Hipuruw 7

Melkisetek mepo yiy Pris

1 Melkisetek ara yiy king para Salem pe yiy pris ta Ngindrai iyera Paingan Masih. Yiy ipohonani Apraham iya popahun pe iramwaitini hu king pe iro mui, pwen itoholi yiy. 2 Pe Apraham iyki melit sih iyau melit masongui para melit masih mepo iwiri iyau pahun pe iyki iya kili Melkisetek. Ndroiyi ngala Melkisetek imu, ara ipa <<king para kultuw imwonen,>> pe ipa toro yi <<king para Salem>> ndroiyi ngala Salem, ara ipa, <<king para ndriya wayis.>> 3 Pe Melkisetek ara taman pwi pe tinan pwi, pe ndrayen pwi, pe lang para tinan imwalahiy iyatan, ndre lang para kimat kiya aliy, ara pwi yi. Pe yiy ara irayah tehe Noru Ngindrai Kamai, pe yiy ara ita manau tehe pris hamou mepo andre kinto-kinto.

4 Wawu kalohonganiy tehe Melkisetek, ara yiy ndramat hamou mangalan. Tumbu rou Apraham ara iwiri melit sih para melit masongui mepo iwiriy iro mwonen iya popahun pe ihang Melkisetek. 5 Nongan para pwahanou ara ipa ndraye Lipai hu, ara hu mepo hurayah hu pris para hu kapo melit sih iyau melit masongui iyau kili hu nali hu mbukenan hu ndramira Yisrayel—pe konan yihu ara ndraye Apraham. 6 Hapeko Melkisetek, ara yiy kinyau ndraye Lipai pwi, pe yiy ipo melit sih para melit masongui iyau kili Apraham, pe Melkisetek itoholi Apraham mepo Ngindrai kintandrangan pwen kinna kili yiy. 7 Pe andre akanhindrundru pwi, tehe ndramat ngalan pwi, ara andre kiwiri lomwes kili ndramat mangalan. 8 Lohongai handra aro, melit sih para melit masongui ara ngara kapo kiyau kili hu ndramat mepo ngara hu kamat. Pe lohongai handra yi, ara ngara kapo melit kiyau kili yiy mepo pohowe yiy, yiy mwalen. 9 Pwen hamou matisan kipwai tehe Lipai ipo melit sih iyau melit masongui, ara yiy opu kiwiri melit sih kiyau melit masongui ara kiyau kili Apraham, 10 paratesah, iro mwonen Melkisetek iya pohonani Apraham, ara Lipai ara mapu kintayah kili tumbun Apraham.

Yesu ara tehe Melkisetek

11 Kapa mbulya pris ta Lipai ara imwonen masih, pe nongan para pwahanou huikiy iya kili hu ndramat, ara ipa hiyan iya mbulya pris ara—paratapeh pe andre tukawiri pris hamou kisa, yiy mepo iyawule ko tehe Melkisetek, pe kinawule tehe Aaron pwi. 12 Paratesah, kiro mwonen mbulya pris karapihiyaniy, pwen nongan para pwahanou ara karapihiyaniy i. 13 Yiy mepo hu melit aripo iwong iyatan, ara yiy iyau wum hawum handra masih, pe hamou ndramat kinyau wum tan kinpo mbulen tehe pris kiro pere tuntun, ara pwi. 14 Paratesah, tukanpahasaniy tehe Yapan torou ara iyau ndraye Yutah, hapeko Mose, ara kinpa handra melit pwi iya kili hu pris huyau wum iye, ara pwi. 15 Pe lohongai aro ara ileu masih, tehe kapa pris hamou kitine mwensen tehe Melkisetek, 16 yiy mepo andre kinrayah pris hamou kiho ndruwa kultuw para kowase tumbun hu, ara pwi, hapeko andre kitine kiya pwoke para taleh mepo andre kanpwalnganiy pwi. 17 Ngindrai ipwai iyatan toro:

<<Wou aro pris lang masih

iya harong tehe Melkisetek.>>

18 Nongan para pwahanou saken, ara Ngindrai kintapiyaniy kinna mawen, paratesah, pwoke para aliy pwi pe kinna mwaihei o. 19 Nongan para pwahanou ara kinmbusi handra melit kinna mwonen pwi, hapeko melit handra mwayih kanpwainganiy itapo isa, ara andre kiluwanirou kaya pakeh kili Ngindrai.

20 Nongan para pwahanou howen iye, ara Ngindrai irandrangan tisingiy pe ipwainganiy. Hu ndraye Aaron mepo hu pombulen tehe pris, ara Ngindrai kintandrangan tisingiy kinna kili hu pwi. 21 Hapeko Ngindrai irandrangan tisingiy iya kili Yesu, pe ipwai iya kili yiy toro:

<<Yapan kintandrangan tisingiy, pe andre kinrapaiwani lohongan pwi,

tehe wou, ara andre aro pris hamou kinto-kinto.>>

22 Iyau tandrangan tisingiy aro ko, Yesu ara irayah tehe tapaniu mwayih.

23 Hu pris soyon ara, ara huro pahandra nongan para pwahanou saken, pe hu konto manau mbulya hu tehe pris pwi, paratesah, humat. 24 Hapeko Yesu ara andre kiro mwalen kinto-kinto, pe mbulyan tehe pris, ara andre hamou kinwiri nokun pwi, pe andre kinto-kinto. 25 Pwen pe sopwat tan iya kili hu ndramat husa kili Ngindrai iyau kili yiy, ara andre kimbusiy porosih o, pe andre kinto-kinto. Pe yiy andre kinto-kinto, pe andre kiwiri yoku hu ndramat para kiro tohun kiya kili Ngindrai.

26 Yesu ara pris ndrokonan ihohin ta hu pris masih mepo ilahiy kihang tesah tundroisiy. Pe yiy ara haiyan, hape mwomwan kili yiy pwi, imwonen, pakut mwomwan kili yiy pwi, pe iyki ndrohonokun iyera paingan masih, kol paingan yang. 27 Yiy ara kinna harong tehe hu pris huhohin ta hu pris masih hayah, ara pwi. Pe yiy ara andre kinho mbusi yukyuk ken kiho ken lang sih kiyau sih, ara pwi yi, tehe pris hamou ngara kimbusi yukyuk para pakut mwomwan tan kimu, pwen kamulan kimbusi yukyuk para hu pakut mwomwan ta hu ndramat. Yesu ara imbusi yukyuk para hu pakut mwomwan ta hu ndramat ara porosih o iro mwonen iyki yiy mbukenan tehe yukyuk. 28 Paratesah, nongan para pwahanou ara irakinima hu ndramat mepo hukose pe hurayah tehe hu pris huhohin. Hapeko Ngindrai itandrangan iho ndruwa nongan para pwahanou, pe irakinima Norun Kamai pe imbusi yiy imwonen masih tehe Pris haiyan Ihohin kinto-kinto.

<- Hipuruw 6 Hipuruw 8 ->