EPESUS 4

Hu ndramat hupwotisingi lohongahu iya kili Kristus ara hu kapahas pe hu koro harong

1 Pe iyata Yapan opu, urupo kou, pwen tehen torako urakamam tehe wawu kahaiyani wawu kiya yoholai mepo Ngindrai kiniyoh wawu kinna aliy. 2 Pe melit masih wawu nakambusiy, ara akaiki wawu kaya pwan masih, pe akawayis, pe lohongai ikuw, pe akasopwat hamou-hamou kiya kultuw para namiliwai. 3 Mwoiwan Haiyan kinmbusi worou tukantayah ndriya sih, pwen tukapwokeyani worou para tukoro ndriya sih kiya kultuw para ndriya wayis. 4 Pe worou masih ara worou hapat o, pe Mwoiwan Haiyan ara hamou opu, pwen tehe Ngindrai kiniyoh wawu para lohonga wawu kiro handra ko kiya melit mepo itapo isa. 5 Yapan ara hamou opu, pe lohongai ndrisiyon ara handra ko, pe kultuw para paptais tuwiriy, ara handra ko; 6 Ngindrai ara hamou opu, pe yiy Tama worou ndramat masih, pe yiy iho hin isa kili worou masih, pe ipombulen kiya kili hu masih, pe iropo nondriyarou masih.

7 Hapeko worou hamou-hamou, ara Kristus kintaingani yukyuk mwayih masih para pahas ta Ngindrai kinsa kiltou. 8 Pwen tunan ara ko, Nongan Haiyan ipa toro,

<<Iro mwonen yiy iya paingan kol paingan masih,

ara iluwani hu ndramat soyon iya para kou huho ndruwan, pe itaingani hu yukyuk iya kili ndramiran hu.[a]

9 Pe nongan mepo ipa, <<Yiy iyau iya paingan kol paingan masih,>> ara ipa tesah? Nongan iye ara ipwainganiy isa kiltou ipa, Kristus mepo iya paingan masih, ara kinsa kol pwan pwen, pe iya pwan masih. 10 Yiy mepo isa pwan kol pwan, ara Yesu ara ko, andre kiya paingan, kol paingan masih. Yiy imbusiy toro, ara para andre kisilihi kol pwan masih. 11 Kristus opu iyki hu yukyuk, pe irakinima ndramat hayah para karayah hu aposel, pe hayah para karayah hu poropet, pe hayah para hu kapohowe nongan hiyan, pe hayah para pwokere hu ndramat, pe hu pwotisingi lohongahu, pe hu hayah para hu kahinuwani hu ndramat. 12 Ngindrai imbusiy toro para kimwaniyani hu ndramat masih para hu kambusi mbulyan, pwen pe hu ndramira Kristus masih, ara andre hu kamandra.

13 Kultuw aro andre kiro manau kipoo worou masih karayah hapat kiya lohongai ndrisiyon, pe tukoro nondriya lohongai iman ata Noru Ngindrai Kamai pe andre lohongarou kiman pe kultuw ta Kristus ara andre kipep kiro kiltou. 14 Pwen andre tukonto tehe hu mbunah mepo hu kantahatinihu pwi, pe tehe ndroi hakou mendreheh nowei iro mbuiwaniy, pe nohai imum pe iho pit iya isa. Pe mbuna tukoro pahandra kultuw tahu ndramat mepo ngara hu kasuhuhuri hu ndramat, pe hu mepo lohongahu ileu para hu kapakarawani hu ndramat para hu kasongsin. 15 Hapeko tukoro nondriya kultuw para namiliwai pe tukawong ndrokonan, pwen andre tukamandra pe kiyau hu pohosai masih lohongarou kiman kiro kili Kristus tehe yiy paya melit masih. 16 Pe worou masih mepo tupwotisingi lohongarou iya kili yiy, ara worou tehe nombuwen, pwen tehe ngondroweye ndramat hamou hupai iyawule, ara hususuye hiyan pe hupo mbulen hiyan. Pe nombuwen imandra pe irayah mwayih pe ipep iya kultuw namiliwai.

