Hipuruw 12

1 Pe hu ndramat soyon lohongahu ndrisiyon, ara hurahakowarou pe hutopo surarou, pe hutopo pwokeyani titiye torou. Pe tukarapiyani hu melit masih mepo ngara kiyki ndrangarou, pe pakut mwomwan mepo ngara tukonoho taliy kileh pwi, pe tukoro tine pwokeyan pe tukangap kiya ngapilai mepo Ngindrai kinmwaniyaniy torou pwen ita. 2 Pe tukoro nimnim kiya kili Yesu, mepo yiy ndroiyin pe ndramat imwonen masih para lohongai ndrisiyon torou. Pe Yesu kinkose pwi pe ipwokeyani yiy para kiho ndrungak kei tondrih, pe hupwasimiri yiy, hapeko ipwes, paratesah, kinimpwan pwen ita nima Ngindrai mot ita ndrohonoku pwanpwan ta king. 3 Pwen wawu kalohonganiy nokulani yiy mepo iro tine pwokeyan pe iramwaitini hu ndramat mepo pakut tahu mwomwan mepo humwisnani yiy, pwen andre aro tine pwokeyan pe andre ankose pwi.

Ngindrai ngara kipwahanou norun hu

4 Pe nondriya rambumbungas tawawu para akoro mawen pakut mwomwan, ara wawu kansa nondriya kimat mepo ndreye wawu andre kimuw kiya aliy, pe akaramwaitiniy, ara mapu. 5 Pe nongan mepo ipwokeyani wawu pe ipwainganiy tehe wawu norunhu kamai, ara lohonga wawu mbuna kimayit kiya aliy. Ngindrai ipwai ipa,

<<Pwen noru, pwahanou ta Yapan, ara mbuna wiriy kiho mwak o. Pe mbuna ambusi wou tehe akose kiro mwonen kipomate wou,

6 Paratesah, Yapan ngara kipwahanou hu mepo ndriyan imbulihihu, pe iyki konahu masih mepo isomwihu tehe hu norun.>>[a]

7 Sehe mbunah kamai andre taman kinpwahanou yiy pwi? Ngindrai iwiri wawu pe wawu rayah norun hu kamai, pe kapa kipwahanou wawu kiho nondriya nopwaran, ara akoro tine pwokeyan. 8 Pe kapa ndramat masih kaya nondriya pwahanou pe wawu kanpwes para akaya nondriya pwahanou pwi, pwen wawu, ara noru sai pe wawu noru Ngindrai kamai ndrokonan pwi. 9 Pe worou masih para kol pwan, ara matamarou hu mepo ngara hu kapwahanou rou pe worou ngara kahaiyanihu. Pwen Tamarou para mwoiwarou tukaikirou kaya pahandran. Pwen andre tukoro mwalen. 10 Pe tamarou hu ara hupwahanourou weneyan o, pe hupa ndre mwayih masih, hapeko Ngindrai ipwahanourou, ara para hiyan torou. Pwen andre tukasusuye kiyapolo yiy kiya kultuw haiyan tan. 11 Pe pwahanou ngara tukaya nondriyan, ara kinohoiki hiyan o kisa kiltou, ara pwi, hapeko ngara kiyki ngandran i. Pwen hu mepo hu kankose pwi, pe huya nondriya pwahanou, ara kamulan andre hu kawiri kultuw imwonen pe ndriya wayis.

12 Pwen, pe akapwokeyani nima wawu mepo imbuyei pe ngundru wawu mepo nomnomwun pwi. 13 <<Pe akaramwaniyani saya wawu kiro mwonen para tokuyai,>>[b] pwen pe hu mepo ndrika hu imat, ara andre kinto mbuyei tora ko pwi, hapeko andre hu kaya hiyan.

