1 Pe lang hayah iya mulan, Yesu iya paingan Yerusalem para kowase yon ta hu Yutah. 2 Pe yep sih ara iro Yerusalem pe ita pakeh Karam Namandran, mepo hu para Aram hupohowei Petsaita, pe marasoha seu maimiwum, ara irahakowa ndrikou ara. 3-4 Pe hu ndrohonga seu ara, ara hu ndramat soyon iya humwa huyen ariya—hu ndramat mara hu iyoh, pe ndrika hu mwomwan, pe hu ndramat mandra hu kinmat. 5 Pe ndramat hamou iro ara, ara imwa pe hayou para mwamwa tan ara tingui pe androluwoh. 6 Pwen iro mwonen Yesu inime yiy iye pwan, ipahasaniy tehe ndrangan niwen kinimwa iro, pwen isok yiy ipa, “Wou anamiliy para nangoh?”

7 Pwen ndramat ara ipa, “Namandran, hamou para kisa pe kisopwat yo para kuya nondriya ndrikou mepo iro, ara pwi. Pe iro mwonen nakuya nondriyan, ara hamou isa ramwaitini yo pe imu iya nondriyan.”

8 Pwen Yesu ipwai iya kili yiy ipa, “Atine! Awiri nokum pe arikai” 9 Pwen indrou pwi ko, ndramat ara ingoh. Pe isoli nokun itine pe iyau. Pe melit irayah ara, ara iro mwonen lang Sapat. 10 Pwen yihu pohon para Yutah, ara hupwai iya kili ndramat mepo iya hiyan ara, hupa, “Lang nepo Sapat, pe nonombun para asap nokum.”

11 Hapeko yiy isomwi hu ipa, “Ndramat mepo imbusi yo ungoh, ara ipa, ‘Asap nokum pe arikai.’ ”

12 Pwen husike yiy hupa, “Sehe ndramat ipwai satam para asap nokum pe arikai?”

13 Hapeko ndramat mepo kiningoh ara, ara ikowu tehe yiy hiyeh. Pe Yesu, ara inndrang mwalinga hu ko, pe kinyau.

14 Pe iyamulan Yesu iyakahi yiy iro nondriya yumwa totohun namandran, pe ipwai iya kili yiy ipa, “Animei, wou aningoh, pwen mbuna ambusi pakut mwomwan, matisan nopwaran namandran kirayah kili wou. 15 Pwen ndramat ara iyau pe iya pwai iya kili hu pohon para Yutah tehe ndramat isopwoyani yiy pe ingoh, ara Yesu.”

16 Yihu pohon para Yutah hurandroyani Yesu, paratesah, imbusi melit, ara iho mwonen lang Sapat. 17 Pwen Yesu ipenani yiy mbukenan pe ipa, “Pe Tomo, ara itapo mbulyan ipoo isa matnen mahapo, pwen yo urupo pombulen i.” 18 Pwen tunan aro ko, hu Yutah hu nohonou para hu katingundrun, paratesah, kindrihisani pwahanou para lang Sapat opu, ara pwi, hapeko ipwai tehe Ngindrai ara Taman imwonen, pe imbusi yiy ihisoule tehe Ngindrai opu.

19 Pwen Yesu isomwi nongna hu ipa, “Upwai ndrokonan isa kili wawu, Norun kamai ara, ara andre kinmbusi melit kinna namiliwan mbukenan, ara pwi, andre kimbusi sehe melit mepo inime Taman ita mbusiy, paratesah, tesah Taman ita mbusiy, Norun kamai andre kimbusiy tehen aliy i. 20 Taman ara ndriyan imbuluhi Norun, pwen ipwaingani melit masih imbusiy iya kili yiy. Pwen Taman andre kipwaingani melit namandran kiramwaitiniy aro, pe mwoiwa wawu andre kihin. 21 Pe Taman ara ihingini ndramat imat, ara isa itine, pe iyki taleh iya kili hu. Pwen tehen aliy opu, Norun andre kiyki taleh kiya kili yiy mepo inamiliy para kiykiy kiya kili yiy. 22 Pe Taman andre kintamwanye nongan pwi, hapeko kintali tamwanye masih kinna kili Norun. 23 Pwen andre hu kahaiyani ngala Norun, tehe hu ngara kahaiyani ngala Taman. Ndramat mepo kinhaiyani ngala Norun pwi, ara kinhaiyani ngala Taman mepo ipwandrisa Norun isa pwi.

