1 Tapaniu iho mu, ara ma nongan para pwahanou para aliy, pe ngara katotohun kiro kol mepo ngara kahaiyaniy kiro yopai para kol pwan. 2 Yopai hawum hu puliy, ara kaput para aliy ihomu. Pwen kaput isayau maran, ara sui sih ma kakan, pe keyeu, pe hu ndrina nohun kanhaiyaniy pwen huro ndrita keyau huro aliy. Pe pohowe hape ariya, ara Kol Haiyan. 3 Pe ndruwa koyau iho mulan, ara kaput sih pohowei hape ariya, ara Kol Haiyan Masih, 4 pe kaput ara, ara pere tuntun kolt para timwiya melit ngonohon layin, pe kokou penei iya kolt para tapaniu iro aliy. Kokou para tapaniu aro, ara kolowai para manna, nes ta Aaron mepo iyki nonowen, pe pat malhin para tapaniu iro aliy. 5 Pe iro ndrita kokou para tapaniu ara, ara sumwoiwa angelou malmou ma nganngana hilu pe kapene hilu iyah iramburuhi noku randropwei. Pe andre tukanratiyani hu titiye para aliy mahapo, ara pwi.

6 Pe iro mwonen hu melit masih aro kanramwaniyaniy iro mwoimwoi toro, pwen hu pris husong iya kaput isa maran ara ken iho ken para hu kambusi hu mbulyahu tehe pris. 7 Hapeko pris ihohin opu, ara ngara kiya nondriya kaput mepo ita nondriyan masih, pe ngara kiya nondriyan, kiho nondriya hayou sih, ara porosih o. Pe lang masih ngara kiya nondriyan, ara ngara kimbusi yukyuk kiyapolo ndrai para pakut mwomwan tan mbukenan, pe para hu pakut mwomwan tahu ndramat mepo hu ndrihisani Ngindrai, pe yihu kanyirowei pwi yi. 8 Iyau lohongai aro, pwen Mwoiwan Haiyan ipwainganiy tehe sai iya hape mepo Kol Haiyan Masih, ara kinileu mapu, paratesah, kultuw para Yopai iho mu, ara iro ndron. 9 Melit iye ara iranonoye iya lang para mahapo. Paratesah, hu yukyuk pe hu yukyuk para mwan kitimwiy masih mepo pris hamou ngara kiyuk, ara kinoho mbusi lohonga ndramat mepo ngara kitotohun, ara kileu pwi. 10 Paratesah, nongan para pwahanou saken, ara iwong iya kultuw para namnam, pe para kayin ndran, kultuw para nuhuya ndramat karayah howen—pe nongan para pwahanou para nombuwe tou, ara pwoke para aliy iro hape ko, kipoo kirahihini lang Ngindrai kinpwaingani kultuw howen.

11 Hapeko iro mwonen Kristus isa tehe pris ihohin ta hu pris masih para hu melit hiyan mahapo hutopo, ara yiy iya nondriya yopai mepo ihohin iya pe imwonen masih mepo kanmbusiy kinyau nima ndramat pwi. Ngindrai imangsani melit masih, hapeko yopai aro, ara kintosura melit imangsani hu pwi. 12 Pe Kristus kiniwiri ndreye hu meme pe ndreye hu noru mbulmwakau para kiya nondriya hape mepo Kol Haiyan Masih, ara pwi. Hapeko yiy mbukenan iyki ndreyen tehe yukyuk para kikonuh rou kinto-kinto ara porosih o. 13 Pe ndreye hu meme pe hu mbulmwakau kamai pe lohulohu mbulmwakau pihin ara ngara karahun kiya ndritahu ndramat mepo hu kanmwonen pwi, para kimbusi koro mwonen pe hu katotohun kiya kili Ngindrai, pe andre kimbusi nimiya ngawan tahu kirayah howen. 14 Hapeko Kristus ara pakut mwomwan kinto kili yiy pwi, pe iyki yiy mbukenan tehe yukyuk iya kili Ngindrai iyau Mwoiwan Haiyan mepo andre kinto-kinto. Pwen tehen toro ko, ndreyen ara pwokeyan iya, ilahiy para kimbusi lohongarou kileu. Pwen mahapo tulahiy para katohun kiya kili Ngindrai kinto-kinto pe andre tukanmbusi hu melit mepo andre kiluwani worou kinna kimat pwi.

