwan. Pe tehen aliy opu, andre kirayah kiro mwonen lang para kol pwan nakiyahapwen. 41 Noru Ndramat andre kipwandrisa hu angelou tan kaya, pe kawiri hu hiyeh tora kolo King Ngindrai mepo ngara kiro mu kiya aliy, mepo hu ngara kambusi hu pakut mwomwan karayah, pe hu masih mepo ngara kandrihisani nongnan. 42 Pwen hu angelou andre kapiyani hu kaya nondriya noku mwan ngandrahan iya. Pe andre hu koro ara, pe koro rang malihu pe koro yandrisingi koltahu. 43 Pwen pe kiro mwonen lang ara, andre hu ndramat imwonen, ara andre nganahu karayah tehe ngana mwandrai koro nondriya kolo king mepo ngara kiro mu kiya aliy ta Tamahu. Hiyeh mandraingan, ara kihilingi nongan iye.

Nongan pwandritiye para melit mepo kennen namandran

44 Pe kolo king mepo ngara kiro mu kiya aliy para kol paingan yang, ara tehe melit mepo kennen namandran ikohon ita pwan hambut. Pe iro mwonen ndramat hamou iya nimei, pwen ikulaniy paiwe. Pwen iyau iyapolo pwesai, pe ipopehei iya menmenan masih, pe iwiri singayai para aliy, pe isowani pwan ara.

45 Pwen nakupwai porosih i, kolo king mepo ngara kiro mu kiya aliy para kol paingan yang, ara tehe ndramat hamou para poya pehei mepo ita ten hu sowiy lahayan kennen namandran.[c] 46 Pe iro mwonen iya kahi sih, mepo kennen ihohin iya, ara iya pe iyapo pehei iya menmenan masih, pe iwiri singayai para aliy, pe isowani sowiy lahayan kennen namandran ara.

Nongan pwandritiye para kahu hamou

47 Pwen nakupwai porosih i, kolo king mepo ngara kiro mu kiya aliy para kol paingan yang, ara tehe kahu hamou mepo hupiyaniy iya ndran makaiye, pe ilokihi hu ni handra-handra. 48 Pe iro mwonen kahu ara ipep, hu ndramat para poya ni, ara huluwiy iya paingan leng. Pwen humpwan pe hulokihi hu ni hiyan, huya nondriya hu ndrop, pe hupiyani hu ni mwomwan huyau. 49 Pe tehen aliy opu, andre kirayah kiro mwonen lang para kol pwan nakiyahapwen. Hu angelou andre hu kasa pe hu kahirani hu ndramat pwassin kaya mawen kili hu ndramat imwonen. 50 Pwen hu angelou andre kapiyani hu kaya nondriya noku mwan ngandrahan iya. Pe andre hu koro ara, pe koro rang malihu pe koro yandrisingi koltahu.>>

51 Pe Yesu isike hu, ipa, <<Lohonga wawu ileu iya hu melit masih kene iye, ndre pwi?>> Pe husomwi yiy, hupa, <<Ehe.>>

52 Pwen ipwai iya kili hu, ipa, <<Tehen tora ko, sehe ndramat para hinuwani nongan para pwahanou, mepo kinwiri nongan pomwanye para kolo king mepo ngara kiro mu kiya aliy para kol paingan yang, ara tehe mbukena seu hamou, mepo iwiri hu memelit kennen namandran huro mbulkura suwen husa ngawan, hu melit howen pe saken kene.>>

Poropet hamou hu kanhaiyani yiy pwi

53 Pwen iro mwonen Yesu ipohowe hu nongan pwandritiye aro ihipwen, itali kol ara pe iyau. 54 Pwen imui iyarayah iya ndrohokolon imwonen, pe iro hinuwani hu ndramat iro nondriya yumwa mbultere tahu Yuta, pe huro lohonge ndrit. Pe husok, hupa, <<Ndramat aripo iwiri lohongai waison pe pwoke para kimbusi hu ndraikiya pwoke aro, ara iyau aleheh? 55 Yiy noru ndramat para puliya seu, ndre? Pe ngala tinan, ara Mariya, pe nalin hu, ara Yamis, Yosep, Simon, pe Yutas, ndre? 56 Pe pisun hu masih, ara huro surarou, ndre? Ndramat iye iwiri hu melit masih aro, ara iyau aleheh?>> 57 Pwen hu ndramat ara welehu imai tan. Hapeko Yesu ipwai iya kili hu, ipa, <<Poropet hamou kapa kiro ndrohokolon ndre kiro sura yowen hu, ara andre hu kantanuhuyani yiy pwi.>>

58 Pe yiy kinmbusi hu ndraikiya pwoke soyon kinto kol ara pwi, paratesah, yihu kanpwotisingi lohongahu pwi.

<- Mattiu 12 Mattiu 14 ->