1 Iro mwonen Yesu itohun ihipwen, pwen iyau iyapolo ndramiran hu pe hu singondriti Pwenten para Kitron. Pe haroh para aliy, ara piyang holip hambut iro aliy, pwen yiy pe ndramiran hu huya hape ara.

2 Pe Yutas mepo andre kiratuni Yesu, ara kinpahasani hape ara, paratesah, lang masih Yesu iyapolo ndramiran hu ngara hu kaya mbultere hu koro ariya. 3 Pwen Yutas iluwani hu ndram pe hu ndramat para memerani yumwa totohun namandran mepo hu pris huhohin ta hu pris masih, pe hu Parisiy hu pwandrisahu husa. Pe husap hu sui pe hu ndrakaramwan, pe hu melit para pahun husa.

4 Pe Yesu, ara kinpahasani hu melit masih mepo nakirayah kili yiy, pwen ises iya ngawan kili hu pe isok hu ipa, “Wawu tora ten hiyeh?”

5 Pwen hupa, “Yowu topo ten Yesu para Nasaret.” Pe Yesu ipa, “Ara yo.” Pe Yutas mepo andre kiyki yiy kiya kili hu, ara iro tine surahu yi.

6 Pe iro mwonen Yesu ipa, “Ara yo,” Ara huses humui pe huyos huya pwan.

7 Pwen isok hu paiwe yi ipa, “Wawu tora ten hiyeh?” Pe hupa, “Yesu para Nasaret.”

8 Pe Yesu ipa, “Kunpwai kinsa kili wawu, tehe yo ara yiy. Kapa wawu topo ten yo, pwen hu ndramat aripo, ara akatali hu kayau.” 9 Pe melit aro irayah, ara para nongnan kinpwai, ara kirayah manan toro: “Hu ndramat aniyki hu kansa kili yo, ara hamou tahu kinsongsin pwi.”

10 Pwen Simon Pita mepo isap semela pahun niwen hapai iro kili yiy, ara iluwiy para kitingundru ndramat para poya mbluya pris ihohin ta hu pris masih ara, pe isahi ndraingan mot imut. Pe ndramat ara, ara para poya mbulya pris ihohin ta hu pris masih kene, pe ngalan ara Malkus.

11 Hapeko Yesu ipwandrandrahani Pita ipa, “Aiki semelam kimui kiya sumwayan! Tehen tapeh, apa andre yo kunlahiy para kuya nondriya nopwaran mepo Tomo kiniykiy kinsa kili yo pwi, ndre?”

12 Pwen hu ndram mepo kantakinimahu para kambusi mbulyahu, ara husa iyapolo namandran tahu pe hu ndram tahu Yutah, hu masih hu mbultuwe tahatini Yesu pe huwasi yiy. 13 Pe hu wiri yiy imu iya kili Anas mepo mensowa Kayapas. Pe hayou ara, Kayapas iro pris ihohin ta hu pris masih kene. 14 Kayapas, ara kinpwai pwen kinna kili hu namandran tahu Yutah kinpa, “Hiyan kapa ndramat hamou, ara kimat katahu ndramat masih.”

15 Simon Pita pe ndramira Yesu hamou, ara hilho ndruwa Yesu, paratesah, ndramira Yesu aro, ara ipahasani pris ihohin ta hu pris masih kene. Pe iropolo Yesu iya nondriya kowa yumwa pris ihohin ta hu pris masih kene ara. 16 Hapeko Pita iya iro tine ndron poho karam, pe ndramira Yesu hamou i mepo ipahasani pris ihohin ta hu pris masih kene ara imui, pe iwong iya kili pihindrahin mepo iro pombulen ara, pe iwiri Pita hilya nondriyan. 17 Pwen pihindrahin mepo ngara kiro nimnim kiya karam, ara isok Pita ipa, “Wou ndramira Yesu hamou, ndre?” Pe Pita isomwiy ipa, “Yo pwi yoh.”

18 Pe hu ndramat para poya mbulen, iyapolo hu namandran tahu makundrayen, ara huro tine pe hurahakowa mwan pe huro ling, paratesah, kol iwou. Pe Pita yi, ara iro tine polo hu pe iro ling mwan i.

19 Pe iro mwonen ara, ara pris ihohin ta hu pris masih kene ara iro sok Yesu iyata ndramiran hu pe hu hinonou tan.

20 Pwen Yesu ipa, “Lang masih ngara kuwong ngawan kiya kili hu ndramat. Pe kunhunuwani hu ndramat huro hu yumwa mbultere tahu Yuta, pe yumwa totohun namandran i, mepo hu Yutah masih ngara kasa rawurehu. Pe ngara kuwong ngawan opu. 21 Paratapeh pe ata sok yo? Asike hu mepo hukanhilingi yo. Hupahasani tesah kunpwai.”