15 Paratesah, tunan aro ko, pwen Kristus ara irayah moyut para tapaniu howen, pwen melit hiyan andre kinto-kinto mepo Ngindrai kintandrangan kinna aliy, ara andre kiyki kiya kili hu mepo iyoh hu. Yiy imat, ara para kisopwat hu pe kirapiyani hu pakut mwomwan mepo humbusiy huro pahandra tapaniu ihomu.

16 Pe tapaniu ara tehe namiliwai pwokeyan ndramat hamou kiyinganiy kiya kimat tan, pe namiliwai pwokeyan ara, ara andre kinpwoke pwi kapa ndramat ara kinmat pwi. 17 Paratesah, namiliwai pwokeyan ara andre kipwoke kopu kapa ndramat ara kimat. Pe kapa ndramat ara kiro mwalen, namiliwai pwokeyan ara, ara pwoke para aliy pwi.[a] 18 Pe kapa ndreye hu kan pwi, pwen tapaniu ihomu ara pwoke para aliy pwi. 19 Mamu Mose ipohowe nongan para pwahanou iya kili hu ndramat masih, ara ngara kiwiri kapuk laman mepo wasiy iho hu ndrandra hisop, pwen isekerani ndreye noru hu mbulmwakau pe meme iyapolo ndran, iya ndrita hu ndramat masih pe ndrita puk maiye. 20 Pe ipa, <<Iye ara ndrai para tapaniu mepo Ngindrai imbusiy isapolo wawu pe ipwandrandrahani wawu para akoho ndruwan.>> 21 Pwen Mose imbusiy tehen aliy i, isekerani ndrai iya yopai pe iya ndrita hu melit masih para totohun. 22 Nongan para pwahanou ipa, melit masih ara andre kirayah howen kiya ndrai, pe kapa ndrai kinimuw pwi, pwen Ngindrai andre kinrapiyani hu pakut mwomwan pwi.

23 Pe hu melit aro ara sumwoiwa hu melit para kol paingan yang, pwen andre kambusi yukyuk para hukarayah howen. Hapeko hu melit para kol paingan yang mbukenan, ara ndrokonan pe iramwaitini hu yukyuk mepo mwayih iya, iya iye. 24 Paratesah, Kristus ara kinna nondriya yopai mepo mbusiy iya nima ndramat mepo sumwoiwa melit ndrokonan, ara pwi, hapeko iya kol paingan yang ndrokonan, pe iya ita mbulmara Ngindrai pe ita sopwatrou. 25 Pe kinhopo kinna kol paingan yang ken iho ken, para kiyki yiy tehe yukyuk tehe pris ihohin ngara kimbusiy para kiya nondriya hape mepo Haiyan Masih hayou sih iyau sih, kiyapolo ndrai mepo ndreyen mbukenan pwi, ara pwi. 26 Matisan iro matne Ngindrai imangsani kol pwan isa, ara Kristus andre kiro kuni nopwaran lang masih. Hapeko pakeh lang nakisahapwen, ara isarayah porosih o, pe iyki yiy mbukenan tehe yukyuk para kirapiyani hu pakut mwomwan. 27 Pwen tehe hu ndramat ngara kamat, ara ngara kamat porosih o, pe kiya mulan andre hukoro tine nongan, 28 pwen Kristus ara imat porosih o para kirapiyani hu pakut mwomwan ta hu ndramat soyon; pe andre kimui paiwe yi. Yiy andre kinsa para kirapiyani pakut mwomwan pwi, hapeko andre kiyki sopwat kiya kili hu mepo huro longe yiy.

<- Hipuruw 8Hipuruw 10 ->