Pwahanou iya kili hu ndramat hupwotisingi lohongahu iya kili Ngindrai

17 Pe upa toro pe upwai tisingiy isa kili wawu iya ngala Yapan, tehe mipwan tawawu ara mbuna kiro tehe tahu Ndramira Lah ngara kambusiy. Hu melit hu ngara kalohonge kiya aliy, ara mwaihei o. 18 Pe lohongai ileu tahu ara tehe kinlokuh, pe hutora mawen masih kili taleh ta Ngindrai, paratesah, hu mbuwali hu para kapahasani nongan ndrokonan, pwen imbusi ndriyahu ara ipwoke. 19 Pe hingorou para masirai para kambusi kultuw mwomwan, ara kinto kili hu pwi, pe hu melit mwomwan masih ara huya nondriyan topwei. Pe hu kultuw pwassin handra-handra ara ngara hu kanimangan pe hu koro mbusiy manau.

20 Pe hu kultuw aro, ara kinto ndruwa hu kultuw para taleh ta Kristus mepo wawu kanwiri hinonou kinna aliy, ara pwi. 21 Pe wawu kanhilingi nongna Kristus pe akanwiri hinonou tan, pe nongan ndrokonan ara, ara iyau kili Yesu. 22 Pwen hu kultuwayi wawu para mamu, ara hu hinuwani wawu para akarapiyaniy, pe hu kultuw pwassin ara, ara ipwasike wawu para kipwalngani wawu. 23 Pe hu ndramat hu hinuwani wawu, ara para kirapaiwani lohonga wawu kirayah howen 24 Pe hinonou ara, ara para kimbusi wawu akarayah howen tehe Ngindrai imangsani wawu para akoro nondriya kultuw imwonen ndrokonan, pe haiyan.

25 Pe tehen tora ko, hamou-hamou tawawu kihitohai kultuw para pwasoyou pe kiwong ndrokonan kiya kili hu para pakeh kili wawu, paratesah, worou masih ara tuyau kili nombuwe Yesu hamou opu. 26 Kapa ndriyam kilokuh, ara mbuna mbusi pakut mwomwan, ndriyam mbuna kiro lokuh manau kipoo paramwandrai kiya lai. 27 Pe mbuna arasaya sinai para kipakarawani wou para ambusi pakut mwomwan. 28 Ndramat mepo ita pahana ara mbuna kipahana, hapeko kipo mbulen hiyan kiya niman mbukenan. Pwen andre ma anandrinan pe kiyukyuk kiya kili ndramat mepo indroisiy.

29 Pe nongan sahin mwomwan mbuna kiyau poho wawu, hapeko nongan hiyan mepo ilahiy para kisopwat hu ndramat hayah para hu kamandra kiya tesah hu ndroisiy, ara ko akawong kiya aliy. Pe hu mepo huhilingi nongna wawu, ara andre hu kawiri hiyan kiyau aliy. 30 Pe mbuna akambusi Mwoiwan Haiyan ata Ngindrai ndriyan kiporu, yiy mepo kiro mwonen lang kamulan andre kiyki kiniman para wawu karayah mbukenan pe kirakonuhi wawu. 31 Pe wawu karapiyani kultuw para ndrangisai, pe tambumbuwat, pe ndrinalokuh, pe takokowai kiya kili hu ndramat, pe kultuw para pwasimiri hu ndramat, pe kiyapolo hu kultuw pwassin handra-handra. 32 Hapeko akapo hiyan kiya kili hamou-hamou, pe koyu wawu kisikirani hamou-hamou, pe akatali pakut mwomwan ta hamou-hamou tawawu, pwen tehe iyau kili Kristus opu, Ngindrai kintali pakut mwomwan tawawu.

<- EPESUS 3 EPESUS 5 ->