24 Upwai ndrokonan isa kili wawu, tehe hiyeh kihilingi nongno pe kipwotisingi lohongan kiya kili yiy mepo ipwandrisa yo usa, ara andre kiwiri taleh kinto-kinto pe andre kinwiri koran pwi. Yiy kintamwaitini kimat pe kinsa mwalen. 25 Upwai ndrokonan isa kili wawu, tehe lang itapo isa, pe kinsa pwen, tehe hu ndramat kanmat, ara andre hu kahilingi mbulukoyu Noru Ngindrai Kamai, pe hu mepo hilingiy, ara andre hu koro mwalen. 26 Pe Taman, ara yiy mbukena taleh, pwen tehen aliy i, itali pwoke iya kili Norun para taleh kiro kili Norun i. 27 Pe iyki pwoke nopwaran kinna kili yiy para kiramwanye hu ndramat, paratesah, yiy ara Noru Ndramat. 28 Pwen mwoiwa wawu mbuna kihin kiya nongno iye, lang sih itapo isa, ara hu ndramat masih mepo hu kanmat hu tora ngarehu, ara andre hu kahilingi mbulu koyu Noru Ndramat 29 pe hu kasa ngawan—pe hu mepo hu mbusi kultuw hiyan, ara andre hu katine pe hu koro mwalen. Pe hu mepo hu mbusi kultuw pwassin, ara andre hu katine pe hu kawiri korahu. 30 Yo mbukeno kunlahiy para kumbusiy kinna pwoke to mbukeno, ara pwi, tesah uramwaniye, ara iho ndruwa tesah uhulingiy. Pe tamwanye to ara imwonen, pe kunto ndruwa namiliwo mbukeno ara pwi, hapeko uta ndruwa namiliwa Tomo mepo ipwandrisa yo.

31 Kapa yo mbukeno kutiyani titiye to, pwen andre hu ndramat kanpwotisingi lohongahu pwi. 32 Pe hamou hirandron andre kitiyani namiliwo pwokeyan, pe upahasaniy tehe tiyeyan nakitiyani yo kiya aliy, ara ndrokonan.

33 Pe wawu pwandrisa hu ndramat huya kili Yohanes pe yiy itiyani nongan ndrokonan. 34 Pe kunamili titiye tahu ndramat pwi, hapeko upwai hu nongan ara para kisopwat wawu. 35 Pe Yohanes itiyani yo, ara tehe sui sih mepo iyat pe iyki nganan, pe wawu pwesani nganan ara ndrangan niwen pwi.

36 Titiye to, ara iramwaitiniy ta Yohanes. Paratesah, mbulen mepo Tomo iykiy isa kili yo, ara para kumbusiy kiya hapwen. Pe tesah urupo mbusiy, ara itiyani titiye ta Tomo mepo ipwandrisa yo. 37 Pe Tomo mepo ipwandrisa yo usa, ara yiy mbukenan kintiyani yo. Pe wawu konho hilingi mbulukoyun pwi, pe akonho nime yiy pwi, 38 pe nongnan i, ara kinto kili wawu pwi. Paratesah, wawu kanpwotisingi lohonga wawu kinna kili yiy mepo ipwandrisa yo usa, ara pwi. 39 Wawu ngara kanime nokulani Nongan Haiyan, paratesah, wawu lohonganiy tehe wawu mbusiy tehen tora, pwen andre wawu kawiri taleh kinto-kinto. Hu Nongan Haiyan ara, ara itiyani yo. 40 Hapeko wawu mbuwali wawu para akasa kili yo para akawiri taleh.

41 Pe kunnamiliy para ndramat kihari ngolo, ara pwi, 42 hapeko upahasani wawu. Upahasaniy tehe ndriya wawu, ara kinmbuluhi Ngindrai pwi. 43 Pe yo usa ara iya ngala Tomo, pe wawu kanpa hiyan sato pwi, hapeko kapa hamou kisa kiya ngalan mbukenan, ara andre wawu kapa hiyan katan. 44 Pwen andre wawu kapwotisingi lohonga wawu tapeh, kapa hamou kiro hari ngala hamou, hapeko wawu konho nohonou para kawiri pwesai kiyau kili Ngindrai hamou opu, ara pwi.

45 Pe wawu mbuna akapa ndre yo andre kuiki wawu kaya nongan kiro mbulmara Tomo. Ndramat mepo nakiyki wawu kaya nongan, ara Mose, yiy mepo wawuiki lohonga wawu iyatan. 46 Pe kapa wawu pwotisingi lohonga wawu iya kili Mose, pwen andre wawu kapwotisingi lohonga wawu kisa kili yo, paratesah, titiye iratuluwiy, ara ato. 47 Hapeko kapa wawu kanpwotisingi lohonga wawu kinna nongan mepo Mose kintatuluwiy pwi, pwen andre wawu kapwotisingi lohonga wawu kiya tesah urupo pwai iye tapeh?”

<- Yhn 4Yhn 6 ->