22 Iro mwonen Yesu ipa toro, pwen makundrayin hamou iro pakeh ara ihisili Yesu iya kaipan. Pe ipa, “Iya hiyan para asomwi pris ihohin ta hu pris masih kene tehen tora, ndre?”

23 Pwen Yesu isomwiy ipa, “Kapa kupa handra melit kinmwonen pwi, kiya atiyani tesah kinmwonen pwi, hapeko kapa kuwong ndrokonan, pwen paratapeh pe ahasili yo?” 24 Pwen Yesu irondron waswas tehen tora pe Anas ipwandrisa yiy iya kili Kayapas. Kayapas ara pris ihohin ta hu pris masih kene.

25 Pe Simon Pita iro tine ndron pe iro ling mwan, pwen hamou isok yiy ipa, “Wou ndra ndramiran hamou, ndre pwi?” Pe ipa ikowu, pe ipa, “Yo pwi yoh.”

26 Hapeko ndramat hamou para poya mbulen ta pris ihohin ta hu pris masih kene, ara yiy hamou yowe ndramat mepo Pita isondriti ndraingan imut ara, pe ipa, “Upa ndre unime wou aro polo yiy iro nondriya piyang?” 27 Hapeko Pita ipwai paiwe i tehe ikowu, pwen iro mwonen ara, tutut hamou irang.

28 Pwen makohu ping o, hu namandran tahu Yutah hu luwani Yesu iro kili Kayapas pe huya ndrohonoku poho kapman para Rom. Pwen hu Yutah ara matisan hu kanro howen kinna mbulmara Ngindrai pwi, pwen hu kanna nondriya suwe pohon para Rom ara pwi, paratesah, hu pakayan anandrina Pasopa. 29 Pwen Pailat isa ngawan kili hu pe isok hu ipa, “Tunan tesah pe apakaiki ndramat iye kiya nongan?”

30 Pwen hu somwiy hupa, “Kapa yiy ndramat kinho tandroindroi pwi, pwen andre yowu kaniyki yiy kinsa nimam pwi.”

31 Pwen Pailat ipa, “Wawu mbukena wawu kawiri yiy pe akaramwanye kiro ndruwa nongan para pwahanou tawawu mbukenan.” Hapeko hu Yutah hupa, “Nonombun para yowu katingundru ndramat hamou kimat.”

32 Melit aro irayah ara para nongna Yesu kinpwai pe kintanonoyaniy tehe andre kiya nondriya kimat tapeh, ara andre kirayah manan.

33 Pwen Pailat imui iya ndrohonoku suwe kapman pe ipwatisingiy para hu kawiri Yesu kiya kili yiy, pe isok yiy ipa, “Wou ara King tahu Yutah?”

34 Pwen Yesu isok ipa, “Ariya lohongam mbukenam, ndre hamou kintiyani yo kinsa kili wou?”

35 Pwen pe Pailat isomwiy ipa, “Wou apa ndre yo hamou Yutah, ndre? Ndramiram hu mbukenan pe hu pris huhohin ta hu pris masih atam, ara huiki wou asa kili yo. Pe wou ambusi tesah?”

36 Pe Yesu ipa, “Kolo king to mepo utamu tehe king iyata hu ndramiro, ara para kol pwan pwi. Kapa para kol pwan, pwen hu ndramat para poya mbulyo andre hu kapo pahun kiya pohon para Yutah pe andre kanmbultuwe tahatini yo pwi. Hapeko mahapo, kolo king to mepo utamu tehe iyata hu ndramiro, ara para kol hakol.”

37 Pe Pailat ipa, “Wou king hamou, ndre?” Pwen Yesu ipa, “Wou apwai imwonen tehe apa yo, ara king hamou. Pwen tunan ara ko, pe tino imwalahiy sato, pe ara ko pe usa kol pwan para kutiyani nongan ndrokonan. Pwen hu mepo ngara hu koho ndruwa nongan ndrokonan, ara hu ngara kahalingi yo.”

38 Pwen Pailat isok ipa, “Nongan ndrokonan ara tesah?” Pwen iwong ihipwen, pwen iya ngawan kili hu Yutah pe ipa, “Kunkahi handra mwomwan para ndramat iye kiwiri koran kaliy, ara pwi. 39 Hapeko ara kowase wawu para andre kutali ndramat hamou kiro kou kisa ngawan kiho lenge Pasopa. Pwen wawu namiliy para kutali King tahu Yutah, ndre?”

40 Pe huwayeh imui hupa, “Pwi, yiy pwi! Aiki Parapas kisa kili yowu.” Parapas ara yiy ndramat hamou mepo ngara kisuhuri hu ndramat para karahatai.