Mara wawu kiro tawawu kapa kandrihisani nongna Ngindrai

14 Pe akanohonou pwokeyan para akoro nondriya ndriya wayis pe kultuw haiyan kiya kili hu ndramat masih. Pe kapa kultuw haiyan kinto kili wawu pwi, pwen kinlahi hamou kinime Yapan pwi. 15 Mara wawu kiro tawawu, matisan hamou tawawu kirayah tehe mbuwakei tunguyan isahambunet, pe kiringi wawu pe kimbusi wawu akayos akaya kultuw mwomwan, pe akanwiri pahas ta Ngindrai. 16 Pwen mara wawu kirotawawu, matisan hamou kiyos kiya kultuw para pilah, ndre tehe Esau kinpwotisingi lohongan pwi, pwen anandrinai sih o, ipopehei iya aliy, iya hu menmenan hiyan mepo andre kiwiriy tehe yiy ndrohan. 17 Wawu pahasaniy tehe iyamulan pakiwiri hu lomwes, ara Ngindrai ipa pwi iyatan. Konan irang mali yiy para kiwiri lomwes ara, hapeko kinlahi Ngindrai kirapaiwani lohongan pwi.

Ngondron para nohowai pe ngondron para pwesai

18 Pe wawu mapu akansa ngondron sih mepo akanaliy mapu, pe ilahiy para akahangoruwe ngandraha mwan ita yat, pe lokuhan, pe sinon namandran, pe nohai namandran imum, ara pwi, 19 pe tukanhilingi ngasa ndrah sahin namandran, ndre ngasa mbulukoyu hamou iwong pe hu mepo huhilingiy, ara hurakamam para Ngindrai mbuna kiro wong manau kiya kili hu. 20 Paratesah, hu kanlahiy para karahatini hu para hukawiri nongan para pwandrendrehe mepo Ngindrai iro pwai iya kili hu, ara pwi; pe ipa, <<Kapa kan hamou kiyahatek kiya ngondron ara, ara andre kasolpwa yiy kiya pat pe kimat.>> 21 Pe hu melit hu nimei, ara imbusi hu hunoh turuwehu, pwen Mose ipwai ipa, <<Yo unoh turuweyo yi.>>

22 Hapeko wawu kansa Ngondron Sayon, Yerusalem para kol paingan yang, mepo kol namandran ta Ngindrai mwalen. Wawu kansa pwen kili hu angelou pusongui-iyau pusongui mepo huro rokum iyapolo pwesai, 23 pe wawu kansa ekklesiya ta hu noru [c]Ngindrai ndrohan, mepo ngala wawu kantatuluwiy pwen ita kol paingan yang. Wawu kansa kili Ngindrai mepo yiy Ndramira Tamwanye hu ndramat masih, pe akansa kili hu mwoiwahu ndramat mepo Ngindrai ipohowe hu ndramat kultuwayi hu imwonen, pe hu kantayah imwonen masih. 24 Pe wawu kansa kili Yesu mepo yiy moyut para tapaniu sih howen, pe wawu kansa kili ndreyen mepo isekeraniy, pe ndrai ara, ara iwong mwayih iya, pe iramwaitini ndreye Apel.

25 Mara wawu kirotawawu, pe wawu mbuna kandrihisani Ngindrai mepo ita wong. Mamu hu ndramat huro kol pwan, ara Ngindrai ipwandrandrahani hu pwokeyan, hapeko hundrihisani nongnan, pe kinlahiy para hu kawop korahu pwi. Pwen pe worou po hiyeh, mepo tulahiy para kandrihisani yiy mepo ita pwandrandrahani rou iyau kol paingan yang. 26 Iro mwonen lang ara, ara mbulukoyun inunuwani kol pwan, hapeko itandrangan toro, <<Porosih i andre kununuwani kol pwan o ara pwi, hapeko andre kununuwani hu kol paingan yang i.>> 27 Pe nongan <<porosih i>> ara iwong iya hu melit mepo imangsani hu—pe andre kinunuwaniy pe kirapiyani hu kaya mawen. Pwen tesah mepo kinlahiy para nunuw kinunuwaniy pwi, ara andre hu koro manau.

28 Pwen tukarawuloh kiya kili Ngindrai, paratesah, andre tukawiri kolo king Ngindrai mepo andre nunuw kinlahiy para kinunuwaniy pwi. Pwen tehen tora ko tukoro pahandra nohowai ta Ngindrai pe tukatotohun kiya kili yiy kiyapolo nohowai. 29 Paratesah, Ngindrai torou, ara mwensen tehe mwan sih mepo ngara itimwi melit masih.

<- Hipuruw 11 Hipuruw 13 ->